O artigo 28.2 da Constitución española recoñece como dereito fundamental da persoa traballadora o dereito á folga.

Así mesmo, o artigo 10 do Real decreto lei 17/1977, do 4 de marzo, sobre relacións de traballo establece que cando a folga se declare en empresas encargadas da prestación de calquera xénero de servizos públicos ou de recoñecida e inaprazable necesidade e concorran circunstancias de especial gravidade, a autoridade gobernativa poderá acordar as medidas necesarias para asegurar o funcionamento dos servizos.

Ademais, a xurisprudencia do Tribunal Constitucional, entre outras a STC 183/2006, do 19 de xuño, vén considerando como servizos esenciais aqueles que satisfagan dereitos e intereses dos cidadáns vinculados aos dereitos fundamentais, liberdades públicas e bens constitucionalmente protexidos, como son os dereitos á protección da saúde e o dereito á seguridade e hixiene no traballo.

O exercicio deste dereito na Administración e nas empresas, entidades e institucións públicas ou privadas que presten servizos públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ao mantemento dos servizos esenciais fixados no artigo 2 do Decreto 155/1988, do 9 de xuño, polo que se ditan normas para garantir a prestación dos servizos esenciais no ámbito da Comunidade Autónoma (DOG núm. 116, do 20 de xuño), entre os que se atopa a sanidade.

O exercicio público da prestación de asistencia sanitaria non se pode ver afectado gravemente polo lexítimo exercicio do dereito de folga, xa que aquel é considerado e recoñecido prioritariamente en relación con este, o que implica a necesidade de conxugar o citado exercicio cun axeitado establecemento dos servizos mínimos naquelas áreas e actividades que repercuten na xestión dos servizos sanitarios, en prol de preservar, en último termo, o propio dereito á vida e á integridade física das persoas usuarias dos devanditos servizos.

O artigo 3 do citado decreto faculta os/as conselleiros/as competentes por razón dos servizos esenciais afectados para que, mediante orde e ante cada situación de folga, establezan o mínimo de actividade necesaria para asegurar o mantemento de tales servizos, así como para a determinación do persoal preciso para a súa prestación.

A Sección Sindical Estatal de Red Sindical TIC (RSTIC) e a Federación de Sindicatos de Banca, Bolsa, Ahorro, Entidades de Crédito, Seguros, Oficinas y Despachos, Empresas Consultoras y Planificación, Ingenierías y Oficinas de Estudios Técnicos de la CGT (FESIBAC-CGT) convocaron unha folga estatal indefinida que afectará os/as traballadores/as das empresas Indra Soluciones TI, Indra Gestión de Usuarios, Indra BPO Servicios, Indra BPO, Indra BMB, Minsait Payments Systems e Indra Producción de Software, que se desenvolverá a partir do día 18 de novembro de 2024.

A Consellería de Sanidade e o Servizo Galego de Saúde teñen formalizados co grupo empresarial Indra varios contratos de servizos que dan soporte aos servizos de saúde e que poden verse afectados pola convocatoria da folga, polo que resulta procedente fixar os servizos mínimos.

Os devanditos contratos están identificados mediante os seguintes números de expediente: AB-SER1-20-057, AB-SER1-21-046, AB-SER1-22-007, AB-SER1-23-004, AB-SER1-23-025 e AB-SER1-22-034.

O obxecto e a fundamentación de cada un dos contratos, que xustifica o establecemento dos servizos mínimos, é o seguinte:

• Contrato AB-SER1-20-057.

Este contrato ten por obxecto o apoio á hora de verificar o correcto estado de todas as ferramentas, plataformas e produtos antes da súa posta en marcha. No caso de non dispoñer deste servizo, paralizaríase toda esa actividade con respecto a todos os produtos software e plataformas do Servizo Galego de Saúde, co consecuente impacto ao tratarse, moitos deles, de actualizacións por problemas de seguridade informática ou erros de funcionamento.

• Contratos AB-SER1-21-046, AB-SER1-22-007, AB-SER1-23-004 e AB-SER1-23-025.

Teñen como obxecto a xestión de citación nos centros de saúde (o primeiro), a xestión da inspección sanitaria: incapacidade temporal (o segundo) e os sistemas de historia clínica electrónica e eReceita (o terceiro e cuarto). Abarcando o seu alcance tanto o desenvolvemento como a instalación, o mantemento e o soporte.

