Segundo o establecido no artigo 49 do Decreto 147/2024, do 20 de maio, polo que se establece a estrutura orgánica da Consellería de Emprego, Comercio e Emigración (DOG núm. 101, do 27 de maio), a Secretaría Xeral da Emigración é o órgano superior da Administración xeral da Comunidade Autónoma de Galicia ao cal lle corresponden as competencias en materia de emigración e retorno e, en particular, as recollidas na Lei 7/2013, do 13 de xuño, da galeguidade, e as relacións e o apoio ás persoas e ás comunidades galegas no exterior, así como o fomento e a promoción da súa actividade e funcionamento.

Así mesmo, a disposición adicional primeira do dito decreto desconcentra na persoa titular da Secretaría Xeral da Emigración a competencia para a aprobación das bases, a convocatoria e a resolución das axudas e subvencións do seu respectivo ámbito de competencia.

A Xunta de Galicia, en materia de emigración, establece como unha das súas áreas de actuación prioritaria a asistencia sociosanitaria digna para todas as persoas galegas residentes no exterior, mediante, entre outros, o programa de axudas económicas individuais. Este programa ten como obxectivo contribuír a paliar a carencia de medios económicos para poder afrontar as necesidades básicas de subsistencia e atención sociosanitaria.

O Estatuto da cidadanía española no exterior, aprobado mediante a Lei 40/2006, do 14 de decembro, que se configura como o marco xurídico que lles garante ás persoas residentes no exterior o exercicio dos seus dereitos e deberes constitucionais, establece no seu artigo 5 a asistencia e protección, por parte da Administración xeral do Estado e das comunidades autónomas, no marco das súas respectivas competencias, daquelas persoas residentes no exterior que se encontren en situación de necesidade.

A Xunta de Galicia, a través da Secretaría Xeral da Emigración, pretende, nunha actuación coordinada co Estado español, consolidar unha política de atención e protección ás persoas galegas residentes no exterior que se encontren en situación de necesidade, coa finalidade de garantirlles o exercicio dos seus dereitos e deberes constitucionais e estatutarios en termos de igualdade coas persoas españolas residentes en Galicia.

En consecuencia, convén realizar unha convocatoria de axudas para atender estas situacións, que se tramitará na modalidade de concorrencia non competitiva, prevista no artigo 19.2 da Lei 9/2007, do 13 de xuño, de subvencións de Galicia, e establecer uns requisitos e criterios básicos nos cales se fundamenten as resolucións sobre as peticións que se reciban, de tal forma que garantan a súa obxectividade e non se xeren expectativas que non poidan ser satisfeitas por razón da propia índole da convocatoria, da situación a que se pretende dar cobertura e das propias limitacións dos créditos destinados a ela.

Así mesmo, ao teren estas axudas un carácter marcadamente social e humanitario, ao estaren dirixidas a persoas sen recursos e que se conceden en atención a ter acreditado, previamente á súa concesión, tal situación, cómpre aplicar o disposto no artigo 28.9 da mencionada Lei 9/2007, do 13 de xuño, de subvencións de Galicia, na fase de xustificación, sen prexuízo de poder establecer os controis necesarios para verificar o cumprimento das obrigas e a existencia de tal situación.

En virtude do exposto, no exercicio das competencias atribuídas no Decreto 147/2024, do 20 de maio, e de conformidade co disposto na Lei 9/2007, do 13 de xuño, de subvencións de Galicia; no Decreto 11/2009, do 8 de xaneiro, polo que se aproba o Regulamento da referida Lei 9/2007; nos preceptos básicos da Lei 38/2003, do 17 de novembro, xeral de subvencións; na Lei 1/2016, do 18 de xaneiro, de transparencia e bo goberno; na Lei 39/2015, do 1 de outubro, do procedemento administrativo común das administracións públicas (LPACAP), e na demais normativa de aplicación,

RESOLVO:

Artigo 1. Obxecto

1. O obxecto desta resolución é establecer as bases dun programa de axudas económicas individuais e de carácter extraordinario, non periódico e social, para o ano 2025, en réxime de concorrencia non competitiva, dirixido ás persoas emigrantes de nacionalidade española e orixe galega, e a determinados familiares, residentes nos países do estranxeiro en que o Estado español teña fixada unha base de cálculo para a prestación por razón de necesidade no ano anterior ao da convocatoria e que se encontren en situación de precariedade económica. Están destinadas a acadar recursos económicos que contribúan a satisfacer as necesidades básicas de subsistencia e atención sociosanitaria para as cales non dispoñan de cobertura suficiente.

2. Así mesmo, é obxecto desta resolución convocar as ditas axudas para o ano 2025 (código de procedemento PR925A).

Artigo 2. Persoas beneficiarias

Poderán ser beneficiarias destas axudas:

1. As persoas emigrantes nacidas en Galicia maiores de idade e residentes nalgún dos países do estranxeiro para os cales o Estado español teña fixada unha base de cálculo para a prestación por razón de necesidade no ano anterior ao da convocatoria.

2. Os/as seus/súas fillos/as maiores de idade (coa excepción prevista para o caso das axudas por violencia de xénero) que teñan a nacionalidade española e se encontren vinculados/as a un concello galego no Padrón de españois residentes no estranxeiro (PERE) antes de finalizar o prazo de presentación de solicitudes.

3. No caso do falecemento das persoas arriba indicadas, poderán ser, por unha vez, persoas beneficiarias as seguintes:

a) O cónxuxe viúvo/a ou parella de feito ou relación análoga de afectividade dunha persoa beneficiaria na última convocatoria deste programa, que falecese nos doce meses anteriores ao último día do prazo para a presentación de solicitudes en 2025, que acredite esas condicións e o cumprimento dos requisitos do artigo 3.1.e) e f), de conformidade co disposto no artigo 9.2.

b) Un membro da unidade familiar dunha persoa solicitante desta axuda que reúna as condicións para ser beneficiaria e faleza despois do último día do prazo de presentación de solicitudes e antes da proposta de resolución do órgano instrutor, sempre e cando o solicite por escrito dentro dese período, teña 18 anos feitos e acredite esas condicións e o cumprimento dos requisitos do artigo 3.1.e) e f), de conformidade co disposto no artigo 9.2.

Artigo 3. Requisitos xerais das persoas solicitantes

1. Sen prexuízo da necesidade de cumprir e acreditar os requisitos específicos que se indican para cada un dos supostos de axuda nos seguintes artigos, para accederen a estas axudas as persoas solicitantes deben reunir os requisitos xerais que se sinalan a seguir:

a) A condición de persoas beneficiarias de acordo co disposto no artigo 2.

b) Residir nun país do estranxeiro para o cal o Estado español teña fixada unha base de cálculo para a prestación económica por razón de necesidade no ano anterior, cunha antigüidade mínima de tres meses contados desde o último día do prazo de presentación de solicitudes.

c) Carecer de rendas ou ingresos suficientes.

Considerarase que existen rendas ou ingresos insuficientes cando aqueles de que dispoña a persoa solicitante ou se prevexa que vai dispoñer en cómputo anual sexan iguais ou inferiores a 1,8 veces a base de cálculo da prestación económica por razón de necesidade establecida polo Estado español para o país de residencia, nas contías que se determinen para o ano desta convocatoria.

Malia o disposto no parágrafo anterior, se a persoa solicitante carece de rendas ou ingresos suficientes segundo o previsto nel, pero convive con outra ou outras persoas nunha mesma unidade económica familiar, a contía anterior virá determinada pola suma do límite máximo de ingresos persoais máis o resultado de multiplicar o 70 % da dita cifra polo número das persoas que convivan menos unha.

Para os efectos do establecido neste punto, consideraranse rendas ou ingresos computables todo tipo de rendas, mesmo as axudas públicas ou privadas, os bens ou dereitos de que dispoña anualmente a persoa beneficiaria ou a unidade económica familiar, derivados tanto do traballo coma do capital, así como calquera outro substitutivo daqueles.

d) Carecer de patrimonio inmoble suficiente.

Considerarase que existe patrimonio inmobiliario suficiente cando o valor patrimonial ou equivalente dos inmobles, na unidade económica familiar, agás a vivenda habitual, supere en 2,5 veces as contías previstas nese punto en cómputo anual.

e) Non percibir a prestación por razón de necesidade do Estado español.

f) Carecer de impedimentos para a percepción desta axuda segundo a lexislación de subvencións aplicable en Galicia.

2. Para os efectos desta convocatoria, entenderase como unidade económica familiar a integrada pola persoa solicitante e, de ser o caso, polo seu cónxuxe, parella de feito ou relación análoga de afectividade, así como polos/as fillos/as e parentes por consanguinidade, afinidade ou adopción ata o segundo grao, sempre que convivan coa persoa solicitante.

Artigo 4. Axudas para paliar situacións de precariedade socioeconómica na unidade familiar

Poderán solicitar as axudas para este fin as persoas que cumpran, ademais dos requisitos xerais previstos no artigo 3.1, os seguintes:

1. Os residentes nun país iberoamericano co cal o Estado español non teña asinados convenios bilaterais en materia de seguridade social, que teñan 70 anos feitos e uns ingresos da unidade económica familiar, por calquera concepto, inferiores ao 25 % da contía prevista no artigo 3.1.c).

2. Os residentes nun país iberoamericano co cal o Estado español teña asinados convenios bilaterais en materia de seguridade social, que teñan 50 anos feitos e presenten un informe social que avale a situación de precariedade.

Artigo 5. Axudas para paliar situacións de precariedade sociosanitaria na unidade familiar

Poderán solicitar este tipo de axudas as persoas con 18 anos feitos que, ademais de cumprir os requisitos xerais previstos no artigo 3.1, acrediten que elas ou algún membro da súa unidade familiar padecen unha enfermidade grave ou crónica ou se encontran nunha situación de discapacidade, e carezan de cobertura médica suficiente para cubrir os gastos do tratamento e/ou as necesidades asistenciais que precisen.

