Visto o expediente para outorgamento da autorización administrativa previa e de construción para a instalación eléctrica que a continuación se describe:

Peticionaria: UFD Distribución Electricidad, S.A.

Domicilio social: avenida América, 38, 28028 Madrid.

Denominación: substitución CT Taboada dos Freires-27C064 (Taboada).

Situación: concello de Taboada.

Características técnicas principais:

• LMTA a 20 kV con orixe no apoio proxectado núm. 87-45 tipo C-16/2000 en substitución do actual apoio de formigón da LMTA CHA805 (expediente 3260 AT) e final no apoio proxectado núm. 87-45-1-CT tipo C-14/2000 no cal se soportara o novo CT, cunha lonxitude de 9 metros en condutor tipo LA-56.

• Substitución do apoio de formigón existente núm. 87-47 por un novo apoio de celosía tipo C-18/1000 e retirada do apoio de formigón existente núm. 87-46 tipo HV-13/250.

• CTI sobre apoio de celosía núm. 87-45-1-CT tipo C-14/2000, cunha potencia proxectada de 50 kVA, relación de transformación 20.000/400-230 V.

• Desmontaxe do CTC Taboada dos Freires 27C064 (expediente 225/2016 AT) e de 33 metros de condutor LA-56.

Finalidade da instalación: mellora da instalación.

Orzamento: 32.891,90 €.

Documentación que se xunta:

• Separata para o Concello de Taboada.

• Separata para a Confederación Hidrográfica do Miño-Sil.

Este departamento territorial, de acordo coas competencias que resultan do Decreto 140/2024, do 20 de maio, polo que se establece a estrutura orgánica da Consellería de Economía e Industria, e tendo en conta o Decreto 9/2017, do 12 de xaneiro, sobre órganos competentes para autorización de instalacións eléctricas na Comunidade Autónoma de Galicia,

RESOLVE:

En relación coa instalación de alta tensión, conceder a autorización administrativa previa e de construción ás ditas instalacións, sen prexuízo de terceiros e con independencia das autorizacións que sexan necesarias para a execución da obra por parte doutros órganos da Administración, condicionada ao cumprimento das seguintes condicións:

Primeira. As instalacións deberán axustarse na súa execución ao disposto no citado proxecto de execución, e a dirección de obra deberá levala a cabo un técnico competente.

Segunda. O peticionario asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade.

Terceira. En todo momento deberán cumprirse as normativas e directrices vixentes que sexan de aplicación, en particular canto establecen a Lei 24/2013, do 26 de decembro, do sector eléctrico, o Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias, e o Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias.

En relación coa instalación de baixa tensión, deberase seguir o disposto no artigo 18 do Real decreto 842/2002 para a súa posta en servizo, así como na súa instrución ITC-BT-04 e, no seu momento, deberase achegar a documentación exixida con carácter previo á posta en servizo da instalación, para a súa revisión por esta Administración e posterior inscrición da instalación no correspondente rexistro.

O prazo de posta en marcha das instalacións que se autorizan será de doce meses, contados a partir da data da última autorización administrativa necesaria para a súa execución.

Contra esta resolución poderase interpor recurso de alzada ante a conselleira de Economía e Industria no prazo dun mes, a partir do día seguinte ao da notificación ou publicación desta resolución; tamén se poderá interpor calquera outro recurso que se considere pertinente en dereito.

Lugo, 20 de marzo de 2025

Gustavo José Casasola de Cabo
Director territorial de Lugo