Mediante a Resolución do 14 de xaneiro de 2026 encoméndaselle ao Consorcio Galego de Servizos de Igualdade e Benestar a execución dun servizo de transporte aos centros públicos competencia da Dirección Xeral de Persoas con Discapacidade da Consellería de Política Social e Igualdade.

Coa finalidade de dar cumprimento ao disposto no artigo 9.3 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, publícase no Diario Oficial de Galicia o contido mínimo da dita resolución:

– Actividade: servizo consistente no traslado das persoas usuarias do centro ocupacional O Saiar, do centro de atención a persoas con discapacidade de Redondela, do centro de atención a persoas con discapacidade de Sarria e do centro de atención a persoas con discapacidade da Coruña, para o desenvolvemento das actividades propias dos centros.

O servizo consistente na modalidade de carácter regular (dez desprazamentos por semana, ida e volta de luns a venres, que supoñen un total de 116 desprazamentos) das persoas usuarias do centro ocupacional O Saiar e dos centros de atención a persoas con discapacidade de Redondela, Sarria e A Coruña, aboarase en función do prezo por vehículo/día.

O servizo de carácter puntual (dous desprazamentos por semana, de ida e volta na fin de semana) das persoas usuarias de servizos residenciais dos centros de atención a persoas con discapacidade de Redondela e Sarria aboarase en función do prezo por servizo/día.

– Natureza e alcance da xestión encomendada: esta encomenda ao Consorcio Galego de Servizos de Igualdade e Benestar ten natureza intersubxectiva. Consonte o previsto nos artigos 47 e 95 da Lei 16/2010, do 17 de decembro, de organización e funcionamento da Administración xeral e do sector público autonómico, e para os efectos previstos nos artigos 6.3 e 32 da Lei 9/2017, do 8 de novembro, de contratos do sector público, pola que se transpoñen ao ordenamento xurídico español as directivas do Parlamento Europeo e do Consello 2014/23/UE e 2014/24/UE, do 26 de febreiro de 2014, o Consorcio Galego de Servizos de Igualdade e Benestar ten a consideración de medio propio e servizo técnico da Consellería de Política Social e Igualdade.

– Prazo de vixencia: a encomenda comeza o 15 de xaneiro de 2026 e rematará o 30 de xuño de 2026, e poderá ser prorrogada por mutuo acordo das partes.

– Finalización anticipada: esta encomenda resolverase anticipadamente nos seguintes supostos:

• Cumprimento do seu obxecto antes da data establecida para a súa finalización.

• Imposibilidade de realizar as actividades encomendadas.

• Incumprimento dalgunha das obrigas ou actividades encomendadas ou dos prazos previstos.

• Revogación por resolución motivada do órgano encomendante.

• As demais previstas na lexislación vixente.

Santiago de Compostela, 14 de xaneiro de 2026

A conselleira de Política Social e Igualdade
P.D. (Orde do 4.6.2024; DOG núm. 111, do 10 de xuño)
María Francisca Gómez Santos
Secretaria xeral técnica da Consellería de Política Social e Igualdade