A Lei 6/2003, do 9 de decembro, establece o réxime xurídico das taxas, prezos e exaccións reguladoras da Comunidade Autónoma de Galicia. Son taxas da Comunidade Autónoma de Galicia os tributos creados por lei ou transferidos polas súas corporacións locais ou polo Estado no marco da transferencia de servizos e competencias a esta, das cales o seu feito impoñible consiste na utilización privativa, a ocupación ou o aproveitamento especial do dominio público da Comunidade Autónoma de Galicia ou na entrega de bens, a prestación de servizos ou a realización de actividades en réxime de dereito público por parte dos suxeitos activos aos cales se refire o artigo 3 desta lei, que se refiran, afecten ou beneficien de modo particular o suxeito pasivo, sempre que se produza calquera das circunstancias seguintes:

1ª. Que a entrega de bens, a prestación de servizos ou a realización de actividades non sexan de solicitude voluntaria para os administrados. Para estes efectos non se considerará voluntaria a solicitude por parte dos administrados: cando veña imposta por disposicións legais ou regulamentarias, ou cando os bens, os servizos ou as actividades requiridos sexan imprescindibles para a vida privada ou social do solicitante.

2ª. Que non se entreguen, presten ou realicen polo sector privado, estea ou non establecida a súa reserva a favor do sector público consonte a normativa vixente.

A Orde do 30 de xuño de 1992, pola que se aproba o modelo de autoliquidación das taxas da Comunidade Autónoma de Galicia e se establece a utilización de efectos timbrados para o pagamento das taxas por servizos administrativos de compulsa de documentos e de verificación de poderes e documentos acreditativos de lexitimación, regula no artigo 2 o prazo de ingreso e no número 1 establece que os suxeitos pasivos das taxas obrigados a formular autoliquidación, deberán, con carácter xeral, ingresar o importe da débeda tributaria autoliquidada no prazo dos tres días hábiles contados desde o seguinte á súa devindicación. O artigo 4 desta orde regula o prazo de presentación da autoliquidación, así o suxeito pasivo, con carácter xeral, unha vez ingresada a débeda tributaria correspondente e con anterioridade á prestación do servizo solicitado, deberá presentarlle ao servizo xestor o exemplar para a Administración, dentro dos dez días seguintes á terminación de cada un dos prazos de ingreso nos supostos a que se refire o artigo 2.1.

Os incendios forestais producidos no territorio galego determinan unha situación de emerxencia humanitaria e social para a cidadanía afectada, debido aos danos persoais e materiais que se produciron, que pode provocar a necesidade de que teñan que solicitar a entrega de bens, a realización de actividades ou a prestación de servizos da Administración que dean lugar ao pagamento de taxas. Para facilitar a tramitación destes procedementos, adóptanse a través desta orde medidas de carácter excepcional en relación cos prazos de ingreso da débeda tributaria. Así, os prazos de ingreso das taxas da Comunidade Autónoma de Galicia derivadas de procedementos solicitados como consecuencia dos incendios producidos en Galicia a partir do 28 de xullo de 2025 que provocaron a activación do Peifoga en situación 2, de acordo cos datos facilitados pola Axega, e nos cales o pagamento da taxa sexa previo á prestación do servizo, amplíanse ata o 5 de xaneiro de 2026. Beneficiaranse desta ampliación de prazos os obrigados tributarios que teñan o seu domicilio fiscal nos concellos afectados polos referidos incendios, así como aqueles obrigados tributarios que, sen ter domicilio fiscal nos concellos afectados, tivesen establecementos comerciais, industriais, turísticos e/ou mercantís ou instalacións e/ou explotacións forestais, agrícolas ou gandeiras radicados neles.

En consecuencia, de acordo coa competencia establecida no artigo 34.6 da Lei 1/1983, do 22 de febreiro, de normas reguladoras da Xunta e da súa Presidencia,

ACORDO:

Un. Medidas excepcionais e temporais en relación cos prazos de ingreso das taxas da Comunidade Autónoma de Galicia

1. O prazo para o pagamento das taxas establecido no artigo 2 da Orde do 30 de xuño de 1992, pola que se aproba o modelo de autoliquidación das taxas da Comunidade Autónoma de Galicia e se establece a utilización de efectos timbrados para o pagamento das taxas por servizos administrativos de compulsa de documentos e de verificación de poderes e documentos acreditativos de lexitimación, amplíase ata o 5 de xaneiro de 2026 nos supostos de feito a que se refire o número 2 para as persoas ás cales se refire o número 3.

2. Esta ampliación do prazo será aplicable ás taxas devindicadas polos supostos de feito que se realicen como consecuencia dos incendios producidos en Galicia a partir do 28 de xullo de 2025 que provocaron a activación do Peifoga en situación 2, de acordo cos datos facilitados pola Axega, e nos cales o pagamento da taxa sexa previo á entrega do ben, á realización da actividade ou á prestación do servizo da Administración gravado pola taxa.

3. Poderán ampliar o prazo de ingreso os obrigados tributarios que teñan o seu domicilio fiscal nos concellos afectados polos referidos incendios, así como aqueles obrigados tributarios que, sen ter domicilio fiscal nos concellos afectados, teñan establecementos comerciais, industriais, turísticos e/ou mercantís ou instalacións e/ou explotacións forestais, agrícolas ou gandeiras radicados neles.

4. Os obrigados tributarios previstos no número 3 que soliciten a entrega do ben, a realización da actividade ou a prestación do servizo que dea lugar ao pagamento dunha taxa da Comunidade Autónoma de Galicia, deberán presentar a autoliquidación nos prazos establecidos no artigo 4 da Orde do 30 de xuño de 1992 mediante o modelo aprobado no anexo I desta orde, indicarán que están afectados polos incendios previstos no número 2 e domiciliarán o pagamento do importe correspondente. Este modelo estará dispoñible na Oficina Virtual Tributaria (OVT) da Atriga para a súa descarga.

5. O órgano xestor da taxa, con carácter previo á entrega do ben, á realización da actividade ou á prestación do servizo, deberá comprobar que se cumpren os requisitos necesarios para a ampliación do prazo de ingreso. Se non se cumprisen estes requisitos, o prazo de ingreso da taxa será o establecido no artigo 2 da Orde do 30 de xuño de 1992 e non terá efectos a domiciliación do ingreso coas consecuencias derivadas da normativa vixente.

Dous. Eficacia

Esta orde produce efectos desde o mesmo día da súa publicación no Diario Oficial de Galicia.

Santiago de Compostela, 19 de setembro de 2025

Miguel Corgos López-Prado
Conselleiro de Facenda e Administración Pública