Correspóndelle ao Instituto Galego da Vivenda e Solo (en diante, IGVS) a realización da política de vivenda e solo da Xunta de Galicia, co fin de garantir os dereitos constitucionais a unha vivenda digna e adecuada, especialmente para os sectores con menos capacidade económica, e a unha utilización do solo de acordo co interese xeral, erradicando a especulación e actuando como elemento de regulación do mercado inmobiliario e de mellora da calidade ambiental, de acordo co establecido na Lei 3/1988, do 27 de abril, da súa creación.

Entre os obxectivos deste organismo, conforme a citada lei, cómpre salientar a elaboración, promoción e xestión de plans e programas en materia de vivenda e solo, o fomento da construción de vivendas de protección oficial, así como da rehabilitación e construción de todo tipo de vivendas, e o impulso do réxime de alugamento.

En virtude do anterior, o IGVS quere aumentar a oferta de vivenda a prezo accesible mediante a adquisición de locais destinados a un uso terciario para os cales non existe demanda de arrendamento ou están infrautilizados pero que, mediante un cambio de uso e dada a súa localización, poden ser acondicionados para vivenda de promoción pública destinada a alugamento. Esta actuación permitiría non só aumentar o parque público autonómico de vivendas, senón tamén revitalizar áreas urbanas que viron diminuída a súa actividade comercial e, en definitiva, contribuír ao seu impulso social e económico e á sustentabilidade urbana.

Esta oferta pública de adquisición de locais refírese exclusivamente ao concello de Ourense porque, na actualidade, o IGVS non dispón neste concello de solo de titularidade municipal destinado á construción de vivendas sometidas a algún réxime de protección pública, sen prexuízo da súa extensión posterior a outros concellos galegos.

Para os efectos indicados, o IGVS acorda facer unha oferta pública de adquisición de locais, mediante compra, de conformidade cos criterios establecidos nesta resolución.

A persoa titular da Dirección Xeral do IGVS é o órgano competente para adoptar a presente resolución, en virtude das competencias conferidas polo artigo 12.2.k) do Decreto 143/2024, do 20 de maio, polo que se establece a estrutura orgánica do citado organismo.

De conformidade co exposto,

RESOLVO:

Realizar unha oferta pública de adquisición, mediante compra, de locais situados no concello de Ourense, para a súa transformación en vivendas de promoción pública con destino ao arrendamento.

A dita oferta realizarase nos seguintes termos:

Primeiro. Obxecto da oferta pública

1. A oferta pública vai dirixida exclusivamente á adquisición en pleno dominio de locais de titularidade privada cun uso terciario, situados na planta baixa ou entreplanta de edificacións de tipoloxía residencial de vivenda colectiva que presenten un bo estado de conservación e que estean situadas na zona urbana do concello de Ourense.

2. A dita oferta poderá comprender, así mesmo, os anexos que, de ser o caso, teña o local, sempre que estean situados na mesma edificación que este. Para estes efectos, só se admitirá unha única praza de garaxe e un rocho por vivenda resultante.

Segundo. Crédito orzamentario

O importe máximo da oferta pública será de 2.000.000 euros, impostos incluídos, con cargo á aplicación 11.81.451B.607.5, proxecto 2026 00002, do estado de gastos dos orzamentos xerais da Comunidade Autónoma de Galicia para o ano 2026. Non obstante, a citada contía poderá ser ampliada en virtude das dispoñibilidades orzamentarias do IGVS, mediante resolución da persoa titular da súa dirección xeral, que se publicará no Diario Oficial de Galicia.

A tramitación anticipada dos expedientes de gasto no exercicio inmediatamente anterior ao dos orzamentos con cargo aos cales se vaian imputar os correspondentes gastos realízase ao abeiro da Orde da Consellería de Economía e Facenda do 11 de febreiro de 1998. Con este fin, no proxecto de Lei de orzamentos xerais da Comunidade Autónoma para o ano 2026 habilítanse créditos para o financiamento desta resolución.

De conformidade coa citada orde, esta resolución queda sometida á condición suspensiva de existencia de crédito adecuado e suficiente para financiar as obrigas derivadas dela.

Terceiro. Requisitos dos locais

1. Os devanditos locais deberán cumprir, ademais dos enunciados no ordinal primeiro, os seguintes requisitos:

1.1. Estar libres de cargas e gravames. Non obstante, admitiranse aqueles locais que teñan constituído un dereito de usufruto, cando a proposta de venda sexa asinada polas persoas usufrutuaria e núa propietaria, nos termos previstos no punto 2.1 do ordinal quinto.

1.2. Estar inscritos no Rexistro da Propiedade. Malia o anterior, poderanse aceptar de xeito condicional propostas de venda referidas a locais que, non estando debidamente inscritos no momento da resolución deste procedemento, se acreditase no momento da presentación da documentación ter solicitado a correspondente inscrición rexistral. Nestes casos, entenderase rexeitada a proposta no caso de que, dentro dos catro meses seguintes á notificación da resolución que poña fin ao procedemento, non se xustificase a correspondente regularización.

1.3. Deberán permitir a construción de, polo menos, unha vivenda, a cal deberá cumprir as condicións exixidas pola normativa en materia de edificación e de habitabilidade, coas excepcións e especialidades previstas no artigo 76 da Lei 5/2024, do 27 de decembro, de medidas fiscais e administrativas.

1.4. Deberán ter unha superficie que permita que a vivenda ou vivendas resultantes teñan unha superficie útil igual ou inferior aos 90 m2; excepcionalmente, poderán acadar ata un máximo de 120 m2.

Así mesmo, a súa configuración deberá permitir unha axeitada distribución interior da vivenda ou vivendas que resulten da súa conversión. Para estes efectos, poderán descartarse as propostas de venda que obriguen a distribucións en que sexa preciso dispoñer dunha superficie desproporcionada para elementos de distribución e comunicación ou en que abunden espazos sobrantes de difícil utilización.

1.5. Non poderán estar suxeitos a servidumes ou outras cargas, legais ou voluntarias, que constitúan un obstáculo físico ou xurídico para a conversión en vivendas. Concretamente, non se aceptarán os locais en que existan titulares de dereitos de uso que impidan a súa plena disposición.

2. O IGVS non adquirirá locais que estean suxeitos a condicionantes técnicos ou xurídicos que impidan a súa conversión en vivendas. Tampouco realizará adquisicións parciais de locais ou suxeitas a condicións impostas polo seu titular ou por terceiros.

Cuarto. Prezo de adquisición

1. O prezo de adquisición do local e, de ser o caso, dos seus anexos, será o menor dos tres seguintes:

– O prezo ofertado polas persoas propietarias.

– O máximo valor admisible para o IGVS (en diante, MVA). Este valor será o resultado de multiplicar a superficie construída do local por 650 euros.

No caso de dispoñer de praza de garaxe, o MVA do dito anexo será de 15.000 euros.

No suposto de que o local dispoña dun rocho, o MVA do dito anexo será o resultado de multiplicar a súa superficie por 650 euros. A superficie máxima computable do rocho será de 8 m2, sen que se teña en conta, para tales efectos, o exceso de superficie sobre a indicada.

– O valor de taxación. Este valor será o recollido no informe de taxación a que se refire o punto 4 do ordinal sexto.

2. Quedarán rexeitadas todas aquelas propostas de venda que excedan o MVA, segundo o indicado anteriormente.

Quinto. Formalidades da proposta de venda

1. Forma e prazo de presentación da proposta de venda.

As persoas interesadas na oferta pública poderán presentar a súa proposta desde o primeiro día hábil seguinte ao da súa publicación no Diario Oficial de Galicia ata o 1 de maio de 2026.

A dita proposta deberá presentarse ante a Dirección Xeral do IGVS e nela deberán figurar os seus datos persoais (nome e apelidos, enderezo para os efectos de notificación, teléfono de contacto e, de ser o caso, enderezo de correo electrónico), as características do local, con indicación da súa superficie e da rúa ou praza onde estea situado, así como unha proposta do prezo exixido para a súa adquisición, o cal deberá estar especificado en letra.

No caso de que a proposta inclúa unha praza de garaxe e/ou rocho, deberá especificarse, así mesmo, a proposta de prezo de cada un deles.

O citado prezo non poderá estar condicionado nin incluír variantes ou alternativas.

Ao anterior prezo engadiranse, de forma diferenciada, os gastos derivados dos honorarios dos profesionais que interveñan na elaboración da documentación técnica e/ou na realización dos trámites administrativos necesarios para participar nesta oferta pública, ata un máximo de 1.500 euros. Os ditos gastos só serán aboados no suposto de que o local sexa adquirido polo IGVS.

