Unha vez recibida a proposta final do tribunal coas persoas candidatas que superaron o proceso selectivo e acreditado o cumprimento dos requisitos establecidos na convocatoria precisos para o seu nomeamento como funcionarias de carreira, cómpre considerar:

Mediante a Resolución do 1 de decembro de 2021, publicada no Diario Oficial de Galicia (DOG) do 15 de decembro, convocouse o proceso selectivo para cubrir dúas prazas como persoal laboral fixo do grupo I, da categoría de técnico/a superior de normalización lingüística, polo sistema de promoción interna e de acceso libre.

O 21 de decembro de 2021 publicouse a relación de postos de traballo (RPT) do persoal de administración e servizos (PAS) (Resolución do 2 de decembro), logo de negociación e acordo coa representación sindical do persoal laboral e funcionario de administración e servizos da Universidade de Vigo, que unifica nunha as dúas RPTs preexistentes, unha do PAS sometido ao réxime laboral e outra do PAS regulado polo réxime funcionarial. Con este acordo, a totalidade do PAS da Universidade de Vigo pasou a figurar nunha única RPT que entrou en vigor, con efectos plenos o 1 de novembro de 2022, de acordo coa instrución da Xerencia do 31 de outubro de 2022.

De xeito paralelo ao proceso negociador da RPT, as mesmas partes negociaron e acordaron a funcionarización voluntaria do PAS laboral, así como o procedemento mediante o que acadala a través do Acordo de funcionarización do persoal laboral fixo de administración e servizos. No seu anexo II establece a correspondencia entre as categorías profesionais do PAS laboral e as novas escalas e subescalas de PAS funcionario, para os efectos da súa integración nelas; concretamente, a categoría de técnico superior de normalización lingüística integrouse na escala técnica superior de servizos xerais, subescala de normalización lingüística.

A continuación, convocáronse os procesos selectivos para a adquisición da condición de persoal funcionario de carreira nas escalas e subescalas propias desta universidade, mediante as resolucións do 10 de febreiro de 2022 (DOG do 22) e 10 de xaneiro de 2024 (DOG do 22). Estes procesos concluíron, respectivamente, mediante as resolucións do 27 de xullo de 2022 e do 8 de xullo de 2024, e procedeuse ao nomeamento do persoal que os superou.

Resulta así que, no período transcorrido entre a convocatoria das prazas (1 de decembro de 2021) e a resolución do proceso selectivo, modificouse a súa condición e réxime xurídico, que pasa de laboral a funcionarial.

Por conseguinte, considerando todo o exposto, a incorporación das persoas que superaron o proceso selectivo debe realizarse baixo o réxime de persoal funcionario e mediante o procedemento establecido no artigo 60 da Lei 2/2015, do 29 de abril, do emprego público de Galicia.

Consecuentemente, constatado o cumprimento do previsto nas alíneas a) e b) do devandito artigo, consonte o disposto nas leis de función pública e de acordo coas atribucións que me confire a Lei orgánica 2/2023, do 22 de marzo (BOE do 23), do sistema universitario, e os estatutos da Universidade de Vigo, esta reitoría

RESOLVE:

Primeiro. Nomear as persoas que se relacionan funcionarias de carreira da escala técnica superior de servizos xerais, subescala de normalización lingüística, da Universidade de Vigo, con especificación do destino adxudicado:

Eva María Castro Figueiras, con DNI ***8174**,

CÓD.	Denominación	D	CD	CE	FP	SG	Q	C	Escala	Subescala	R	O
36000 PF10341	Técnico/a de normalización lingüística	1	23	826,58	C	A1	M	V	Técnica superior de servizos xerais	Normalización lingüística

María Cristina Rodríguez Ricart, con DNI ***9201**,

CÓD.	Denominación	D	CD	CE	FP	SG	T	C	Escala	Subescala	R	O
36000 PF10342	Técnico/a de normalización lingüística	1	23	826,58	C	A1	M	V	Técnica superior de servizos xerais	Normalización lingüística

COD.: código	Q: quenda de traballo, M-mañá
D: dotación	C: campus, V-Vigo
CD: complemento de destino	R: requisitos
CE: complemento específico	O: observacións
FP: forma de provisión, C-concurso
SG: subgrupo de clasificación

Segundo. Para adquirir a condición de persoal funcionario de carreira, deberán cumprir os requisitos exixidos no artigo 60 da Lei 2/2015, do 29 de abril, do emprego público de Galicia, e tomar posesión do posto de traballo no prazo dun mes, contado a partir do día seguinte ao da publicación desta resolución no Diario Oficial de Galicia.

Contra esta resolución, que esgota a vía administrativa, poderase interpoñer un recurso perante a xurisdición contencioso-administrativa, no prazo de dous meses contados desde o día seguinte ao da súa publicación, de conformidade co disposto na Lei 29/1998, do 13 de xullo, reguladora da xurisdición contencioso-administrativa. Non obstante, as persoas interesadas poderán optar por interpoñer contra esta resolución un recurso de reposición, no prazo dun mes contado a partir do día seguinte ao da súa publicación, perante o mesmo órgano que a ditou. Neste caso non se poderá interpoñer un recurso contencioso-administrativo ata que sexa resolto expresamente ou se producise a desestimación presunta do recurso de reposición interposto, segundo o previsto no artigo 123.2 da Lei 39/2015, do 1 de outubro, do procedemento administrativo común das administracións públicas.

Vigo, 20 de febreiro de 2025

Manuel Joaquín Reigosa Roger
Reitor da Universidade de Vigo