O 1 de marzo de 2022 publicouse no Diario Oficial de Galicia a Orde do 21 de febreiro de 2022 sobre delegación de competencias en diversos órganos de dirección da Consellería do Mar e na Presidencia da entidade pública empresarial Portos de Galicia.

O artigo 8 delega na persoa titular da Secretaría Xeral Técnica e nas persoas titulares das direccións xerais a sinatura de convenios de importe inferior a 150.000 euros, no ámbito das súas competencias.

A través da figura dos convenios de colaboración exprésase o compromiso da Consellería do Mar en traballar da man con outras administracións públicas, organismos públicos, entidades de dereito público ou con suxeitos de dereito privado para lograr obxectivos comúns no eido do sector marítimo-pesqueiro. Esta colaboración é esencial de cara a seguir avanzando na consecución de melloras para todos os axentes implicados e facer fronte aos retos que se presentan; por iso, parece axeitado que a persoa titular da Consellería interveña de forma directa na sinatura de tales compromisos.

Por outro lado, o artigo 10, números 1.2.d) e 2.1.c), delega na persoa titular da Dirección Xeral de Pesca, Acuicultura e Innovación Tecnolóxica a autorización prevista na Orde do 14 de marzo de 1997 que establece as condicións para o traslado de moluscos bivalvos entre viveiros situados en augas da Comunidade Autónoma de Galicia, para o traslado de semente, de individuos adultos e desdobramento de moluscos bivalvos, cando se realice en distintos ámbitos territoriais, e nas persoas titulares dos departamentos territoriais cando ese traslado se realice dentro do mesmo ámbito territorial.

Non obstante, esta delegación só facía referencia ao traslado entre rías, sen mencionar o traslado vía terrestre. O traslado que se realice por vía terrestre tamén deberá contar coa preceptiva autorización da consellería con competencias en marisqueo, suposto que non estaba amparado pola anterior redacción dos números 1.2.d) e 2.1.c) do artigo 10. Cómpre, polo tanto, modificar a redacción engadindo o suposto de traslado por vía terrestre.

Finalmente, e de conformidade co disposto no artigo 35 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, cómpre actualizar as referencias ás direccións territoriais para substituílas por departamentos territoriais.

Por isto, facendo uso das facultades que me confiren os artigos 38, 43.3 e 44 da Lei 1/1983, do 22 de febreiro, de normas reguladoras da Xunta e da súa Presidencia, do disposto na Lei 40/2015, do 1 de outubro, de réxime xurídico do sector público, e na Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e demais disposicións de xeral aplicación,

DISPOÑO:

Artigo único. Modificación da Orde do 21 de febreiro de 2022 sobre delegación de competencias en diversos órganos de dirección da Consellería do Mar e na Presidencia da entidade pública empresarial Portos de Galicia

A Orde do 21 de febreiro de 2022 sobre delegación de competencias en diversos órganos de dirección da Consellería do Mar e na Presidencia da entidade pública empresarial Portos de Galicia queda modificada como segue:

Un. Suprímese o artigo 8, que queda sen contido.

Dous. A letra d) do número 1.2 do artigo 10 queda redactada como segue:

«d) A autorización para o traslado de semente, de individuos adultos e desdobramento de moluscos bivalvos, cando o transporte se realice por vía terrestre e se desenvolva nun ámbito que exceda os límites dun departamento territorial, e cando se realice en embarcación entre distintas rías comprendidas en ámbitos territoriais correspondentes a máis dun departamento territorial, de acordo co establecido na Orde do 14 de marzo de 1997 que establece as condicións para o traslado de moluscos bivalvos entre viveiros situados en augas da Comunidade Autónoma de Galicia».

Tres. A letra c) do número 2.1 do artigo 10 queda redactada como segue:

«c) A autorización para o traslado de semente, de individuos adultos e desdobramento de moluscos bivalvos, cando se realice por vía terrestre dentro do seu ámbito territorial, e cando se realice en embarcación entre distintas rías pero sempre dentro do seu ámbito territorial, de acordo co establecido na Orde do 14 de marzo de 1997 que establece as condicións para o traslado de moluscos bivalvos entre viveiros situados en augas da Comunidade Autónoma de Galicia».

Catro. A disposición adicional única pasa a ser «Disposición adicional primeira».

Cinco. Engádese unha disposición adicional segunda coa seguinte redacción:

«Disposición adicional segunda. Referencias aos titulares das xefaturas territoriais

As referencias efectuadas nesta orde ás persoas titulares das xefaturas territoriais deben entenderse realizadas ás persoas titulares dos departamentos territoriais».

Disposición derradeira única. Entrada en vigor

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 14 de marzo de 2025

Alfonso Villares Bermúdez
Conselleiro do Mar