Poderán presentarse tantas propostas como locais se pretendan vender ao IGVS. Non obstante, se se trata de locais lindeiros situados na mesma edificación pertencentes a unha mesma persoa, a proposta de todos eles poderá realizarse de forma conxunta.

As propostas de venda deberán presentarse ante o Rexistro Xeral do IGVS, sito no polígono das Fontiñas, Área Central, s/n, de Santiago de Compostela. Non obstante, tamén poderán presentarse nos lugares establecidos no artigo 16.4 da Lei 39/2015, do 1 de outubro, do procedemento administrativo común das administracións públicas.

2. Documentación complementaria.

2.1. Coa anterior proposta deberase xuntar a seguinte documentación:

a) Documento nacional de identidade ou, de ser o caso, número de identificación de estranxeiro, cando o/a propietario/a sexa unha persoa física. Se se trata de persoa xurídica, deberá presentar unha copia do número de identificación fiscal, a escritura de constitución e, se é o caso, de modificación, inscritas no rexistro público correspondente, así como os documentos identificativos da persoa habilitada para actuar no seu nome.

Cando a propiedade do inmoble recaia en máis dunha persoa, física ou xurídica, deberanse achegar os documentos acreditativos da identidade de todas elas, a súa cota de participación, un compromiso de venda da totalidade do local asinado por todas elas, así como un poder ou autorización asinada en que se designe a persoa que as represente, para os efectos da venda ante o IGVS.

No caso de que o local e/ou seus anexos teñan constituído un dereito de usufruto, deberanse achegar os documentos acreditativos da identidade de todas as persoas titulares do usufruto e da núa propiedade, o prezo solicitado por cada unha delas, un compromiso de venda da totalidade do local asinado por todas elas, así como un poder ou autorización asinada en que se designe a persoa que os represente ante o IGVS.

b) Documento acreditativo da representación, de ser o caso.

c) Documento xustificativo da propiedade e, de ser o caso, do usufruto do local e dos seus anexos.

d) Certificación rexistral de dominio e cargas do local e, de ser o caso, dos seus anexos, sen que sirva, para estes efectos, unha simple nota informativa. Así mesmo, será preciso achegar a acreditación de ter solicitado a regularización da súa inscrición, nos supostos recollidos no punto 1.2 do ordinal terceiro.

e) Certificación descritiva e gráfica da Dirección Xeral do Catastro relativa ao local e, de ser o caso, dos seus anexos.

f) Escritura de división horizontal do edificio en que se sitúe o local.

g) Declaración responsable da persoa titular do local de que non existen cargas ou gravames sobre o local e, de ser o caso, sobre os seus anexos. No caso de existiren cargas ou gravames, deberase describir cales.

h) Certificación de que está ao día no pagamento do imposto de bens inmobles e de calquera outro tributo a que estea suxeito o local e, de ser o caso, os seus anexos.

i) Certificación emitida polo/a administrador/a da comunidade de propietarios que acredite que o local e, de ser o caso, os seus anexos, están ao día no pagamento das cotas da comunidade.

j) Memoria descritiva do local e, de ser o caso, dos seus anexos, que deberá contar, polo menos, cos seguintes datos:

– O seu enderezo.

– Superficie construída e superficie útil.

– Fotografías do interior e do exterior que posibiliten identificalos claramente e realizar unha avaliación inicial do seu estado de conservación.

– Plano da situación da edificación en que se sitúa o local.

– Plano do local e, de ser o caso, dos seus anexos.

k) Autorización do cambio de uso e da execución das obras necesarias para iso pola comunidade de propietarios ou, de ser o caso, informe do presidente da comunidade ou do administrador de fincas, en que se faga constar que as ditas actuacións non requiren autorización.

l) Estatutos da comunidade de propietarios, acompañados dun certificado da súa vixencia, emitido polo presidente da comunidade ou, de ser o caso, do administrador de fincas. No caso de que a comunidade de propietarios non dispoña de estatutos, certificado acreditativo desta circunstancia.

m) Informe técnico sobre as condicións urbanísticas aplicables ao inmoble.

n) Declaración responsable da persoa titular do local de que non pesa sobre el unha orde de execución ou derruba, nin sancións pendentes de pagamento.

o) Estudo previo sobre a viabilidade técnica da implantación da vivenda ou vivendas no local que conteña, como mínimo, unha proposta de distribución da vivenda ou vivendas que resulten despois da súa conversión en vivenda, unha indicación das obras que poden afectar elementos comúns da edificación (saída dos elementos de ventilación e extraccións, tomas de servizos, etc.), así como unha xustificación da viabilidade dos seguintes aspectos:

– Conexión das instalacións da vivenda ou vivendas resultantes ás redes xerais do edificio de gas, electricidade, rede de saneamento e rede de abastecemento de auga.

