O Xurado Provincial de Clasificación de Montes Veciñais en Man Común de Pontevedra resolveu na súa reunión do 26.3.2025 aprobar o deslindamento parcial entre as comunidades de montes veciñais en man común (en diante, CMVMC) de Canicouva e Marcón (Pontevedra), con base nos seguintes feitos e consideracións técnicas.

Antecedentes e consideracións técnicas:

Primeiro. O 30.9.2022, o presidente da CMVMC de Canicouva presenta solicitude de deslindamento entre a CMVMC de Canicouva e a CMVMC de Marcón, ambas no concello de Pontevedra.

Os montes veciñais en man común (en diante, MVMC) afectados por este deslindamento son:

– MVMC de Pedra Miranda e Saramagoso (ID: 2950) da CMVMC de Canicouva.

– MVMC de Loureda, Pazos, Costa de Barcia, Monte de Carrasco, Beleitar e Portela (ID: 2952) da CMVMC de Marcón.

Segundo. Consta no expediente a seguinte documentación do deslindamento consonte o artigo 53 da Lei 7/2012, do 28 de xuño, de montes de Galicia (LMG):

– Acta do apeo do deslindamento do 28.9.2022.

– X53 Conciliación núm. 0000419/2023 entre as comunidades no Xulgado de Primeira Instancia nº 1 de Pontevedra do 29.5.2023.

– Certificado do 10.4.2024 do secretario da CMVMC de Canicouva coa conformidade do presidente da aprobación na asemblea xeral do 20.8.2022.

– Certificado do 29.5.2023 do secretario da CMVMC de Marcón coa conformidade do presidente da aprobación na asemblea xeral do 26.3.2023.

– Memoria descritiva co plano de deslindamento e cartografía en formato dixital no datum ETRS89/UTM zona 29N EPSG: 25829. Asinado o 17.3.2023 pola enxeñeira técnica forestal colexiada núm. 740 do COETF de Galicia. A emenda posterior produce a súa modificación.

– Informes de validación gráfica catastral con CSV: 41Q4CBBSM3EPN317 (inclúe os deslindamentos DC22109, DC22110, DC22115, DC22108, DC22085, DC22086).

Terceiro. A liña de deslindamento proposta ten unha lonxitude de 498 metros e está composta polos seguintes puntos:

Punto P01 – x: 533.331,74 y: 4.693.610,4

Punto P02 – x: 533.140,81 y: 4.693.655,79

Punto P03 – x: 533.052,39 y: 4.693.571,1

Punto P04 – x: 532.922,9 y: 4.693.447,08

Revisada a cartografía das resolucións de clasificación de ambos MVMC detéctase que existe colindancia entre ambos e considérase que o deslindamento non afecta a terceiros propietarios.

O deslindamento entre ambos montes veciñais está formado por un único tramo.

O punto P01 é coincidente co punto P01 do expediente DC22110 (deslindamento entre a CMVMC de Canicouva e a CMVMC de Reigosa). No dito punto converxen a CMVMC de Canicouva, a CMVMC de Reigosa e a CMVMC de Marcón e o punto P04 é coincidente co punto P03 do expediente DC22108 (deslindamento entre a CMVMC de Canicouva e a CMVMC de Tomeza).

A liña do deslindamento produce modificacións na cartografía dos esbozos de clasificación das seguintes comunidades:

– CMVMC de Canicouva: presenta un axuste no punto P01 coincidente co deslindamento DC22110 e un axuste desde o punto P04 coincidente co deslindamento DC22108.

– CMVMC de Marcón: presenta un axuste para pechar o punto P01 e o punto P04 co resto do esbozo existente (non se acepta a invasión do esbozo da CMVMC de Reigosa).

O Servizo de Montes considera que a solicitude se axusta ao establecido no artigo 53 da LMG, polo que propón a aprobación polo Xurado do deslindamento segundo a liña presentada.

Cuarto. O artigo 53 da LMG establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

Á vista do exposto, este xurado

RESOLVE:

Aprobar o deslindamento parcial entre a CMVMC de Canicouva e a CMVMC de Marcón, ambas no concello de Pontevedra, nos termos antes indicados.

Contra esta resolución, que pon fin á vía administrativa, poderase interpoñer recurso de reposición ante o Xurado Provincial de Clasificación de MVMC de Pontevedra no prazo dun mes de acordo co disposto no artigo 123 e 124 LPAC; ou ben interpoñer directamente recurso contencioso-administrativo ante o Xulgado do Contencioso-Administrativo no prazo de dous meses de acordo co artigo 8 e 46 da LXCA.

Pontevedra, 28 de maio de 2025

Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra