BDNS (Identif.): 812836.

De conformidade co previsto no artigo 17.3.b) e no artigo 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base de datos nacional de subvencións (BDNS) (http://www.pap.minhap.gob.es/bdnstrans/index).

Primeiro. Entidades beneficiarias

1. No procedemento SI427A, poderán ser beneficiarias das subvencións previstas as entidades de iniciativa social sen ánimo de lucro que cumpran os requisitos, condicións e obrigas previstos nesta convocatoria e na normativa xeral de subvencións e, en particular, os seguintes:

a) Estar inscritas na Área de Igualdade do Rexistro Único de Entidades Prestadoras de Servizos Sociais (RUEPSS).

b) Ter domicilio social ou delegación en Galicia.

c) Non encontrarse en ningunha das circunstancias e prohibicións establecidas nos números 2 e 3 do artigo 10 da Lei 9/2007, do 13 de xuño. A acreditación de non estar incursa en ningunha delas realizarase mediante declaración responsable da entidade interesada.

Quedan excluídas do ámbito de aplicación deste procedemento as comunidades de bens, as sociedades civís, as entidades que se rexan polas disposicións relativas ao contrato de sociedade, as cooperativas, as mutualidades, así como as unións temporais de empresas e as agrupacións de interese económico.

2. No procedemento SI436B, poderán ser beneficiarias das subvencións previstas as entidades de iniciativa social sen ánimo de lucro que cumpran os requisitos, condicións e obrigas previstos nesta convocatoria e na normativa xeral de subvencións e, en particular, os seguintes:

a) Estar inscritas no Rexistro Único de Entidades Prestadoras de Servizos Sociais (RUEPSS).

b) Ter domicilio social ou delegación en Galicia.

c) Carecer de ánimo de lucro de acordo co previsto na Lei 49/2002, do 23 de decembro, de réxime fiscal das entidades sen fins lucrativos e dos incentivos fiscais ao mecenado.

d) Non encontrarse en ningunha das circunstancias e prohibicións establecidas nos números 2 e 3 do artigo 10 da Lei 9/2007, do 13 de xuño. A acreditación de non estar incursa en ningunha delas realizarase mediante declaración responsable da entidade interesada.

e) Non ser sancionadas, en virtude de resolución administrativa ou sentenza xudicial firme, pola comisión de infraccións graves ou moi graves en materia de prevención de riscos laborais no ano anterior a esta orde.

f) Non ser obxecto de sanción por resolución administrativa firme ou condenada por sentenza xudicial firme por levar a cabo prácticas laborais consideradas discriminatorias pola lexislación vixente, salvo cando se acredite cumprir coa sanción ou a pena imposta e elaborar un plan de igualdade ou adoptar medidas dirixidas a evitar calquera tipo de discriminación laboral entre mulleres e homes.

Segundo. Obxecto

As axudas concédenselles en réxime de concorrencia competitiva a entidades de iniciativa social sen ánimo de lucro para o desenvolvemento dos seguintes programas:

a) Programas de recursos integrais de atención especializada dirixidos específica e exclusivamente a mulleres en situación de especial vulnerabilidade, segundo o establecido na disposición adicional primeira (procedemento SI427A-capítulo II).

b) Programa do Plan Corresponsables, que desenvolverán entidades de iniciativa social sen ánimo de lucro mediante a posta en marcha de actuacións orientadas a facilitar a conciliación das familias con fillas e fillos de ata 16 anos de idade, mediante a posta en marcha de servizos de coidado profesional, a creación de emprego de calidade no sector dos coidados, e a sensibilización da sociedade, particularmente dos homes, en materia de corresponsabilidade e coidados (procedemento SI436B-capítulo III).

Terceiro. Bases reguladoras

Orde do 3 de xaneiro de 2025 pola que se establecen as bases reguladoras que rexerán as subvencións a entidades de iniciativa social sen ánimo de lucro para programas dirixidos a mulleres en situación de especial vulnerabilidade e para o desenvolvemento das actuacións do Plan Corresponsables, cofinanciadas parcialmente pola Unión Europea no marco do programa FSE+ Galicia 2021-2027, e se convocan para o ano 2025 (códigos de procedemento SI427A e SI436B).

Cuarto. Importe

1. Ás subvencións obxecto desta convocatoria destínase un crédito por un importe total de dous millóns douscentos mil euros (2.200.000 euros), que se imputarán ás aplicacións orzamentarias seguintes:

Programa-Procedemento	Aplicación	Cód. proxecto	Importe
SI427A	08.07.313B.481.2	2023 00096	1.900.000,00
SI436B	08.07.312G.481.2	2021 00175	300.000,00

As axudas do procedemento SI427A estarán cofinanciadas, nun 60 %, pola Unión Europea no marco do programa FSE+ Galicia 2021-2027, no obxectivo político 4. Unha Europa máis social e inclusiva, por medio da aplicación do piar europeo de dereitos sociais; prioridade 2: Inclusión social e loita contra a pobreza; obxectivo específico 4.8: Fomentar a inclusión activa co obxecto de promover a igualdade de oportunidades, a non discriminación e a participación activa, e mellorar a empregabilidade, en particular para os grupos desfavorecidos; medida 2.H.03 - Programa de atención a mulleres en situación de especial vulnerabilidade.

As axudas do procedemento SI436B estarán financiadas con fondos finalistas dos orzamentos xerais do Estado (OXE) procedentes do Ministerio de Igualdade, no marco do Plan Corresponsables, a través da liña de actuación 00524-Plan Corresponsables.

2. As contías máximas das axudas nos diferentes programas son as seguintes:

a) Programa de recursos integrais de atención especializada dirixidos específica e exclusivamente a mulleres en situación de especial vulnerabilidade (código de procedemento SI427A): en todo caso, a contía máxima da axuda que se lle pode conceder a cada entidade ao abeiro desta convocatoria é de 40.000 euros.

b) Programa do Plan Corresponsables (código de procedemento SI436B): en todo caso, a contía máxima da axuda será de 35.000 euros cando se solicite para a realización da tipoloxía de proxectos de servizos de coidado profesional para familias con fillas e fillos de ata 16 anos de idade (artigo 27.2.1), e de 5.000 euros cando se solicite para a realización da tipoloxía de proxectos de accións de formación e sensibilización en corresponsabilidade e coidados destinados a impulsar modelos de masculinidades corresponsables e igualitarios (artigo 27.2.2). No caso de que se solicite a axuda para as dúas tipoloxías de proxectos, o límite máximo da axuda por entidade será de 40.000 euros, respectando o límite establecido no parágrafo anterior para cada tipoloxía de proxecto.

Quinto. Prazo de presentación de solicitudes

O prazo de presentación de solicitudes será dun mes, contado a partir do día seguinte ao da publicación desta orde no Diario Oficial de Galicia. Entenderase como último día do prazo o correspondente ao mesmo ordinal do día da publicación. Se o último día de prazo é inhábil, entenderase prorrogado ao primeiro día hábil seguinte e, se no mes do vencemento non hai día equivalente ao inicial do cómputo, entenderase que o prazo finaliza o último do mes.

Santiago de Compostela, 3 de xaneiro de 2025

Fabiola García Martínez
Conselleira de Política Social e Igualdade