– Saída a cuberta das instalacións de ventilación das vivendas.

– Evacuación dos fumes provenientes da campá extractora da cociña.

p) Autorización de acceso ao local e, de ser o caso, aos seus anexos a favor das persoas que determine o IGVS, para que se poidan realizar cantas inspeccións se consideren oportunas, sempre logo do correspondente aviso previo.

q) Facturas dos honorarios emitida polos profesionais que elaboraron a documentación técnica requirida e/ou que interviron na realización dos trámites administrativos necesarios para participar nesta oferta pública, onde consten a identificación da persoa acredora, o seu importe e a súa data de emisión, así como os documentos bancarios que xustifiquen o seu pagamento.

2.2. Para os efectos anteriores, as copias dos documentos gozarán da mesma validez e eficacia que os seus orixinais, sempre que estean debidamente compulsadas. As persoas interesadas responsabilizaranse da veracidade dos documentos que presenten.

2.3. As certificacións, memorias e demais documentos que se xunten á proposta de venda non deberán ter unha antigüidade superior a tres meses, co fin de facilitar a comprobación da realidade física e/ou xurídica do inmoble.

3. Datos de carácter persoal.

Os datos persoais recollidos na proposta de venda e na documentación que a acompañe serán tratados polo IGVS, na súa condición de responsable, coa finalidade de levar a cabo a tramitación administrativa que derive da xestión das propostas.

Sexto. Admisión das propostas e establecemento da orde de prioridade da adquisición

Para determinar a relación das propostas admitidas e a orde de prelación na adquisición destas seguiranse os seguintes trámites:

1. A Dirección Técnica de Edificación e Calidade do IGVS (en diante, DTEC) examinará a documentación presentada. Se, como resultado de tal exame, observa defectos ou omisións susceptibles de emenda no escrito e/ou na documentación, concederáselle á persoa interesada un prazo improrrogable de 20 días naturais para que emende as deficiencias ou achegue os documentos omitidos. Transcorrido o dito prazo sen emendar ou achegar os documentos requiridos, entenderase que se rexeita a proposta de venda. Tamén se entenderá rexeitada a proposta, sen necesidade de requirimento previo, cando non cumpra as condicións exixidas nesta resolución.

2. Rematado o prazo de presentación das propostas e unha vez corrixidas, de ser o caso, as deficiencias atopadas, a DTEC emitirá un informe en que se relacionarán as propostas presentadas, así como as que, na súa consideración, deben ser rexeitadas, ben por non ser posible a conversión do local en vivenda ou non cumprir algún dos requisitos exixidos nesta oferta pública, ben por non presentar toda a documentación exixida nesta resolución, mesmo despois de ser requirida para a súa achega.

O citado informe elevarase á Comisión de Valoración, a cal estará composta polas seguintes persoas:

– A persoa titular da DTEC, que exercerá as funcións de presidenta da comisión.

– A persoa titular da Dirección Territorial da Consellería de Vivenda e Planificación de Infraestruturas de Ourense.

– A persoa titular da Área Provincial do IGVS de Ourense.

– A persoa titular do Servizo Técnico de Ourense.

– Unha persoa designada pola persoa titular da Dirección Xeral do IGVS entre os/as xefes/as de servizo do organismo.

– A persoa titular da asesoría xurídica do IGVS.

3. Á vista do informe da DTEC, a Comisión de Valoración avaliará as propostas presentadas, con pronunciamento expreso sobre as admitidas e as rexeitadas, con indicación das causas de tal rexeitamento.

4. Unha vez recibida a acta da Comisión de Valoración, a persoa titular da Dirección Xeral do IGVS resolverá o rexeitamento daquelas propostas en que o local non pode ser convertido en vivenda ou non cumpre os requisitos exixidos nesta oferta pública, así como daquelas outras que non presentasen toda a documentación exixida nesta resolución, mesmo despois de ser requirida para a súa achega. Así mesmo, encargará a unha empresa inscrita no Rexistro de Sociedades de Taxación do Banco de España unha taxación para cada un dos locais cuxas propostas fosen admitidas.

