O branqueo de capitais a través de criptoactivos representa un desafío crecente no ámbito da seguridade, a xustiza e a economía. A natureza descentralizada e en moitos casos anónima das criptomonedas e as súas transaccións facilitan a ocultación da orixe ilícita de fondos e o seu posterior branqueo, permitindo ás persoas infractoras mover diñeiro de maneira máis eficiente e difícil de rastrexar en comparación cos métodos tradicionais. Este fenómeno complica as investigacións e require de novas estratexias e ferramentas especializadas.

O tráfico de drogas caracterízase pola xeración de elevados volumes de diñeiro ilícito que necesita ser introducido no circuíto legal, atopando a máxima opacidade nos denominados criptoactivos e a maior rapidez imaxinable nas transaccións vía internet e novas tecnoloxías.

A crecente importancia e complexidade do branqueo de capitais procedentes do narcotráfico a través de criptoactivos e o seu impacto potencial na seguridade, a economía e a xustiza, fan máis que necesaria a organización de xornadas especializadas que permitan coñecer esta problemática e as súas características, condicións necesarias para investigar, detectar e intervir eficazmente os complexos armazóns financeiros do crime organizado.Unha formación concreta que permita actualizar coñecementos, compartir experiencias e fortalecer as capacidades das forzas da orde e os profesionais da Administración de xustiza.

Dentro das actividades programadas para o ano 2025 no plan de formación aprobado polo seu consello reitor, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, en colaboración coa Fundación Galega Contra o Narcotráfico, anúnciase a convocatoria dunha xornada de narcotráfico, criptoactivos e branqueo de capitais, conforme as seguintes bases:

1. Datos da actividade.

Denominación: Xornada de narcotráfico, criptoactivos e branqueo de capitais.

Tipo: xornada.

Horas lectivas: 7.

Modalidade: presencial.

Obxectivo:

Así pois, o obxectivo principal da xornada é proporcionar aos participantes unha comprensión profunda das metodoloxías que utilizan as redes do crime organizado – en particular narcotráfico– para ocultar e branquear as súas ganancias a través de criptoactivos e as estratexias especializadas para a súa detección e intervención.

Contidos:

– Narcotráfico: métodos de financiamento e branqueo de capitais.

– Blockhain, criptoactivos e criptomonedas.

– Criptoactivos e branqueo de capitais do narcotráfico.

– Marco legal: lexislación europea e española.

– Estratexias, ferramentas e técnicas de investigación.

– Casos reais e mesa redonda de debate.

2. Persoal destinatario.

Persoal das forzas e corpos de seguridade pública, vixilancia aduaneira, Axencia Tributaria e persoal da Administración de xustiza.

3. Número de prazas por edición.

80 prazas.

4. Prazo de inscrición.

O prazo de inscrición e presentación de solicitudes de participación comezará o día seguinte ao da publicación desta resolución no DOG e rematará o día 9 de xuño de 2025 ás 14.00 horas.

A listaxe de persoas seleccionadas seralle comunicada a través do espazo web persoal da http://agasp.xunta.gal ao persoal admitido para a súa realización.

5. Desenvolvemento da actividade.

Lugar: Academia Galega de Seguridade Pública.

Data: 12 de xuño de 2025.

Horario lectivo: das 9.30 ás 14.30 horas e das 16.00 ás 18.00 horas.

6. Modificacións e incidencias.

A Academia Galega de Seguridade Pública poderá modificar o desenvolvemento normal da actividade para adaptala ás necesidades da Administración e ás continxencias que poidan xurdir.

A Estrada, 10 de maio de 2025

Santiago Villanueva Álvarez
Director xeral da Academia Galega de Seguridade Pública