O Xurado Provincial de Clasificación de Montes Veciñais en Man Común de Pontevedra acordou, na súa reunión do 26.3.2025, aceptar a revisión parcial do esbozo e a cartografía actualizada do monte San Cibrao de Ribarteme, realizada polo Servizo de Montes de Pontevedra con base nos seguintes feitos e consideracións técnicas.

Antecedentes e consideracións técnicas.

Primeiro. O 19.9.2022 a CMVMC de San Cibrao de Ribarteme (As Neves) solicitou a revisión do esbozo do MVMC San Cibrao de Ribarteme (ID 2921). Por ese motivo, en aplicación da DT 13ª da Lei de montes de Galicia, o 30.11.2022 o Xurado acordou solicitarlle ao Servizo de Montes unha proposta coa revisión do esbozo e a elaboración da cartografía actualizada do monte veciñal citado, o que deu lugar ao expediente RE22027 no Servizo de Montes de Pontevedra.

Segundo. Tras a análise da documentación achegada coa solicitude, o Servizo de Montes emitiu un informe o 7.6.2024 en que expón que:

– O monte veciñal de San Cibrao de Ribarteme foi clasificado polo Xurado de MVMC de Pontevedra o 26.5.1982 cunha superficie inicial de 442,90 ha.

– O límite do monte definiuse partindo dos planos de deslindamento do monte de utilidade pública Coto Branco, identificado co número 324, o Catastro de rústica de 1956 e o Catastro actual.

– Levouse a cabo un levantamento topográfico das parcelas con GPS de precisión centimétrica; percorreuse todo o perímetro con varios membros da Xunta Reitora da comunidade de montes e identificáronse muros e marcos de separación doutras propiedades particulares e de montes veciñais lindeiros.

– Dentro do monte veciñal existen varios enclavados de propiedade particular que, en conxunto, suman 93,53 ha: enclavado Formiguiña-Riboura-Aciveiros, enclavado Cacholas, enclavado Cavada de Alvariño 2, enclavado Cachadiña, enclavado Espiñeiro, enclavado Chan da Folga.

– O linde proposto entre a CMVMC de San Xosé de Ribarteme e a CMVMC de Cerdeira respecta a liña de deslinde establecida polas ditas comunidades nos expedientes administrativos PO-DESC-04-15 e PO-DESC-04/16.

– O linde sur proposto coa CMVMC de Vide evita unha superficie en litixio dunha superficie aproximada de 2,88 ha. A proposta achegada pola CMVMC de San Cibrao de Ribarteme é coherente coa revisión do esbozo presentado pola CMVMC de Vide (expediente RE22028).

– O linde leste proposto coa CMVMC de Cabeiras axústase ao seu esbozo revisado (expediente RE22065).

– O linde leste proposto coa CMVMC de Sela non queda suficientemente xustificado, polo que non se acepta nesta revisión de esbozo.

– Consta un contrato de xestión coa Consellería do Medio Rural (identificado como 3615658) de 142,84 ha e un documento de ordenación forestal inscrito no Rexistro de Montes Ordenados de Galicia co número 360294 e vixente ata 2031.

– Non constan actos de disposición que modifiquen a superficie do monte veciñal, polo que a superficie proposta é de 440,18 ha e o perímetro, de 27,04 km. Non se modifica a descrición dos límites da resolución de clasificación.

Terceiro. O procedemento de revisión de esbozos de MVMC vén regulado na DT 13ª da Lei 7/2012, do 28 de xuño, de montes de Galicia.

Á vista do exposto, este xurado

ACORDA:

Aceptar a revisión parcial (exceptúase o linde leste proposto coa CMVMC de Sela) do esbozo do monte San Cibrao de Ribarteme, segundo a proposta e planimetría elaboradas polo Servizo de Montes.

Tal e como exixe o parágrafo 3 da DT 13ª da LMG, a presente aceptación da revisión de esbozo será posta en coñecemento da comunidade de montes propietaria e publicada no DOG para coñecemento do resto de posibles persoas interesadas.

Pontevedra, 5 de maio de 2025

Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra