O Consello da Xunta de Galicia, na súa reunión do día 9 de decembro de 2024, adoptou, por proposta do conselleiro de Facenda e Administración Pública, o acordo polo que se autorizou a modificación dos estatutos da sociedade mercantil pública autonómica Sodiga Galicia, Sociedad de Capital Riesgo, S.A.

En cumprimento do disposto nos artigos 104.3 e 105.2 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, ordénase a publicación no Diario Oficial de Galicia, como anexo a esta resolución, dos artigos modificados dos estatutos da sociedade mercantil pública autonómica Sodiga Galicia, Sociedad de Capital Riesgo, S.A.

Santiago de Compostela, 15 de xaneiro de 2025

José María Barreiro Díaz
Director xeral de Simplificación Administrativa e do Patrimonio

ANEXO

Estatutos de Sodiga Galicia, Sociedad de Capital Riesgo, S.A.

TÍTULO III

Capital social e accións

Artigo 7. Capital social

O capital social da sociedade é de cincuenta millóns cento setenta mil oitocentos dezanove euros con sesenta e nove céntimos de euro, representado por dezasete millóns cento dezaseis mil oitocentas sesenta accións da mesma clase, pero de distinta serie. A serie A, de 3 euros de valor nominal cada unha, totalmente subscritas e desembolsadas, numeradas correlativamente do número 1A ao 12.390.274A, ambos os dous incluídos; a serie B, de 2,769209 euros de valor nominal cada unha, totalmente subscritas e desembolsadas, numeradas correlativamente do número 1B ao 3.611.139B, ambos os dous incluídos, e a serie C, de 2,689504 euros de valor nominal cada unha, totalmente subscritas e desembolsadas, numeradas correlativamente do número 1C ao 1.115.447C, ambos os dous incluídos.

Artigo 8. As accións

As accións serán da mesma clase e concederán os mesmos dereitos (salvo o dereito de voto e o de subscrición preferente, que se exercerán en función da porcentaxe no capital social de cada accionista), pero dividiranse en tres series. A serie A, integrada por accións de 3 euros de valor nominal cada unha; a serie B, integrada por accións de 2,769209 euros de valor nominal cada unha, e a serie C, integrada por accións de 2,689504 euros de valor nominal cada unha, representadas todas elas por medio de títulos nominativos.

As accións que compoñen o capital social pódense incorporar a títulos múltiples e teñen a consideración de valores mobiliarios.

A Xunta Xeral poderá acordar, logo de proposta do Consello de Administración, co quórum previsto para modificación de estatutos, a saída dos títulos sociais a cotización no segundo mercado, cos requisitos e circunstancias que teña por oportuno establecer, de acordo coa lexislación vixente en materia de sociedades de capital risco.

TÍTULO VI

Órganos da sociedade

Artigo 24. Convocatoria da Xunta Xeral

A Xunta Xeral poderá ser convocada mediante anuncio publicado na páxina web da sociedade, se esta fose creada, inscrita e publicada nos termos previstos no artigo 11.bis da Lei de sociedades de capital.

En caso de que a sociedade non acordase a creación da súa páxina web, a Xunta Xeral deberá ser convocada polo Consello de Administración, mediante anuncio publicado no Boletín Oficial do Rexistro Mercantil e nun dos xornais de maior circulación na provincia, polo menos un mes antes da data fixada para a súa realización.

O anuncio expresará a data da reunión en primeira convocatoria e todos os asuntos que deben tratarse. Poderá, así mesmo, facerse constar a data en que, se procede, se reunirá a Xunta en segunda convocatoria. Entre a primeira e a segunda reunión deberá mediar, polo menos, un prazo de 24 horas.

No caso de solicitude de convocatoria ou complemento de convocatoria por socios que sexan titulares de, polo menos, un cinco por cento do capital social, observarase o previsto no artigo 172 da Lei de sociedades de capital.

Se a Xunta Xeral, debidamente convocada, non ten lugar en primeira convocatoria, nin se previse no anuncio a data da segunda, deberá ser anunciada esta, coa mesma orde do día e cos mesmos requisitos de publicidade que a primeira, dentro dos quince (15) días seguintes ao da data da Xunta non realizada e con dez (10) días de antelación ao da data da reunión.

A Xunta reunirase na sede social ou no lugar indicado na convocatoria (dentro do termo municipal onde a sociedade teña o seu domicilio social) e será válida a asistencia ás reunións por videoconferencia sempre que se dispoña dos medios necesarios para iso e se recoñezan reciprocamente todos os accionistas, o cal deberá expresarse na acta da reunión e na certificación dos acordos que se expidan.

Artigo 24 bis. Medios telemáticos e protección de datos

A utilización do sistema de identificación por cada accionista, administrador ou membro do Consello para o acceso a unha área privada vincularaos, para todos os efectos legais, nas súas relacións coa sociedade e entre eles a través desa área privada.

As notificacións ou comunicacións dos accionistas á sociedade dirixiranse ao presidente do Consello de Administración.

De conformidade co establecido na normativa vixente de protección de datos, os datos persoais dos accionistas, administradores e membros do Consello serán incorporados aos correspondentes ficheiros, automatizados ou non, creados pola sociedade, coa finalidade de xestionar as obrigas e os dereitos inherentes á súa condición, incluída a administración, de ser o caso, a web corporativa, segundo o disposto na lei e nestes estatutos, e aqueles poderán exercer os seus dereitos no domicilio social facendo uso dos medios que permitan acreditar a súa identidade. Os datos serán conservados durante o tempo que perdure a relación e posible exixibilidade de responsabilidades á sociedade.

Artigo 41. Convocatoria, reunións e lugar de realización

O Consello reunirase cantas veces o convoque o presidente ou quen faga as súas veces, por iniciativa súa ou cando o soliciten, cando menos, un terzo dos conselleiros e, en todo caso, unha vez ao trimestre. Na convocatoria constará a orde do día.

As reunións terán lugar, de ordinario, no domicilio social, pero poderán tamén ter lugar noutro sitio que determine o presidente.

Sen prexuízo do indicado anteriormente, salvo que a lei o impida, poderanse adoptar acordos sen sesión e por escrito, axustándose aos requisitos e ás formalidades establecidos no Regulamento do Rexistro Mercantil

O Consello de Administración reunirase na sede social ou no lugar indicado na convocatoria, se este for diferente, e será válida a asistencia ás reunións do Consello de Administración por videoconferencia ou por conferencia telefónica múltiple sempre que os conselleiros dispoñan dos medios necesarios para iso e se recoñezan reciprocamente, o cal se deberá expresar na acta do Consello e na certificación dos acordos que se expida. En tal caso, a sesión do Consello considerarase única e realizada no lugar do domicilio social.