De conformidade co artigo 8 da Lei 19/2013, do 9 de decembro, de transparencia, acceso á información pública e bo goberno, e co artigo 8.4 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade ao seguinte encargo a medios propios coas seguintes características:

– Resolución do 23 de decembro de 2024, da Consellería de Vivenda e Planificación de Infraestruturas, pola que se encarga ao medio propio empresa Tecnologías y Servicios Agrarios, S.A., S.M.E., M.P. (Tragsatec) o servizo técnico cualificado para o asesoramento técnico en materia de infraestrutura de datos espaciais, mantemento da aplicación Siotuga e apoio no mantemento de visores cartográficos.

– Actividade: os traballos que se desenvolverán consisten en (i) apoio na análise, validación e tratamento da documentación e información xeográfica relativa á tramitación de expedientes de planeamento urbanístico e de ordenación do territorio; (ii) mantemento do portal do Sistema de información de ordenación do territorio (Siotuga) e apoio no mantemento dos visores cartográficos xestionados pola Dirección Xeral de Urbanismo; (iii) o asesoramento xeral en tecnoloxías de información xeográfica e ciencia de datos espacial.

– Natureza e alcance do encargo: este encargo ten natureza intersubxectiva, ao ter a empresa Tecnologías y Servicios Agrarios, S.A., S.M.E., M.P. (Tragsatec) a consideración de medio propio instrumental da Administración, segundo o establecido na disposición adicional vixésimo cuarta da Lei 9/2017, do 8 de novembro, de contratos do sector público, pola que se traspoñen ao ordenamento xurídico español as directivas do Parlamento Europeo e do Consello 2014/23/UE e 2014/24/UE, do 26 de febreiro de 2014, e de conformidade co disposto nos artigos 45 e 47 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia (Lofaxga).

– Financiamento: o orzamento ascende á cantidade de sesenta e un mil novecentos un euros con trece céntimos (61.901,13 €), que se financiará con cargo á aplicación orzamentaria 11.03.521A.640.1 dos orzamentos xerais da Comunidade Autónoma para o ano 2025, en que existe crédito axeitado e suficiente.

– Prazo de vixencia: os traballos encargados comezarán o 1 de xaneiro de 2025 e o prazo máximo de finalización é o 31 de decembro de 2025. O encargo extinguirase ao finalizar a súa vixencia.

Santiago de Compostela, 10 de febreiro de 2025

María Encarnación Rivas Díaz
Directora xeral de Urbanismo