Artigo 6. Axudas para as mulleres que sufran violencia de xénero

Poderán solicitar as axudas deste suposto as mulleres maiores de idade ou menores emancipadas que cumpran os requisitos xerais do artigo 3.1 e acrediten sufrir unha situación de violencia de xénero no ano anterior ao da convocatoria.

Artigo 7. Forma e lugar de presentación de solicitudes

1. As solicitudes presentaranse preferiblemente por vía electrónica a través do formulario normalizado dispoñible na sede electrónica da Xunta de Galicia https://sede.xunta.gal

As persoas solicitantes que non posúan certificado electrónico poderán presentar a solicitude e a documentación complementaria nas entidades colaboradoras que se indican a seguir:

• No Brasil:

– Peña Galega da Casa de España de Río de Janeiro.

– Sociedade Hispano-Brasileira de Socorros Mutuos e Instrución de São Paulo.

– Sociedade de Socorros Mutuos e Beneficencia Rosalía de Castro en Santos.

– Asociación Cultural Hispano-Galega Cabaleiros de Santiago en Salvador de Bahía.

• En Cuba:

– Federación de Sociedades Galegas en La Habana.

• En Venezuela:

– Irmandade Galega de Venezuela en Caracas.

A utilización desta vía requirirá que a persoa solicitante autorice a persoa responsable da entidade colaboradora que se detalle no modelo normalizado de solicitude para que remita a súa solicitude a través da sede electrónica da Xunta de Galicia, e non exime as persoas solicitantes da obriga de cubrir e asinar a solicitude segundo o anexo I.

No caso de utilizar esta vía, é recomendable que as solicitudes se presenten cunha antelación suficiente respecto ao remate do prazo de presentación das solicitudes.

2. Opcionalmente, poderanse presentar as solicitudes de forma presencial en calquera dos lugares e dos rexistros establecidos na normativa reguladora do procedemento administrativo común.

Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

3. No caso de que a persoa solicitante estea incapacitada, a solicitude farase ao seu nome e será asinada polo seu representante legal.

Artigo 8. Prazo de presentación das solicitudes

O prazo de presentación de solicitudes empezará a contar a partir dos oito (8) días naturais seguintes ao da publicación desta resolución no Diario Oficial de Galicia e finalizará o día 31 de marzo de 2025, ás 23.59 horas (hora peninsular española), sen que en ningún caso poida ser inferior a un mes.

Malia o anterior, e de conformidade co establecido no artigo 32 da LPACAP, a Secretaría Xeral da Emigración, por razóns xustificadas, poderá ampliar o prazo de presentación de solicitudes mediante resolución que será publicada no Diario Oficial de Galicia.

Se é preciso, poderase prolongar uns días o prazo de permanencia deste procedemento na sede electrónica da Xunta de Galicia, exclusivamente para os efectos de que as delegacións e demais entidades autorizadas, en exercicio da autorización outorgada polas persoas solicitantes para facelo, poidan introducir os datos das solicitudes recibidas en prazo. 

Artigo 9. Acreditación dos requisitos para poder ser persoas beneficiarias

1. A acreditación da condición de persoas solicitantes dos supostos do artigo 2.1 e 2.2 require a presentación da seguinte documentación:

a) Documento oficial en que conste o lugar de nacemento en Galicia, agás no suposto de que a persoa solicitante fose beneficiaria dunha axuda económica convocada pola Secretaría Xeral da Emigración en 2024.

b) Os/as descendentes ata o primeiro grao de consanguinidade (fillo/a) da persoa emigrante, o certificado de nacemento do rexistro civil correspondente, agás no suposto de que a persoa solicitante fose beneficiaria dunha axuda económica convocada pola Secretaría Xeral da Emigración en 2024.

c) A nacionalidade española xustifícase mediante pasaporte español ou outro documento de identidade en que consten os seus datos persoais e a nacionalidade.

d) A residencia no estranxeiro xustifícase mediante un certificado recente do Rexistro de Matrícula Consular, no cal conste a inscrición como residente cunha antigüidade de, polo menos, tres (3) meses contados desde a publicación da convocatoria.

e) A vinculación con calquera concello galego acredítase mediante certificado de inscrición no PERE actualizado para o ano da convocatoria, agás no caso de que a persoa solicitante estea incapacitada legalmente e tal incapacidade impida a inscrición no dito padrón.

2. A acreditación da condición de solicitantes dos supostos do artigo 2.3 que optan á axuda deste ano en calidade de cónxuxe viúvo/a, parella de feito ou relación análoga dunha persoa falecida beneficiaria en 2024, ou de membro da unidade familiar da persoa solicitante falecida con condicións para selo, require a presentación da seguinte documentación:

a) Documento de identidade da persoa solicitante.

b) Certificado oficial de defunción da persoa beneficiaria en 2024 ou da solicitante deste ano e, no primeiro suposto, copia da documentación acreditativa da súa identidade.

c) Documentos que xustifiquen a relación de parentesco coa persoa falecida.

d) Declaración responsable similar á que figura no anexo I, na cal faga constar non ter solicitado ou percibido outras axudas para os mesmos conceptos, non encontrarse en ningunha das circunstancias que, segundo as normas vixentes en Galicia en materia de subvencións, impiden a obtención de axudas públicas, así como o compromiso de asumir, de ser caso, as obrigas sinaladas no artigo 21 para as persoas que resulten beneficiarias.

Artigo 10. Documentación complementaria

1. Para acreditar o cumprimento dos requisitos xerais, as persoas solicitantes achegarán coa solicitude, segundo o modelo do anexo I, a seguinte documentación:

a) Documento de identidade do país de residencia.

b) Documento acreditativo da representación legal, actualizado para o ano da convocatoria, de ser o caso.

c) Certificación ou xustificante acreditativo dos ingresos, rendas ou pensións de calquera natureza que perciban a persoa solicitante e os membros da súa unidade económica familiar ou, de non percibirse, declaración responsable da persoa solicitante de que ningún membro da súa unidade económica familiar, incluída ela, percibe ingresos, rendas ou pensións de calquera natureza.

d) Documento acreditativo da percepción da prestación por razón de necesidade (PRN).

e) Documentación xustificativa oficial na cal conste o valor patrimonial dos bens inmobles, agás a vivenda habitual, de que dispoñan os membros da unidade económica familiar da persoa solicitante, ou unha declaración responsable, asinada por todos os membros da unidade familiar maiores de idade, conforme o anexo II.

f) De ser o caso, documentación que acredite a convivencia dos membros da unidade económica familiar.

g) No caso de separación legal ou divorcio, achegarase unha copia da correspondente sentenza xudicial firme ou da certificación do Rexistro.

2. Para os efectos de acreditaren o cumprimento dos requisitos específicos dos distintos supostos de axuda, as persoas solicitantes presentarán a seguinte documentación:

2.1. Para acceder ás axudas orientadas a paliar a situación de precariedade no seo da unidade familiar do artigo 4.2: un informe social emitido por persoa profesional colexiada ou organismo oficial de ampla traxectoria no eido asistencial, no cal se detallen os membros da unidade familiar e os seus ingresos (mencionando, de ser o caso, o relativo á PRN), as condicións de vida, unha valoración acerca da suposta situación de precariedade e unha conclusión –favorable ou non– relativa á concesión da axuda solicitada.

2.2. Para acceder á axuda prevista no artigo 5: un informe social emitido por persoa profesional colexiada, no cal se concreten os membros da unidade familiar, os seus ingresos e unha valoración xeral da súa situación, e un informe médico segundo o modelo normalizado do anexo III, expedido por un facultativo dun centro de saúde público oficial do país de residencia ou dunha entidade galega ou española que preste servizos na área de saúde. Será causa de exclusión a presentación de informes médicos distintos ao do modelo do dito anexo.

2.3. Para os casos de violencia de xénero do artigo 6: unha sentenza, orde xudicial de protección, informe do Ministerio Fiscal ou informe social emitido por un organismo oficial que acredite o padecemento da situación de violencia no ano anterior e/ou no mesmo ano da convocatoria.

3. A documentación complementaria presentarase preferiblemente por vía electrónica.

Opcionalmente, as persoas interesadas poderán presentar a documentación complementaria presencialmente en calquera dos lugares e dos rexistros establecidos na normativa reguladora do procedemento administrativo común.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o cal poderá requirir a exhibición do documento ou da información orixinal.

4. Sempre que se realice a presentación de documentos separadamente da solicitude, deberanse indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

5. A falsidade ou ocultación de datos na documentación presentada para obter a axuda comportará a exclusión do proceso de valoración e, polo tanto, a imposibilidade de ser persoa beneficiaria das axudas establecidas nesta resolución.

Artigo 11. Comprobación de datos

1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

– Padrón de españois residentes no estranxeiro (PERE).

2. No caso de que as persoas interesadas se opoñan á consulta, deberán indicalo no recadro correspondente habilitado no anexo I e achegar os documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

3. Excepcionalmente, no caso de que algunha circunstancia imposibilitase a obtención dos citados datos, poderáselles solicitar ás persoas interesadas que presenten os documentos correspondentes.

Artigo 12. Trámites administrativos posteriores á presentación da solicitude

A sede electrónica da Xunta de Galicia permítelles ás persoas interesadas realizar trámites electrónicos, con posterioridade ao inicio do expediente, accedendo á Carpeta cidadá da persoa interesada. Opcionalmente, as persoas interesadas tamén poderán realizar os ditos trámites de xeito presencial en calquera dos lugares e dos rexistros establecidos na normativa reguladora do procedemento administrativo común.

