Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáselle publicidade ao acordo acadado polo Xurado Provincial de Clasificación de Montes Veciñais en Man Común de Pontevedra, na sesión que tivo lugar o 27 de novembro de 2024, respecto á revisión do esbozo e elaboración da cartografía actualizada do monte veciñal denominado Monte de Nespereira da Comunidade de Montes Veciñais en Man Común de Nespereira, no concello de Pazos de Borbén (expediente RE22024).
O 25.9.2024, o Servizo de Montes deste departamento territorial emitiu o seguinte informe:
«Feitos:
Primeiro. O 14.9.2022, con número de rexistro de entrada 2022/2261783, a Comunidade de Montes Veciñais en Man Común (en diante, CMVMC) de Nespereira, parroquia de San Martiño de Nespereira (Pazos de Borbén), solicitou a revisión total do esbozo do monte veciñal en man común (en diante, MVMC) de Nespereira, con ID2941. A dita solicitude deu lugar á apertura do expediente RE22024. Consta no expediente a seguinte documentación:
– Revisión do esbozo do monte veciñal en man común de Chan Damián, Merouces, Saramagoso, Vaca Morta, Chan do Areeiro, Chamuscada e da Pedra, pertencentes á CMVMC de Nespereira, concello de Pazos de Borbén, Pontevedra, asinada o 4.7.2024 pola enxeñeira técnica forestal colexiada núm. 908 do COETF de Galicia.
– Certificado do 9.7.2024 da secretaria, coa conformidade do presidente da CMVMC de Nespereira, da aprobación na asemblea xeral do 6.7.2024.
– Cartografía en formato dixital ETRS 89 UTM ZONE 29N.
Revisada a memoria técnica achegada da revisión dos montes veciñais, indica:
– Levouse a cabo un levantamento topográfico das parcelas con GPS de precisión centimétrica en que se percorreu todo o perímetro; durante ese percorrido identificáronse muros e marcos que separan o monte veciñal doutras propiedades particulares.
– O monte veciñal de Nespereira está formado por 7 parcelas denominadas: Chan Damián, Merouces, Saramagoso, Vaca Morta, Chan do Areeiro, Chamuscada e de Pedra. A parcela Chamuscada non foi dixitalizada nos anos 2000 do esbozo previo de clasificación, polo que se acepta a súa inclusión.
– Na estrema co monte veciñal da CMVMC de Quintela (Redondela) existe o deslindamento PO-DESC-02/18, aprobado polo Xurado de MVMC de Pontevedra (DOG núm. 179, do 20.9.2022).
– Na estrema co monte veciñal da CMVMC de Cepeda (Pazos de Borbén) respéctase o seu esbozo, que foi revisado no expediente RE22015, consonte a D.T. 13 da Lei 7/2012, do 28 de xuño, de montes de Galicia.
– Na estrema co monte veciñal da CMVMC de Saxamonde (Redondela) respéctase o seu esbozo.
– Non se admite a proposta de modificación de estremas co monte veciñal da CMVMC de Borbén (Pazos de Borbén), Padróns (Ponteareas) e Louredo (Mos), xa que non achegan suficiente documentación histórica ou actual nin teñen coherencia cos instrumentos de xestión. Deberá tramitar os deslindamentos consonte o artigo 53 da Lei 7/2012, do 28 de xuño, de montes de Galicia.
Segundo. O MVMC de Nespereira foi clasificado polo Xurado de MVMC de Pontevedra o 13.11.1979, cunha superficie inicial de 463 ha. Segundo os datos do Sistema Rexistral Forestal regulado no artigo 126 da Lei 7/2012, do 28 de xuño, de montes de Galicia:
– Consta contrato de xestión coa Administración forestal de toda a superficie do monte veciñal cos elencos: 3615028, 3615553 e 3615557.
– A CMVMC de Nespereira non dispón dun documento de xestión forestal.
– Constan diversas permutas de terreos con propietarios particulares e expropiacións para o tendido de gas e tendidos eléctricos.
– Consta o Anuncio do 5 de setembro de 2022 (DOG núm. 179, do 20.9.2022) onde se publica o acordo sobre o deslindamento parcial entre a CMVMC de Quintela (Redondela) e a CMVMC de Nespereira (Pazos de Borbén) (expediente PO-DESC-02/18).
Terceiro. A superficie e perímetro da revisión do esbozo proposto total é de 365,87 ha (superficie sen proxección) e 30,27 km (descontados treitos non modificados), respectivamente. Non se modifican as estremas establecidas na Resolución do Xurado de MVMC de Pontevedra do 7.5.1979.
Cuarto. O 30.11.2022, o Xurado Provincial de MVMC de Pontevedra acordou solicitar ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Nespereira (Pazos de Borbén), expediente RE22024, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en diante, LMG), na súa disposición transitoria décimo terceira establece o procedemento de revisión de esbozos de montes veciñais en man común.
Segunda. A revisión do esbozo do MVMC de Nespereira da CMVMC de Nespereira proposta polo Servizo de Montes é a presentada pola comunidade e queda definido consonte os datos reflectidos no feito terceiro e a memoria técnica indicada no feito primeiro (excepto nas estremas en que non se acepta a proposta de modificación: cos MVMC da CMVMC de Borbén, CMVMC Padróns e CMVMC de Louredo)».
Vista a proposta de revisión presentada polo Servizo de Montes sobre a adaptación do esbozo do monte veciñal de Nespereira e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo do monte veciñal denominado Monte de Nespereira clasificado a prol da CMVMC de Nespereira (Pazos de Borbén), segundo a proposta do Servizo de Montes e a planimetría elaborada por este.
Pontevedra, 17 de xaneiro de 2025
Antonio Crespo Iglesias
Presidente do Xurado Provincial de Clasificación de Montes Veciñais
en Man Común de Pontevedra