Expediente: IN407A 2022/297-1.
Promotora: UFD Distribución Electricidad, S.A.
Instalación: regulamentación LAMT PED706 Guimil 6 entre os apoios nº AU0BBQE//68 e nº AUD2L2H2//74.
Concello: Irixoa.
Feitos:
1. O día 26 de setembro de 2022, a empresa promotora solicitou a autorización administrativa previa, a autorización administrativa de construción e a declaración de utilidade pública do proxecto de execución da dita instalación de distribución eléctrica. O dito proxecto ten a finalidade de regulamentar a liña por distancia insuficiente dos condutores ao terreo.
Achegan o proxecto, que inclúe memoria, planos e orzamento, xunto coa relación de bens e dereitos afectados de necesaria ocupación para a construción da liña, ao abeiro dos artigos 123 e 143 do Real decreto 1955/2000, e que abrangue os seguintes documentos:
• Proxecto de execución denominado: regulamentación LAMT PED706 Guimil 6 entre os apoios nº AU0BBQE//68 e nº AUD2L2H2//74, asinado con data do 30 de xaneiro de 2022 por Tito Arias Santos, enxeñeiro técnico industrial eléctrico, con nº colexiado LE-1010.
• Anexo, asinado o 2 de setembro de 2022 por Javier Fernández Mitre, enxeñeiro industrial, con nº colexiado 15.670 de Madrid.
2. O proxecto someteuse ao trámite de información pública mediante un acordo de data do 3 de maio de 2023, publicado nos seguintes medios:
– Portal de transparencia e Goberno aberto da Consellería de Economía, Industria e Innovación.
– Diario Oficial de Galicia: 26 de maio de 2023, co número 99.
– Boletín Oficial da provincia: 9 de maio de 2023, co núm. 87.
– Xornal La Voz de Galicia: 18 de maio de 2023.
– Taboleiro de anuncios do concello: segundo o certificado municipal do secretario do Concello de Irixoa de data do 2 de novembro de 2023.
3. Durante o período no que se someteu o proxecto ao trámite de información pública non se presentou ningunha alegación, reclamación ou suxestión relacionada coa documentación obxecto de publicación.
4. Consonte o artigo 127 do Real decreto 1955/2000, do 1 de decembro, déuselles traslado ás distintas administracións, organismos ou, de ser o caso, empresas de servizo público ou de servizos de interese xeral afectadas dunha separata do proxecto, na parte na que a instalación puidese prexudicar bens e dereitos ao seu cargo, que contén as características da instalación e a documentación cartográfica corrrespondente. Solicitóuse o preceptivo informe ao Servizo Provincial do Patrimonio Cultural-Departamento Territorial da Consellería de Cultura, Lingua e Xuventude da Coruña e o Concello de Irixoa. Patrimonio Cultural achegou a autorización ás actuacións e UFD aceptou o condicionado. No día desta resolución, non consta no expediente resposta do organismo afectado, é dicir, o concello, á emisión do condicionado solicitado.
5. O día 15 de outubro de 2024 emitiuse o informe técnico.
Consideracións legais e técnicas:
1. O director territorial é competente para resolver este expediente segundo o Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro) e no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG núm. 101, do 27 de maio).
2. Lexislación de aplicación:
– Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).
– Lei 40/2015, do 1 de outubro, de réxime xurídico do sector público (BOE núm. 236, do 2 de outubro).
– Lei 24/2013, do 26 de decembro, do sector eléctrico (BOE núm. 310, do 27 de decembro).
– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica (BOE núm. 310, do 27 de decembro).
– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en instalación eléctricas de alta tensión e as súas instrucións técnicas complementarias ITC-LAT 01 a 09 (BOE núm. 68, do 19 de marzo).
– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23 (BOE núm. 139, do 9 de xuño).
– Real decreto 842/2002, do 2 de agosto, polo que se aproba o Regulamento electrotécnico para baixa tensión (BOE núm. 224, do 18 de setembro).
– Real decreto 2563/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de industria, enerxía e minas (BOE núm. 246, do 14 de outubro).
– Lei do 16 de decembro de 1954, sobre expropiación forzosa (BOE núm. 351, do 17 de decembro).
– Decreto do 26 de abril de 1957, polo que se aproba o regulamento da Lei de expropiación forzosa (BOE núm. 160, do 20 de xuño).
3. Características técnicas:
As instalacións de alta tensión obxecto deste expediente atópanse no Concello de Irixoa.
• Instalación dun reconectador telecontrolado en apoio con matrícula 9J9LXES6//11-B-1 da LMTA. PDS805 (expediente: 52170). Substitución do apoio de formigón existente 9J9LXES6//11-B-1 por un novo apoio tipo celosía C-3000-14. Retirada dos fusibles XS. Retensado do condutor tipo LA-30 entre os apoios 11 e 11-B-1, cunha lonxitude de 61 metros e en condutor tipo LA-56 entre os apoios 11-B-1 e 11-B-2, cunha lonxitude de 131 m. Retíranse os curtacircuítos fuxibles XS do apoio 11-B-1.
4. No expediente consta un informe favorable dos servizos técnicos deste departamento territorial.
Consonte con todo o sinalado,
RESOLVO:
1. Conceder a autorización administrativa previa, a autorización administrativa de construción e a declaración de utilidade pública da dita instalación de distribución eléctrica.
2. A instalación executarase no prazo dun ano, contado a partir do día seguinte ao da publicación desta resolución no Diario Oficial de Galicia.
A declaración de utilidade pública leva implícita a necesidade de ocupación dos bens e de adquisición dos dereitos afectados e implicará a urxente ocupación, para os efectos do artigo 52 da Lei de expropiación forzosa.
3. Para a posta en funcionamento da instalación autorizada, deberá achegar ante este departamento territorial unha solicitude á cal xuntará a seguinte documentación:
• As declaracións de conformidade relativas ao material ou equipamento e as certificacións ou homologacións, se procede.
• Un certificado do/da director/a da montaxe no que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas axeitadas para a montaxe da instalación e posta a punto.
• Planimetría as built da instalación eléctrica en formato shape.
4. Esta autorización outórgase sen prexuízo doutras que sexan de aplicación segundo a lexislación vixente, en especial, no relativo á ordenación do territorio e ao ambiente.
Contra esta resolución, que non é definitiva en vía administrativa, poderá interporse recurso de alzada perante a conselleira de Economía e Industria, no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que consideren axeitado.
Mediante este documento notifícaselles aos interesados esta resolución, segundo o exixido no artigo 40.1 da Lei 39/2015.
A Coruña, 28 de outubro de 2024
Isidoro Martínez Arca
Director territorial da Coruña