As políticas de cooperación para o desenvolvemento comprenden o conxunto de actuacións orientadas á real superación da pobreza nas súas múltiples dimensións, á construción de resiliencia nas persoas e comunidades, a reducir desigualdades e a promover a realización efectiva dos dereitos humanos e liberdades fundamentais, para o cal se precisa de iniciativas universais de promoción da solidariedade, a xustiza e a equidade. A necesidade de promover un progreso económico e social global, sostible, inclusivo, equitativo e de igualdade entre os cidadáns xorde tamén de forma descentralizada nas comunidades autónomas e noutras administracións territoriais, así como en institucións ou axentes sociais e económicos diversos que senten como un deber ético común o compromiso de traballar pola consecución dos obxectivos de desenvolvemento sostible (ODS) para 2030, aprobados pola Asemblea Xeral de Nacións Unidas o 25 de setembro de 2015, seguindo criterios de eficacia e calidade da axuda. Coa aprobación da Lei 10/2021, do 9 de marzo, reguladora da acción exterior e da cooperación para o desenvolvemento de Galicia, a Comunidade Autónoma reafirma este compromiso e asume como propia a responsabilidade de cooperar con outros países para propiciar o seu desenvolvemento integral, contribuír á mellora das condicións de vida dos seus habitantes, aliviar e corrixir as situacións de pobreza e desigualdade e propiciar un desenvolvemento humano solidario, igualitario, sostible e estable, que inclúa maiores cotas de liberdade, igualdade e unha repartición máis xusta dos froitos do crecemento económico.

O artigo 96 desta lei considera axentes da cooperación as organizacións non gobernamentais para o desenvolvemento, así como as universidades, os sindicatos, as empresas, as organizacións empresariais e as comunidades galegas no exterior.

No Decreto 136/2024, do 20 de maio, polo que se establece a estrutura orgánica da Consellería de Presidencia, Xustiza e Deportes, publicado no DOG núm. 101, do 27 de maio, estableceuse no seu artigo 47, punto 1.d), as competencias da Subdirección Xeral de Cooperación Exterior nesta materia.

Tendo en consideración isto, procede convocar a concesión de subvencións con cargo aos orzamentos xerais da Comunidade Autónoma de Galicia para o ano 2026, de acordo con estas bases reguladoras que garanten os principios de publicidade, concorrencia e obxectividade.

O expediente tramítase ao abeiro do disposto no artigo 1.1 da Orde da Consellería de Economía e Facenda do 11 de febreiro de 1998, pola que se regula a tramitación anticipada de expedientes de gasto, na redacción dada pola Orde do 27 de novembro de 2000, ao existir crédito adecuado e suficiente no proxecto de lei de orzamentos xerais da Comunidade Autónoma de Galicia, aprobado polo Consello da Xunta de Galicia do 17 de outubro de 2025. A eficacia da orde queda sometida á condición suspensiva da existencia de crédito suficiente para financiar as obrigas derivadas dela.

En atención a estes principios e obxectivos e en uso das atribucións que me confire o Decreto 44/2024, do 14 de abril, polo que se nomean os titulares das consellerías da Xunta de Galicia, e o artigo 34.6 da Lei 1/1983, do 22 de febreiro, reguladora da Xunta e da súa Presidencia,

RESOLVO:

Artigo único

1. Aprobar as bases reguladoras que figuran como anexo I desta orde para a concesión de subvencións a proxectos de cooperación para o desenvolvemento no exterior promovidos polos axentes de cooperación.

2. Convocar as ditas subvencións polo importe total de 6.300.000 euros con cargo á aplicación orzamentaria 05.07.331A.490.0 dos orzamentos xerais da Comunidade Autónoma para 2026 e 2027, que se financiarán de acordo coa distribución das seguintes liñas de actuación:

Proxectos no exterior de ONGD polo importe total de 4.340.000 euros, conforme a seguinte distribución: 1.519.000 euros no ano 2026 e 2.821.000 euros no ano 2027.

Proxectos no exterior dos outros axentes polo importe total de 700.000 euros, conforme a seguinte distribución: 245.000 euros no ano 2026 e 455.000 euros no ano 2027.

Proxectos de apoio a organizacións feministas e de defensa dos dereitos das mulleres polo importe total de 1.260.000 euros, conforme a seguinte distribución: 441.000 euros no ano 2026 e 819.000 euros no ano 2027.

Para a atribución das solicitudes en cada categoría, terase en conta, nos dous primeiros casos, a condición do solicitante non agrupado, e o disposto na base 3.1.e), no caso dos proxectos de apoio a organizacións feministas e de defensa dos dereitos das mulleres.

Ao tratarse de subvencións con cargo á mesma aplicación orzamentaria, os créditos non asignados a unha liña de actuación poderán incrementar as dotacións financeiras das outras liñas de actuación, empregando como criterio de asignación o maior número de puntos acadados na fase de baremación por cada unha das solicitudes, independentemente da liña de actuación pola que sexan financiados.

3. Os importes previstos poderán ser incrementados ao longo do exercicio, nos supostos establecidos no artigo 31.2 da Lei de subvencións de Galicia, e logo da declaración previa de dispoñibilidade de crédito, logo da modificación orzamentaria que proceda. Se é o caso, a ampliación de crédito deberase publicar nos mesmos medios que esta convocatoria, sen que tal publicidade implique a apertura de prazo para presentar novas solicitudes nin o inicio de novo cómputo de prazo para resolver. A alteración da distribución establecida nesta convocatoria non precisará de nova convocatoria, pero si das modificacións que procedan no expediente de gasto e da publicación nos mesmos medios que a convocatoria.

4. Contra estas bases reguladoras e a convocatoria cabe interpoñer os seguintes recursos:

a) Potestativamente, un recurso de reposición ante o mesmo órgano que ditou a orde, no prazo dun mes contado a partir do día seguinte ao da súa publicación no Diario Oficial de Galicia.

b) Directamente, un recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados a partir do día seguinte ao da súa publicación no Diario Oficial de Galicia.

Disposición adicional primeira

Apróbase a delegación de atribucións da persoa titular da Consellería de Presidencia, Xustiza e Deportes no director xeral de Relacións Exteriores e coa Unión Europea para resolver a concesión ou denegación das axudas e subvencións previstas nesta orde, de acordo co establecido no artigo 3.5 da Orde do 12 de xuño de 2024 sobre delegación de competencias na Secretaría Xeral Técnica e noutros órganos desta consellería.

Autorízase o director xeral de Relacións Exteriores e coa Unión Europea para ditar, no ámbito das súas competencias, as instrucións precisas para o desenvolvemento e cumprimento desta orde.

Disposición adicional segunda

A presente orde entrará en vigor o día seguinte ao da súa publicación no Diario Oficial de Galicia.

Santiago de Compostela, 16 de xaneiro de2026

Diego Calvo Pouso
Conselleiro de Presidencia, Xustiza e Deportes

ANEXO I

Bases reguladoras da concesión de subvencións, en réxime de concorrencia competitiva, para a execución de proxectos de cooperación para o desenvolvemento no exterior promovidos polos axentes de cooperación

Artigo 1. Obxecto e entidades beneficiarias

1.1. O obxecto destas bases é a regulación da concesión de subvencións para a realización de proxectos de cooperación ao desenvolvemento no exterior que van executar as entidades recoñecidas como axentes de cooperación para o desenvolvemento pola Lei 10/2021, do 9 de marzo, reguladora da acción exterior e da cooperación para o desenvolvemento de Galicia, ben individualmente ou ben mediante unha agrupación de entidades (código de procedemento PR803D):

– As organizacións non gobernamentais para o desenvolvemento.

– As universidades do Sistema universitario galego e as súas entidades dependentes e centros de investigación públicos.

– As cooperativas, empresas e asociacións empresariais.

– As organizacións sindicais.

– As comunidades galegas no exterior.

– Outros axentes sociais ou entidades que teñan entre os seus fins a realización de actividades de cooperación para o desenvolvemento.

1.2. Non se considerará agrupación de entidades a aquela que estea formada por unha asociación ou federación á cal pertenza a devandita entidade, ou aquela en que os órganos de goberno sexan coincidentes, total ou parcialmente, en todas as entidades agrupadas. Así mesmo, non terá a condición de entidade agrupada aquela que non participe economicamente na xestión do proxecto, ben con cargo á subvención ou ben con achegas propias.

1.3. Exclúense destas bases os proxectos que teñan como obxecto a acción humanitaria e os de carácter asistencial que non poidan asegurar a súa sustentabilidade cando cese o financiamento externo.

Artigo 2. Sucesión de entidades

2.1. Con respecto ao cómputo de experiencia en relación cos artigos 3 e 9 destas bases atenderase s seguintes regras:

a) Nos supostos de fusión ou absorción, considerarase a suma da experiencia executada por cada unha das entidades preexistentes.

b) No suposto de escisión, considerarase á entidade que conserve a personalidade xurídica preexistente. De non conservarse esta, todas serán consideradas como de nova creación.

c) No suposto de cambio de natureza xurídica, recoñecerase a executada pola entidade orixinaria.

2.2. No caso de producirse a lo longo da vida do proxecto procesos de fusión, absorción ou escisión de entidades solicitantes de subvencións ou calquera outro cambio de natureza xurídica, deberá acreditarse:

a) A disolución das entidades preexistentes.

b) A transferencia de todos os dereitos e obrigas das entidades preexistentes á/ás nova/s entidade/s ou á que permaneza.

c) A constancia nos estatutos da/das nova/s entidade/s ou naquela na que permaneza de que se produciu a mencionada sucesión.

Artigo 3. Requisitos que deben reunir as entidades beneficiarias das axudas e os proxectos

Non pasarán á fase de valoración as solicitudes presentadas que non cumpran os requisitos seguintes:

3.1. Requisitos das entidades.

a) Estar inscritas no Rexistro Galego de Axentes de Cooperación para o Desenvolvemento con, polo menos, un ano de antelación á data de publicación da convocatoria. As comunidades galegas no exterior que consten inscritas no Rexistro de Centros e Comunidades Galegas dependente da Secretaría Xeral da Emigración e as universidades quedan exentas de cumprir este requisito.

b) Ter correctamente xustificadas as axudas recibidas por parte da Xunta de Galicia a outros proxectos en materia de cooperación para o desenvolvemento para a anualidade 2022 e anteriores antes da data de presentación da solicitude para esta convocatoria, agás no caso de ter concedida a oportuna ampliación do prazo de xustificación. Así mesmo, é necesario que se efectuase o correspondente ingreso nos casos en que, sobre as entidades beneficiarias de axudas económicas, recaese unha resolución administrativa ou xudicial firme de reintegro.

c) Non estar incursa en ningún dos supostos previstos no artigo 10 da Lei 9/2007, do 13 de xuño, de subvencións de Galicia, nin nos previstos no artigo 13 da Lei 38/2003, do 17 de novembro, xeral de subvencións. En particular, en aplicación do artigo 13.bis desta última, no caso das subvencións de importe superior a 30.000 euros, non poderán obter a condición de beneficiarias as empresas que incumpran os prazos de pagamento previstos na Lei 3/2004, do 29 de decembro, pola que se establecen medidas de loita contra a morosidade nas operacións comerciais.

d) No caso das universidades, deberán formar parte do Sistema universitario de Galicia segundo a Lei 11/1989, do 20 de xullo, de ordenación do sistema universitario de Galicia, ou ser unha das súas entidades dependentes e centros de investigación públicos que realicen actividades que poidan ser obxecto das axudas reguladas nestas bases.

e) No caso de presentar a solicitude de subvención para proxectos de apoio a organizacións feministas e de defensa dos dereitos das mulleres, amais do contido do proxecto, a entidade solicitante deberá contar con experiencia na execución de proxectos de xénero e/ou en apoio ao movemento feminista e de mulleres, previa á data de publicación desta convocatoria.

Ademais do anterior, deberán presentar como contraparte ou socio local a unha entidade que cumpra cos seguintes requisitos:

– Que recolla nos seus estatutos como a súa misión principal a promoción dos dereitos das mulleres e/ou das nenas. Tal condición deberá estar acreditada a través dos seus estatutos. Na súa falta e de xeito excepcional, poderá acreditarse mediante unha declaración asinada polo representante legal da entidade.

– Que se constituíra legalmente dous anos antes da data de publicación desta convocatoria.

– Que conte con experiencia na execución de, como mínimo, catro proxectos en defensa dos dereitos das mulleres antes da data de publicación desta convocatoria. Esta circunstancia deberá estar acreditada mediante un listado asinado polo representante legal conforme o anexo VIII, xunto cos documentos de concesión correspondentes.

