Unha vez examinado o expediente de solicitude de clasificación da Fundación Serge+ con domicilio na rúa Río Neira, número 16, na Pobra de San Xiao (Láncara-Lugo), resultan os seguintes feitos e consideracións legais.

Feitos:

1. O 23 de maio de 2025, Óscar Neira Fernández, tesoureiro do padroado da Fundación, presentou a solicitude de clasificación, a declaración de interese galego e a súa correspondente inscrición no Rexistro de Fundacións de Interese Galego.

2. A Fundación Serge+ constituíuna a entidade Serge Lucense, S.A., representada por Óscar Neira Fernández, mediante escritura pública outorgada o 30 de xaneiro de 2025, ante o notario de Lugo Manuel Ignacio Castro-Gil Iglesias, co número de protocolo 423.

Tras o requirimento do 25 de xuño de 2025, a Fundación achega outra escritura outorgada o 14 de agosto de 2025, ante o mesmo notario, co número de protocolo 3.591, que emenda a de constitución consonte o indicado no citado requirimento.

3. A Fundación, consonte o artigo 6 dos seus estatutos, ten por obxecto: «desenvolver, promover e impulsar:

– O desenvolvemento integral das persoas maiores e en situación de dependencia que presenten déficits físicos, sensoriais, psíquicos ou de calquera outra natureza.

– A evolución do colectivo social de persoas maiores e en situación de dependencia a superiores cotas de protagonismo e intervención no devir da sociedade civil.

– O desenvolvemento de relacións de cooperación con todo tipo de entidades públicas administrativas estatais, autonómicas e provinciais españolas e entidades internacionais.

– Intervir e asesorar ante administracións públicas e entidades privadas sobre o desenvolvemento e a sustentabilidade do gasto social.

– Incentivar a presenza de persoas maiores e en situación de dependencia en actividades produtivas, culturais, sociais e en cantas iniciativas de calquera tipo que promovan o protagonismo social do colectivo.

– A promoción de todo tipo de servizos e produtos dirixidos á mellora da calidade de vida das persoas maiores e en situación de dependencia, sensibilizando a sociedade sobre a relevancia dos apoios e aos coidados.

– Investigación e desenvolvemento de todo tipo de proxectos tecnolóxicos e de intelixencia artificial. Participar en todo tipo de investigacións para a promoción do envellecemento activo e saudable.

– Asesorar a todo tipo de administracións públicas na elaboración de normas con rango legal e regulamentario en beneficio do colectivo.

– Formación en todo tipo de nivel académico. Actuar como observatorio dos importantes cambios socioeconómicos que afectan o sector, co obxecto de analizar con rigor e obxectividade este amplo, novo e florecente sector, tratando de achegar a visión prospectiva de expertos e institucións e empresas que participen na Fundación.

– Promover valores de igualdade, tolerancia, non discriminación e respecto á integridade das persoas maiores e en situación de dependencia.

– Xestión de centros sociosanitarios e sanitarios. Neste sentido, acudir a todo tipo de concursos públicos e privados. E/ou asumindo contratación directa con entidades públicas e privadas».

4. O padroado inicial da Fundación está formado por Carlos Dosil Díaz, como presidente; a entidade Caligers, S.L., representada por Miguel Ángel Vázquez Vázquez, como vicepresidenta; Óscar Neira Fernández, como tesoureiro; e José María Álvarez Vilabrille, Agustín Dosil Maceiras e Ramiro Neira Ramos, como vogais (todos eles na súa condición de membros do Consello de Administración da entidade Serge Lucense, S.A.).

Juan Carlos Rodríguez Maseda actúa como secretario alleo ao padroado.

5. A Comisión integrada polos secretarios xerais de todas as consellerías eleva ao conselleiro de Presidencia, Xustiza e Deportes a proposta de clasificación como de interese social da Fundación Serge+, con base nas materias que constitúen o seu obxecto fundacional.

6. Na escritura de constitución consta a identidade dos fundadores, a dotación inicial, os estatutos e a identificación dos membros do padroado.

7. De conformidade co artigo 51 do Decreto 14/2009, do 21 de xaneiro, polo que se aproba o Regulamento de fundacións de interese galego, e segundo proposta da Comisión de Secretarios Xerais, procede a súa clasificación como de interese social e a súa adscrición á Consellería de Política Social e Igualdade.

Consideracións legais:

1. O artigo 34 da Constitución española recoñece o dereito de fundación para fins de interese xeral de acordo coa lei, e o artigo 27.26 do Estatuto de autonomía de Galicia establece competencia exclusiva sobre o réxime das fundacións de interese galego.

2. A escritura de constitución da Fundación contén os datos exixidos na Lei 12/2006, do 1 de decembro, de fundacións de interese galego.

3. Consonte o artigo 7 do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, correspóndelle a esta Consellería de Presidencia, Xustiza e Deportes, a clasificación da Fundación e a adscrición á consellería correspondente, que exercerá as funcións de protectorado.

De conformidade co exposto, e considerando que se cumpren as condicións establecidas pola normativa vixente en materia de fundacións de interese galego, de acordo coa proposta realizada pola Comisión de Secretarios Xerais na súa reunión do día 14 de outubro de 2025,

DISPOÑO:

Clasificar de interese social a Fundación Serge+, adscribíndoa ao protectorado da Consellería de Política Social e Igualdade.

Contra esta orde, que pon fin á vía administrativa, pode interpoñerse, no prazo de dous meses, recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, consonte o artigo 46.1 da Lei 29/1998, do 13 de xullo, reguladora da xurisdición contencioso-administrativa; podéndose interpoñer no prazo dun mes, previamente e con carácter potestativo, recurso de reposición ante o mesmo órgano que ditou o acto, de conformidade co artigo 124 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 31 de outubro de 2025

Diego Calvo Pouso
Conselleiro de Presidencia, Xustiza e Deportes