Artigo 13. Réxime de concesión

1. As solicitudes presentadas para os supostos do artigo 4 tramitaranse na modalidade de concorrencia non competitiva, segundo o previsto no artigo 19.2 da Lei 9/2007, do 13 de xuño, de subvencións de Galicia, tendo en conta as especiais características destas axudas, así como a dificultade obxectiva de realizar unha comparación ou prelación das solicitudes presentadas. O importe das axudas fixarase en función do número de solicitudes e das dispoñibilidades orzamentarias, e non poderá superar a contía mínima das axudas que se concederán no resto dos supostos previstos nesta resolución, de conformidade co establecido no artigo 19.3 da citada lei.

2. O réxime de concesión das axudas económicas para os supostos dos artigos 5 e 6, tendo en conta as especiais características destas axudas, tramitarase igualmente polo procedemento de concorrencia non competitiva previsto no artigo 19.2 da Lei 9/2007, ben que nestes supostos o importe da axuda se outorgará en función da puntuación obtida ao aplicar os criterios de valoración establecidos no artigo 18 e da gravidade do suposto polo cal se solicita, en función da seguinte orde decrecente: supostos do artigo 6 (violencia de xénero) e 5 (situacións de necesidade de carácter sociosanitario). Mediante a combinación destes dous criterios, e cos límites establecidos no artigo 14.2, determinarase, de xeito progresivo, o importe da axuda para todas as puntuacións de cada un dos supostos.

Artigo 14. Financiamento e límite das contías das axudas

1. Financiamento.

As axudas para a realización deste programa concederanse con cargo á aplicación orzamentaria 14.05.312C.480.0 (accións de políticas migratorias) dos orzamentos xerais da Comunidade Autónoma para o ano 2025.

O crédito inicialmente outorgado para esta finalidade é de tres millóns novecentos corenta e seis mil seiscentos trinta euros (3.946.630 €), distribuído do seguinte xeito:

– Para os supostos do artigo 4.1, o crédito será dun millón vinte mil euros (1.020.000 €).

– Para o suposto do artigo 4.2, o crédito será dous millóns cen mil euros (2.100.000 €).

– Para os supostos dos artigos 5 e 6, o crédito será de oitocentos vinte e seis mil seiscentos trinta euros (826.630 €).

De non se esgotar o total dalgún dos créditos anteriores, poderase asignar a contía sobrante a calquera dos outros supostos.

Este importe poderá ser ampliado nos casos establecidos no artigo 31.2 da Lei 9/2007, do 13 de xuño, de subvencións de Galicia, e no artigo 30.2 do Decreto 11/2009, do 8 de xaneiro, polo que se aproba o seu regulamento, en función das maiores dispoñibilidades orzamentarias que se poidan producir na dita aplicación e condicionado á declaración de dispoñibilidade do crédito e, se é o caso, logo da aprobación da modificación orzamentaria que proceda. Neste caso, publicarase a ampliación do crédito nos mesmos medios que a convocatoria, sen que tal publicidade implique a apertura de prazo para presentar novas solicitudes nin o inicio de novo cómputo de prazo para resolver.

2. Límites mínimo e máximos das contías.

Para as persoas beneficiarias dos países que non teñan asinados convenios en materia de seguridade social co Estado español, a contía da axuda estará limitada cunha cota inferior a 250 € e unha cota superior a 375 €. Non obstante, se o número de solicitudes admitidas é tal que a contía individual por axuda resulta inferior a 250 €, denegaríanse aquelas solicitudes correspondentes ás persoas de menor idade que solicitasen a axuda polo suposto do artigo 4.1 (axudas por encontrarse a unidade familiar en situación de precariedade), ata acadar o dito mínimo de 250 €.

A contía da axuda para as persoas beneficiarias de países que teñan asinados convenios en materia de seguridade social co Estado español estará limitada cunha cota inferior a 800 € e unha cota superior a 1.650 €. Non obstante, se o número de solicitudes admitidas é tal que a contía individual por axuda resulta inferior a 800 €, denegaríanse aquelas solicitudes correspondentes ás persoas de menor idade que solicitasen a axuda polo suposto do artigo 4.2 (axudas para paliar situacións de necesidade no seo da unidade familiar) ata acadar o dito mínimo de 800 €.

Este expediente tramítase ao abeiro do artigo 25.1.a) do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, como expediente anticipado de gasto, posto que existe crédito suficiente previsto no proxecto de orzamentos da Comunidade Autónoma para o exercicio 2025. Na súa virtude, e de conformidade co establecido na Orde da Consellería de Economía e Facenda, do 11 de febreiro de 1998, modificada polas ordes do 27 de novembro de 2000 e do 25 de outubro de 2001, a concesión das subvencións queda condicionada á existencia de crédito adecuado e suficiente na Lei de orzamentos xerais da Comunidade Autónoma de Galicia para o ano 2025.

Artigo 15. Natureza e compatibilidade das axudas

1. As axudas teñen carácter persoal e intransferible. As axudas non orixinan ningún dereito subxectivo para as persoas beneficiarias e estarán, en todo caso, condicionadas ás dispoñibilidades orzamentarias do exercicio correspondente previstas para esta finalidade.

No suposto de que, unha vez ditada a resolución de concesión das axudas, a persoa beneficiaria faleza, terán dereito á súa percepción as persoas que acrediten, de acordo coa normativa do país de residencia, a súa condición de herdeiras, antes do 31 de decembro do ano desta convocatoria.

2. As axudas previstas nesta resolución serán incompatibles con calquera outra concedida por una Administración pública para os mesmos conceptos.

3. Cada persoa solicitante soamente poderá pedir unha axuda por un único suposto. De se presentar máis dunha solicitude, entenderase como válida a presentada en primeiro lugar, segundo o asento de rexistro correspondente.

4. Cando nunha mesma unidade económica familiar conformada por tres ou máis membros concorra máis dunha persoa admitida, poderán outorgarse, como máximo, dúas axudas. Nese caso, terán preferencia as solicitudes dos supostos de maior gravidade e, de ser iguais, as das persoas de maior idade, e a contía da axuda de menos importe minorarase nun 50 %.

5. Cando a persoa solicitante resida nun centro asistencial ou similar, a contía máxima da axuda non superará a diferenza entre o custo do centro e os ingresos acreditados por ela. En todo caso, non superará o importe previsto nesta resolución.

Artigo 16. Competencia e instrución

1. O órgano instrutor será a subdirección xeral competente en materia de programas sociais.

2. Os expedientes serán avaliados por un órgano colexiado integrado por tres persoas funcionarias da subdirección xeral competente en programas sociais que nomeará a persoa titular da Secretaría Xeral da Emigración, coa colaboración, de ser o caso, das comisións previstas no punto seguinte. Compete a esa comisión emitir un informe en que se concrete o resultado da avaliación de todas as solicitudes, coas contías das axudas correspondentes a aquelas persoas que cumpran os requisitos para seren beneficiarias, que se fixarán en función do disposto nos artigos 13, 14, 15 e 18. Isto supón determinar, en primeiro lugar, os importes das axudas para paliar a situación de precariedade da unidade familiar (artigo 4), e despois o resto, atendendo, nestes casos, á puntuación acadada en cada caso e á orde fixada no artigo 13.2, e sempre dentro dos límites impostos polo artigo 14 e o crédito dispoñible.

3. A persoa titular da subdirección a quen se lle atribúe a instrución dos expedientes destas axudas poderá instar a constitución doutras dúas comisións para avaliar, en concreto, as solicitudes presentadas por persoas residentes na Arxentina e no Uruguai. Nese suposto, cada unha delas estará integrada por tres persoas, dúas traballadoras da delegación da Xunta de Galicia en Bos Aires e en Montevideo, respectivamente, e a persoa titular da Delegación da Xunta nese país, que a presidirá. Correspóndelle ao persoal técnico das ditas delegacións rexistrar e analizar as solicitudes que reciban, efectuar os requirimentos de documentación que consideren necesarios, avaliar os expedientes para a súa aprobación pola respectiva comisión, e remitir o informe emitido por ela ao servizo competente en materia de programas sociais da Secretaría Xeral da Emigración.

4. Para o caso de que a persoa solicitante cometa un erro ao indicar o suposto de axudas ao cal pretenda optar ou non cumpra os requisitos específicos para o tipo de axuda marcada, as comisións avaliadoras poderán dirixir esa solicitude ao suposto de axuda que corresponda segundo o cumprimento dos requisitos establecidos nesta convocatoria.

5. Se a solicitude non está debidamente cuberta ou non se achega a documentación exixida, a Secretaría Xeral da Emigración requirirá a persoa solicitante para que, nun prazo máximo de dez días hábiles, emende a falta ou achegue os documentos preceptivos, con indicación de que, se así non o fixer, se considerará desistida da súa petición, de conformidade co que se dispón no artigo 68 da Lei do procedemento administrativo común das administracións públicas (LPACAP), logo da resolución ditada nos termos previstos no artigo 21 da citada lei.

6. Os expedientes serán avaliados polas comisións segundo os criterios de valoración establecidos no artigo 18 desta resolución para os distintos supostos. Posteriormente, o órgano instrutor, á vista do informe da Comisión do punto segundo, elevará a proposta de resolución das solicitudes presentadas á persoa titular da Secretaría Xeral da Emigración.

7. A persoa titular da Secretaría Xeral da Emigración, ademais da competencia de resolver as solicitudes presentadas ao abeiro desta convocatoria, ten a facultade de ditar cantas resolucións sexan precisas para cumprir co obxecto do programa de axudas económicas individuais destinadas a residentes no exterior.

Artigo 17. Tramitación

O procedemento para a tramitación e concesión das axudas que se convocan nesta resolución axustarase ao previsto na Lei 9/2007, do 13 de xuño, de subvencións de Galicia, no Decreto 11/2009, do 8 de xaneiro, polo que se aproba o Regulamento que a desenvolve, e na LPACAP.

