A Lei 2/2016, do 10 de febreiro, do solo de Galicia, establece no seu artigo 11.1 que o Xurado de Expropiación de Galicia é un órgano colexiado permanente da Comunidade Autónoma de Galicia especializado nos procedementos para a fixación do prezo xusto na expropiación forzosa, cando a Administración expropiante é a Comunidade Autónoma ou as entidades locais do seu ámbito territorial.

A organización, funcionamento e réxime interior do Xurado de Expropiación regúlase no Decreto 172/2018, do 20 de decembro, polo que se aproba o Regulamento de organización e réxime de funcionamento do Xurado de Expropiación de Galicia.

De conformidade co artigo 5 do Decreto 172/2018, o Pleno do Xurado de Expropiación de Galicia está composto por: a) Presidencia, b) Vogalías e c) Secretaría.

Das catorce vogalías que o compoñen, sete están reservadas polo artigo 7.1.f) a profesionais libres colexiados con acreditada competencia nas materias propias das competencias do Xurado, nomeados por orde da consellería de adscrición, por proposta dos presidentes dos colexios profesionais de Galicia a que pertenzan. As persoas titulares das vogalías serán substituídas nos casos de vacante, ausencia ou enfermidade polos suplentes designados no momento do seu nomeamento.

Polo que respecta á duración do nomeamento, o artigo 11 do Decreto 172/2018 prevé que estas vogalías serán designadas por un período de catro anos. Rematado este período, continuarán no exercicio das súas funcións ata o nomeamento dos novos membros. As persoas titulares das vogalías poderán ser substituídas por proposta das organizacións que as propuxesen, e as persoas así nomeadas permanecerán no seu cargo, como máximo, polo tempo que lle falte á substituída para o cumprimento do mandato.

Entre os sete colexios profesionais representados no Xurado atópase o Colexio de Enxeñeiros de Camiños, Canais e Portos. O nomeamento vixente de titular e suplente realizouse en virtude da Orde do 6 de xullo de 2021 (DOG núm. 137, do 20 de xullo).

Esgotada a vixencia do seu mandato e realizada a oportuna solicitude, o Colexio de Enxeñeiros de Camiños, Canais e Portos achegou a proposta de nomeamento do vogal titular e do vogal suplente.

En consecuencia, en virtude da competencia que me atribúe o artigo 7.1.f) do Decreto 172/2018, do 20 de decembro, polo que se aproba o Regulamento de organización e réxime de funcionamento do Xurado de Expropiación de Galicia,

RESOLVO:

Primeiro. O nomeamento das persoas que se relacionan no anexo como vogais do Xurado de Expropiación de Galicia.

Segundo. O nomeamento producirá efectos desde o día seguinte ao da publicación no Diario Oficial de Galicia.

Santiago de Compostela, 18 de novembro de 2025

María Martínez Allegue
Conselleira de Vivenda e Planificación de Infraestruturas

ANEXO

Vogais do Xurado de Expropiación de Galicia segundo o disposto
no artigo 7.1.f) do Decreto 172/2018, do 20 de decembro

1. En representación do Colexio de Enxeñeiros de Camiños, Canais e Portos de Galicia:

Titular: Francisco Alonso Fernández.

Suplente: Juan José Vázquez Cerreda.