O informe da taxación deberá pronunciarse sobre as seguintes cuestións:

– O estado e características físicas do local e, de ser o caso, da praza de garaxe e/ou rocho, así como a súa valoración, con indicación dos parámetros en que se fundamenta.

– A concordancia entre a realidade física e a documentación achegada.

5. Á vista da taxación e da documentación achegada coas propostas, así como das comprobacións que se consideren oportunas, a DTEC elaborará un informe por cada unha das propostas admitidas, en que se establecerá o prezo de compravenda e se analizarán as características dos locais para a súa conversión en vivenda.

6. Para os efectos de realizar o anterior informe e establecer unha orde de prioridade na adquisición dos locais, teranse en conta os seguintes criterios:

6.1. Aproveitamento do local.

Analizarase o nivel de aproveitamento efectivo da superficie construída computable das propostas, outorgando unha puntuación de ata 40 puntos, segundo o dito aproveitamento.

6.2. Adaptabilidade das vivendas.

Outorgaranse 20 puntos a aquelas propostas en que se poida garantir que as vivendas resultantes sexan vivendas adaptadas., segundo o establecido no Decreto 35/2000, do 28 de xaneiro, polo que se aproba o Regulamento de desenvolvemento e execución da Lei de accesibilidade e supresión de barreiras na Comunidade Autónoma de Galicia.

6.3. Oferta de praza de garaxe e/ou rocho anexos

Outorgaranse 10 puntos ás propostas en que se inclúa unha praza de garaxe e rocho por vivenda resultante, 7 puntos ás que inclúan unha praza de garaxe e 3 puntos ás propostas en que se inclúa un rocho.

6.4. Características da zona onde se sitúa o local.

Outorgarase unha puntuación máxima de ata 10 puntos ás propostas en función da súa situación en ámbitos de especial interese ou de especial vitalidade urbana.

7. Finalmente, realizarase unha listaxe das propostas presentadas, ordenadas en orde decrecente en función da puntuación obtida, segundo os criterios indicados.

Non obstante, con independencia da dita orde, aquelas propostas de venda que cumpran a totalidade dos requisitos exixidos e acheguen toda a documentación preceptiva gozarán de prioridade respecto a aquelas outras que deban ser aceptadas de xeito condicional, nos supostos previstos no punto 1.2 do ordinal terceiro.

A Comisión de Valoración, á vista do informe da DTEC e, de ser o caso, recibidas as aclaracións ou informes complementarios que se considerasen necesarios, proporá á persoa titular da Dirección Xeral do IGVS:

– A admisión das propostas que, á vista dos informes técnicos achegados, reúnan os requisitos sinalados no punto I do ordinal segundo desta resolución.

– A exclusión do resto das propostas.

– A aprobación da listaxe das propostas admitidas, ordenadas de modo decrecente segundo a puntuación obtida, con indicación da citada puntuación e do valor de adquisición.

Sétimo. Aceptación das propostas de venda

Vista a proposta da Comisión de Valoración, a persoa titular da Dirección Xeral do IGVS, mediante resolución que se deberá ditar antes do 16 de decembro de 2026, acordará:

– Aprobar a listaxe das propostas admitidas, ordenadas por orde de prioridade e con indicación do seu valor de adquisición.

– Excluír o resto das propostas que non reúnan os requisitos exixibles nesta oferta pública, malia seren inicialmente admitidas.

– Aceptar as propostas, de conformidade cos criterios sinalados, e realizar unha oferta contraditoria, no suposto de que o valor de taxación sexa inferior ao prezo de adquisición ofrecido polas persoas interesadas, sempre que exista crédito dispoñible. Nestes casos, o titular do local disporá dun prazo de 15 días naturais para comunicar a súa aceptación; transcorrido o dito prazo sen comunicar a aceptación, entenderase que rexeita a oferta contraditoria realizada.

Oitavo. Honorarios e pagamentos de impostos

Os honorarios notariais e rexistrais das escrituras de compravenda serán por conta do IGVS. A determinación do notario farase de conformidade co artigo 127 do Regulamento da organización e réxime do notariado, aprobado con carácter definitivo polo Decreto do 2 de xuño de 1944.

Os demais gastos e impostos que se orixinen ou se ocasionen como consecuencia da compravenda aboaranse conforme o disposto na lexislación vixente.

Santiago de Compostela, 19 de decembro de 2025

Heriberto García Porto
Director xeral do Instituto Galego da Vivenda e Solo