Artigo 18. Criterios de valoración para as solicitudes de axuda dos artigos 5 e 6

Os criterios de valoración para o outorgamento deses tipos de axudas serán os que se sinalan a seguir, tendo en conta que a puntuación maior se corresponderá coas situacións de maior gravidade ou escaseza de medios, dentro duns tramos que establecerá a Comisión Avaliadora nomeada pola persoa titular da Secretaría Xeral da Emigración.

1. Para os supostos do artigo 5:

a) O grao de autonomía para realizar as actividades básicas da vida diaria e da gravidade da enfermidade: de 1 a 2 puntos. Se a persoa diminuída se vale por si mesma ou ten carencias de saúde menos graves terá un punto, e 2 se depende doutra para atender as súas actividades básicas da vida cotiá ou padece enfermidades graves.

b) Os ingresos económicos e o patrimonio: de 1 a 2 puntos, en función de que sexan insuficientes ou moi insuficientes.

c) A idade da persoa solicitante: de 1 a 2 puntos, en función de que sexa menor ou maior de 50 anos.

2. Para o suposto do artigo 6:

a) As cargas familiares da persoa solicitante, considerando para tal fin as persoas menores de vinte e catro (24) anos ou maiores desta idade discapacitadas que dependan economicamente da persoa solicitante: de 1 a 2 puntos.

b) Os ingresos económicos da persoa solicitante: de 1 a 2 puntos, en función de que sexan insuficientes ou moi insuficientes.

c) A idade da persoa solicitante: de 1 a 2 puntos, en función de que sexa menor ou maior de 50 anos.

Artigo 19. Resolución. Modificación da resolución de concesión. Pagamento e reintegro

1. O prazo máximo para resolver será de cinco meses, contados desde o día de remate do prazo para a presentación das solicitudes.

Transcorrido o dito prazo sen que se diten as resolucións expresas, poderanse entender desestimadas as solicitudes, de acordo co establecido no artigo 23.5 da Lei 9/2007, do 13 de xuño, de subvencións de Galicia.

2. As persoas beneficiarias das axudas quedan obrigadas a comunicarlle á Secretaría Xeral da Emigración, no momento en que se produza, calquera alteración dos requisitos exixidos na convocatoria ou de circunstancias sobrevidas que impidan ou dificulten a execución das accións para as cales se solicitou a axuda, e a Secretaría poderá adoptar a resolución de modificación da concesión ou de revogación que corresponda.

3. A contía das axudas concedidas aboaráselles ás persoas beneficiarias nun pagamento único, unha vez notificada a resolución de concesión.

O medio de pagamento preferente será a transferencia bancaria. Para tales efectos, a persoa solicitante cubrirá a epígrafe de datos bancarios do anexo I e achegará un certificado bancario da conta da súa titularidade onde pretende que se lle aboe o importe.

Cando no país se presenten dificultades para facer efectivo o pagamento mediante transferencias bancarias ou as circunstancias así o aconsellen, cabe empregar outros sistemas alternativos, como poden ser as tarxetas prepagamento ou cheques nominativos.

O pagamento correspondente ás axudas da Arxentina e do Uruguai poderá aboarse directamente a cada unha das persoas beneficiarias ou a unha conta da titularidade da Delegación da Xunta de Galicia en Bos Aires e Montevideo, que será a que se encargue de aboarlle a cada unha das persoas beneficiarias residentes neses países o importe correspondente.

A Administración non se fai responsable da imposibilidade de efectuar o pagamento por causas imputables ás persoas solicitantes.

4. Procederán o reintegro total ou parcial das cantidades percibidas e a exixencia dos xuros de demora debidos desde o momento en que se efectúe o pagamento, nos casos sinalados no artigo 33 da Lei 9/2007, do 13 de xuño, de subvencións de Galicia. De acordo co artigo 14.1.n) da Lei 9/2007, os criterios de gradación dos posibles incumprimentos para determinar a cantidade que se minorará ou reintegrará serán os seguintes:

– O incumprimento total dos fins para os cales se concede a subvención ou o da realización dos gastos subvencionables dará lugar á perda do dereito ao cobramento ou, se é o caso, ao reintegro da totalidade da axuda concedida.

– Calquera outra inobservancia se considerará incumprimento parcial dos fins para os cales se concedeu a axuda da realización dos gastos subvencionables e dará lugar á perda do dereito ao cobramento ou, se é o caso, ao reintegro na porcentaxe correspondente ao investimento non efectuado.

Artigo 20. Notificacións

1. As notificacións de resolucións e actos administrativos efectuaranse preferentemente por medios electrónicos. As persoas interesadas poderán decidir e comunicar en calquera momento que as notificacións sucesivas se efectúen ou deixen de efectuar por medios electrónicos mediante os modelos normalizados dispoñibles.

2. A persoa interesada deberá manifestar expresamente a modalidade escollida para a notificación (electrónica ou en papel) no formulario.

3. No caso de optar pola notificación en papel, efectuarase a notificación segundo o establecido na normativa reguladora do procedemento administrativo común.

