Antecedentes:

Primeiro. A Secretaría Xeral para o Deporte recibiu escrito o 6 de febreiro de 2025, por parte da Asociación Española de Cróquet, xunto con diversa documentación, onde solicitaba o recoñecemento en Galicia do cróquet como modalidade deportiva.

Segundo. A Xefatura do Servizo Xurídico solicitou informe á Subdirección Xeral de Plans e Programas o 20 de febreiro de 2025. En virtude do artigo 17 da Lei 3/2012, do 2 de abril, do deporte de Galicia, correspóndelle á Administración autonómica recoñecer as modalidades e as especialidades deportivas, polo que se solicita a esa subdirección un informe técnico sobre o recoñecemento da modalidade solicitada, así como, de ser o caso, a documentación adicional que sexa preciso requirir. En especial, solicítase informe sobre o seu recoñecemento ou existencia no ámbito internacional e estatal, a súa relevancia e especificidade, a práctica autóctona, o número de practicantes e a estrutura asociativa que a avale na Comunidade Autónoma de Galicia.

Esa solicitude suspendeu a tramitación do procedemento, segundo o establecido no artigo 22 da Lei 39/2015, do 1 de outubro, do procedemento administrativo común das administracións públicas, nos termos alí previstos, suspensión comunicada ao interesado o 20 de febreiro de 2025.

Terceiro. O 1 de abril de 2025, a Subdirección Xeral de Plans e Programas emite informe proposta de recoñecemento do cróquet como modalidade deportiva en Galicia

Cuarto. O 3 de xuño de 2025, o secretario xeral para o Deporte, á vista do antedito informe, que conclúe que a solicitude cumpre cos requisitos exixidos pola lei, propón o recoñecemento oficial da modalidade deportiva solicitada.

Consideracións legais e técnicas:

Primeira. O artigo 5.1 da Lei 3/2012, do 2 de abril, do deporte de Galicia, establece que corresponde á Administración autonómica o exercicio da seguinte competencia:

«k) Recoñecer e cualificar novas modalidades e especialidades deportivas, así como establecer os criterios e requisitos para o seu recoñecemento».

Segunda. O artigo 17 da Lei 3/2012 define unha modalidade deportiva como o conxunto de prácticas e regras que conforman unha forma peculiar de práctica deportiva con carácter autónomo e diferenciado de calquera outra. A determinación dunha modalidade deportiva farase sobre a base das técnicas utilizadas para o exercicio, a destreza necesaria, a diferenciación con outras modalidades, a implantación e o nivel de práctica.

Para o recoñecemento dunha modalidade deportiva terase en conta, entre outros factores, o seu recoñecemento ou a existencia desta no ámbito internacional, estatal e autonómico, a súa relevancia e especificidade, a práctica autóctona, o número de practicantes e a estrutura asociativa que a avale.

Terceira. No antedito informe da Subdirección Xeral de Plans e Programas da Secretaría Xeral para o Deporte determínase que o cróquet reúne os requisitos para propoñer o seu recoñecemento como modalidade.

Cuarta. Segundo establece o artigo 1 do Decreto 136/2024, do 20 de maio (DOG núm. 101, do 27 de maio), a Consellería de Presidencia, Xustiza e Deportes é o órgano superior da Administración xeral da Comunidade Autónoma de Galicia ao cal lle corresponde a elaboración, proposta e execución da política do Goberno galego en materia de deportes.

En virtude do anterior, e de acordo coa proposta de resolución do secretario xeral para o Deporte,

DISPOÑO:

Primeiro. Recoñecer o cróquet como modalidade deportiva en Galicia.

Segundo. Ordenar a publicación desta orde no Diario Oficial de Galicia para xeral coñecemento de todos os interesados.

Contra esta orde, que esgota a vía administrativa, as persoas interesadas poderán formular recurso potestativo de reposición ante a persoa titular da Consellería de Presidencia, Xustiza e Deportes, no prazo dun mes, contado a partir do día seguinte ao da súa publicación no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben, directamente, recurso contencioso-administrativo no prazo de dous meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 9 de xuño de 2025

Diego Calvo Pouso
Conselleiro de Presidencia, Xustiza e Deportes