Mediante a Resolución do 20 de novembro de 2024, conxunta da Axencia Galega de Innovación e do Instituto Galego de Promoción Económica, adxudicáronse as axudas da Resolución do 18 de xaneiro de 2024 pola que se establecen as bases reguladoras para a concesión, en réxime de concorrencia competitiva, das axudas destinadas a apoiar as misións de especialización intelixente de Galicia, no marco da Estratexia de especialización intelixente de Galicia RIS3 2021-2027, e se procede á súa convocatoria para o ano 2024 (DOG número 230, do 28 de novembro).
Tal como consta no anexo II desa resolución, a solicitude presentada por Maquinaria Agrícola Cancela, S.L.U. para o proxecto con código de expediente IN856C 2024/10 e acrónimo H2RCV foi desestimada por non acadar os 60 puntos que exixe o artigo 29.2 das bases reguladoras da axuda. No anexo III desa resolución consta que a solicitude de Aptadegrad, S.L. para o proxecto con código e expediente IN856C 2024/08 e acrónimo Lyctus foi inadmitida por non cumprir as porcentaxes de participación dos proxectos, isto é, que ningún membro do consorcio pode contar cun orzamento individual inferior ao 10 % do custo total subvencionable, tal como establece o artigo 3.2 das bases reguladoras da axuda.
Contra a Resolución do 20 de novembro de 2024, conxunta da Axencia Galega de Innovación e do Instituto Galego de Promoción Económica, as entidades Maquinaria Agrícola Cancela, S.L., líder do proxecto H2RCV e Aptadegrad, S.L., líder do proxecto Lyctus, presentaron un recurso de alzada. Estes recursos foron presentados dentro do prazo concedido e cumpren todos os requisitos do artigo 115 da Lei 39/2015, do 1 de outubro, do procedemento administrativo común das administracións públicas, para a súa tramitación como recurso de alzada.
Mediante a Resolución do 5 de maio de 2025 das persoas titulares das presidencias da Axencia Galega de Innovación e do Instituto Galego de Promoción Económica, á vista do acordado na Comisión de Selección realizada o 24 de abril de 2025, foron estimados os mencionados recursos de alzada e retrotraéronse as actuacións.
Conforme o establecido na convocatoria, os xestores técnicos da Axencia Galega de Innovación e do Instituto Galego de Promoción Económica avaliaron os proxectos, atendendo aos criterios e ao procedemento establecidos nos artigos 28 e 29 das bases reguladoras da axuda.
Consonte o artigo 27 das bases reguladoras da axuda, a Comisión de Selección é o órgano colexiado encargado de seleccionar as solicitudes, de acordo coa avaliación realizada.
A Comisión de Selección, reunida o día 28 de maio de 2025, vistas as avaliacións dos xestores técnicos e dado que as solicitudes de axuda cumpren as condicións administrativas e técnicas para adquirir a condición de beneficiario, acordou propor para a concesión da axuda o proxecto titulado Plataforma robotizada de trituración baseada en H2 verde, con acrónimo H2RCV e código de procedemento IN856C 2024/10, e o proxecto titulado Desenvolvemento de degradadores de proteínas en enfermidades neurolóxicas, con acrónimo Lyctus e código de procedemento IN856C 2024/08.
A competencia para resolver estas axudas correspóndelle conxuntamente á persoa titular da Dirección da Axencia Galega de Innovación e á persoa titular do Instituto Galego de Promoción Económica, segundo o establecido no artigo 31.1 das bases reguladoras da axuda.
Unha vez realizada a instrución do procedemento, á vista dos acordos recollidos na acta da Comisión de Selección realizada o 28 de maio de 2025 e da proposta do director da Área de Xestión da Axencia Galega de Innovación e do director da Área de Competitividade do Instituto Galego de Promoción Económica,
RESOLVO:
Primeiro. Conceder as axudas aos proxectos que figuran como anexo I desta resolución con cargo ás aplicacións orzamentarias 07.A2.561A.743.28, 07.A2.561A.770.0 e 05.A1.741A.770.0.
As axudas desta convocatoria están cofinanciadas pola Unión Europea ao abeiro do programa Galicia Feder 2021-2027, obxectivo político OP1. Unha Europa máis competitiva e intelixente, promovendo unha transformación económica innovadora e intelixente e unha conectividade rexional ás tecnoloxías da información e da comunicación, nas seguintes prioridades, obxectivos específicos e liñas de actuación:
• Prioridade 1. A transición dixital e intelixente; obxectivo específico: RSO 1.1. Desenvolver e mellorar as capacidades de investigación e innovación e asimilar tecnoloxías avanzadas; liña de actuación L.A.1.1.02. Apoio para impulsar a definición e implantación de proxectos transformadores e de impacto en cadeas de valor estratéxicas no marco da S3 (misións) mediante a colaboración e transferencia entre os diferentes axentes do Sistema rexional de innovación.
• Prioridade 1. A transición dixital e intelixente; obxectivo específico: RSO 1.3. Reforzar o crecemento sostible e a competitividade das pemes e a creación de postos de traballo nestas empresas, tamén mediante investimentos produtivos; liña de actuación L.A.1.3.01. Apoio financeiro a proxectos de investimento empresarial, para promover o crecemento sostible, a competitividade e a creación e mantemento do emprego.
Respecto aos tipos de intervención, nestas liñas prevense os seguintes:
• 028. Transferencia de tecnoloxía e cooperación entre empresas, centros de investigación e o sector do ensino superior.
• 021. Desenvolvemento empresarial e internacionalización das pemes, incluído o investimento produtivo.
Segundo. Imputar as axudas propostas ás aplicacións orzamentarias 07.A2.561A.743.28, 07.A2.561A.770.0 e 05.A1.741A.770.0 nas cales existe crédito adecuado e suficiente nos orzamentos da Comunidade Autónoma de Galicia para o ano 2025.
Contra esta resolución, que non pon fin á vía administrativa, as persoas interesadas poderán interpor un recurso de alzada ante a persoa titular da Presidencia da Axencia Galega de Innovación e/ou, de ser o caso, ante a persoa titular da Presidencia do Instituto Galego de Promoción Económica no prazo dun mes, que comeza a contar a partir do día seguinte a que se publique esta resolución no Diario Oficial de Galicia.
Santiago de Compostela, 6 de outubro de 2025
|
Carmen Cotelo Queijo Directora da Axencia |
Covadonga Toca Carús Directora do Instituto Galego |