4. De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas efectuaranse mediante a comparecencia na sede electrónica da Xunta de Galicia e a través do Sistema de notificación electrónica de Galicia-Notifica.gal. Este sistema remitiralles ás persoas interesadas avisos da posta á disposición das notificacións á conta de correo e/ou teléfono móbil que consten na solicitude. Estes avisos non terán, en ningún caso, efectos de notificación efectuada e a súa falta non impedirá que a notificación sexa considerada plenamente válida.

5. As notificacións por medios electrónicos entenderanse efectuadas no momento no que se produza o acceso ao seu contido e entenderanse rexeitadas cando transcorresen dez días naturais desde a posta á disposición da notificación sen que se acceda ao seu contido.

6. Se o envío da notificación electrónica non for posible por problemas técnicos, efectuarase a notificación polos medios previstos na normativa reguladora do procedemento administrativo común.

Artigo 21. Obrigas das persoas beneficiarias

1. Con carácter xeral, as persoas beneficiarias están obrigadas a cumprir os requisitos do artigo 2 da convocatoria ata o aboamento da axuda, así como a someterse ás actuacións de comprobación que considere precisas a Secretaría Xeral da Emigración para asegurar o cumprimento do contido e as condicións do programa, e aos requisitos legais e regulamentarios que prevexa a normativa xeral da Xunta de Galicia.

2. Así mesmo, estarán na obriga de prestar colaboración e facilitar canta documentación lles sexa requirida no exercicio das funcións de control que lles corresponden á Intervención Xeral da Comunidade Autónoma, así como ao Consello de Contas e ao Tribunal de Contas, no exercicio das súas funcións de fiscalización e control do destino destas axudas.

Artigo 22. Información ás persoas interesadas

1. De acordo co establecido no artigo 14, letra ñ), da Lei 9/2007, do 13 de xuño, de subvencións de Galicia, as persoas beneficiarias quedan informadas da existencia do Rexistro Público de Subvencións e, xunto cos datos consignados no modelo normalizado de solicitude, dos aspectos básicos dos previstos no Regulamento (UE) 2016/679 do Parlamento Europeo e do Consello, do 27 de abril de 2016, relativo á protección das persoas físicas no que respecta ao tratamento dos seus datos persoais e á libre circulación destes datos (RXPD), e na Lei orgánica 3/2018, do 5 de decembro, de protección de datos persoais e garantía dos dereitos dixitais.

2. Por outra banda, de conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, transmitiranse á Base de datos nacional de subvencións a información que requira, o texto da convocatoria para a súa publicación na citada base e o seu extracto no Diario Oficial de Galicia.

Artigo 23. Transparencia e bo goberno

1. Dada a natureza das axudas recollidas nesta resolución, e de conformidade co artigo 17.3 da Lei 1/2016, do 18 de xaneiro, de transparencia e bo goberno, e co artigo 15.2.d) da Lei 9/2007, do 13 de xuño, de subvencións de Galicia, exceptúase a Secretaría Xeral da Emigración da publicación das subvencións concedidas ao abeiro desta resolución.

2. En virtude do disposto no artigo 4 da Lei 1/2016, do 18 de xaneiro, de transparencia e bo goberno, as persoas físicas e xurídicas beneficiarias de subvencións están obrigadas a subministrar á Administración, ao organismo ou á entidade das previstas no artigo 3.1 da Lei 1/2016, do 18 de xaneiro, a que se encontren vinculadas, logo de requirimento, toda a información necesaria para o cumprimento por parte daquela das obrigas previstas no título I da citada lei.

Artigo 24. Réxime de recursos

1. Contra esta resolución cabe interpoñer de forma potestativa recurso de reposición, ante o mesmo órgano que a ditou, no prazo dun mes contado a partir do día seguinte ao da súa publicación no Diario Oficial de Galicia.

Así mesmo, poderase interpoñer recurso contencioso-administrativo, ante o Tribunal Superior de Xustiza de Galicia, no prazo de dous meses contados a partir do día seguinte ao da súa publicación, de acordo co establecido na Lei 29/1998, do 13 de xullo, reguladora da xurisdición contencioso-administrativa.

2. As resolucións que se diten neste procedemento esgotan a vía administrativa e contra elas cabe interpoñer de forma potestativa recurso de reposición, ante o mesmo órgano que as ditou, no prazo dun mes contado a partir do día seguinte ao da notificación da resolución, se for expresa. Se a resolución non for expresa, o recurso poderase interpoñer en calquera momento a partir do día seguinte a aquel en que se produza o acto presunto, de acordo co establecido na LPACAP.

Así mesmo, poderase interpoñer recurso contencioso-administrativo, ante o Tribunal Superior de Xustiza de Galicia, no prazo de dous meses contados a partir do día seguinte ao da notificación da resolución, se for expresa, ou no prazo de seis meses contados a partir do día seguinte a aquel en que se entenda producido o acto presunto, de acordo co establecido na Lei 29/1998, do 13 de xullo, reguladora da xurisdición contencioso-administrativa.

Disposición derradeira única. Entrada en vigor

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 14 de xaneiro de 2025

Antonio Rodríguez Miranda
Secretario xeral da Emigración