A actividade de mantemento e o soporte resulta esencial para garantir o correcto funcionamento destas plataformas e a resolución de incidencias, nun volume diario moi elevado e con posible paralización da actividade asistencial en caso de indispoñibilidade das ferramentas.

• Contrato AB-SER1-22-034.

Mediante este contrato préstase servizo de atención telefónica a todos os centros de saúde e unidades administrativas da Consellería de Sanidade e ao Servizo Galego de Saúde.

No devandito contrato están asignadas 25 persoas, traballando en quendas de mañá, tarde e noite todos os días do ano, atendendo máis de 20.000 chamadas mensuais e resolvendo un número semellante de incidencias.

Do seu traballo depende a habilitación do acceso de usuarios, a atención a incidencias de todo tipo, a revisión do estado e o correcto funcionamento dos sistemas, aplicacións e plataformas utilizadas nestes ámbitos, así como as app postas ao dispor da cidadanía, entre outras moitas tarefas esenciais para a correcta actividade sanitaria e prestación de servizos en liña á cidadanía.

A través das infraestruturas citadas xestiónanse 30 millóns de citas anuais e a maior parte da prestación sanitaria (sistema Ianus) e prescrición en farmacia comunitaria (eReceita).

De acordo co anterior, debe garantirse a atención ás persoas usuarias que non se poida aprazar sen consecuencias negativas para a saúde.

Con base no que antecede e logo da audiencia ao Comité de Folga,

DISPOÑO:

Artigo 1

A folga convocada entenderase condicionada ao mantemento dos servizos mínimos que se establecen nesta orde.

Así pois, tendo en conta o obxecto dos devanditos contratos, a importancia que teñen na xestión dos distintos recursos do sector sanitario e o carácter indefinido da folga, os servizos mínimos que se fixan resultan imprescindibles para manter a idónea cobertura do servizo esencial de asistencia sanitaria, para os efectos de evitar que se produzan graves prexuízos á cidadanía.

Ao propio tempo, responden á necesidade de compatibilizar o respecto ineludible do exercicio do dereito á folga coa atención á poboación, que baixo ningún concepto pode quedar desasistida, dadas as características do servizo dispensado, mediante os devanditos contratos.

Polo tanto, unha vez exposto o obxecto de cada un dos contratos e tendo en conta o grande impacto e a grande importancia que teñen estes na xestión da asistencia sanitaria, xa que dan soporte aos servizos de saúde na nosa Comunidade, establécense os seguintes servizos mínimos:

• Contratos: AB-SER1-20-057, AB-SER1-21-046, AB-SER1-22-007, AB-SER1-23-004 e AB-SER1-23-025.

Nos servizos de atención ás persoas usuarias, soporte á aplicación e administración de sistemas e redes, estímase que para o cumprimento destes contratos debe garantirse como servizos mínimos un 25 % dos recursos asignados habitualmente.

• Contrato AB-SER1-22-034.

Neste contrato, dado o elevado número de incidencias que xorden e tendo en conta que é necesario que se cubra o servizo as 24 horas dos 7 días da semana, considérase que deben garantirse polo menos uns servizos mínimos dun 50 % dos recursos asignados nunha xornada ordinaria.

Aplicando como mínimo un 50 % nas distintas quendas, o número de efectivos neste caso quedaría da seguinte maneira:

	Mañá	Tarde	Noite
Laborais	5	2	1
Sábados	2	1	1
Festivos	1	1	1

Artigo 2

A designación nominal dos efectivos que deben cubrir os servizos mínimos será realizada pola empresa e notificada ao persoal designado, e debe publicarse nos medios que se consideren oportunos e coa suficiente antelación.

O persoal designado como servizo mínimo que desexe exercer o seu dereito de folga poderá instar a substitución da súa designación por outro/a traballador/a que voluntariamente acepte o cambio de xeito expreso.

A empresa elaborará un expediente de determinación de efectivos de servizos mínimos, que estará dispoñible para xeral coñecemento do persoal interesado e no cal deberá quedar constancia da xustificación e dos criterios ponderados para determinar os devanditos efectivos.

Disposición derradeira

Esta orde producirá efectos e entrará en vigor o mesmo día da súa publicación no Diario Oficial de Galicia.

Santiago de Compostela, 14 de novembro de 2024

Antonio Gómez Caamaño
Conselleiro de Sanidade