3.2. Requisitos xerais de todos os proxectos.

a) Non estar iniciada a execución do proxecto antes do 1 de xaneiro de 2026, sendo necesario que o inicio das actividades sexa no ano 2026. Nos supostos en que o proxecto teña carácter anual, os proxectos deberán executarse antes do 31 de decembro do ano en que se conceda a subvención. No caso de proxectos con carácter plurianual, os proxectos deberán executarse antes do 31 de decembro do ano seguinte ao da concesión da subvención.

b) Que se identifiquen as contrapartes ou socios locais que participen responsablemente na execución material do proxecto e na xestión dos recursos e que conste expresamente o seu compromiso no proxecto.

En atención ao principio de localización, estas contrapartes deberán estar constituídas e/ou fundadas orixinariamente no país de execución do proxecto solicitado. Tamén poderán considerarse contrapartes os medios propios dos que dispoña o solicitante da axuda no país de intervención.

Ademais, as contrapartes ou socios locais deben estar legalmente constituídos e inscritos no rexistro correspondente no país de intervención, de existir este, con anterioridade á publicación desta convocatoria.

c) Que as accións non teñan como obxectivo a substitución do Estado na prestación de servizos públicos de saúde, a educación regulada ou a investigación oficial.

d) Que o proxecto redunde na ampliación das capacidades e das liberdades das poboacións beneficiarias, é dicir, que conten coa participación das persoas beneficiarias no desenvolvemento do proxecto, que non sexa discriminatorio por razón de cultura, raza, xénero, relixión, orixe ou orientación sexual, que fomente a igualdade entre homes e mulleres e que sexa respectuoso coa protección do medio.

e) Que teña unha repercusión práctica e cuantificable na satisfacción das necesidades básicas e dos intereses estratéxicos da poboación das zonas máis desfavorecidas do país en que se execute, atendendo de xeito prioritario ás diferenzas derivadas das fendas de xénero, e que sexa respectuoso cos obxectivos de desenvolvemento do país, da zona onde se leve a cabo a acción e das comunidades beneficiarias.

f) Que o proxecto se axuste tanto á realidade como á capacidade de xestión da entidade solicitante e á da súa contraparte ou socio local, co fin de asegurar a súa viabilidade.

g) Os proxectos deberán estar vinculados de xeito directo á realización das prioridades transversais, segundo o establecido no V Plan director da cooperación galega 2023-2026.

h) O orzamento dos proxectos deberá cumprir co que establece o artigo 8, Gastos do proxecto, desta convocatoria, en especial o relativo aos límites máximos establecidos nalgunha das partidas e a imputación adecuada dos gastos.

i) O cofinanciamento do proxecto correspondente á entidade solicitante e a outros financiadores diferentes da Xunta de Galicia, non pode ser o 100 % valorizado; ten que existir nalgún caso achega financeira ao proxecto.

j) O emprego dos documentos de formulación normalizados (tanto o técnico como o económico) adaptados a esta convocatoria.

k) Nos proxectos presentados por fases será obrigatorio contar cunha liña de base inicial, a cal poderá formar parte da subvención solicitada.

l) Será obrigatorio presentar o informe de avaliación en proxectos que dean continuidade a intervencións anteriores.

3.3. Requisitos específicos dos proxectos presentados polos outros axentes de cooperación.

Non serán valorados os proxectos presentados polos outros axentes da cooperación galega (exceptúanse os presentados polas ONGD) que non se enmarquen, cada un deles, dentro dos seguintes ámbitos:

As universidades do Sistema universitario galego e as súas entidades dependentes e centros de investigación públicos:

a) Actividades de cooperación interuniversitaria, como fortalecemento institucional das universidades dos países en desenvolvemento, asistencia para o deseño de títulos e currículos académicos, apoio á mobilidade do persoal investigador e docente, organización de pasantías de alumnado en prácticas, formación de redes para o traballo en común e outras.

b) Actividades de apoio e asistencia ao resto dos actores da cooperación, tanto administracións públicas como entidades privadas (ONGD) no desenvolvemento científico e na transferencia de tecnoloxía.

As cooperativas, empresas e asociacións empresariais:

a) A dotación de bens e servizos –materiais, obras e asistencia técnica– que os procesos de desenvolvemento demandan, así como a achega libre de recursos humanos, materiais, técnicos ou financeiros a proxectos ou institucións de desenvolvemento.

b) Actividades de fortalecemento no sector en que desempeña a súa actividade dos países en desenvolvemento, apoiando a participación no diálogo social, na transferencia da súa experiencia e recursos a institucións cun fin homólogo nos países en desenvolvemento, tales como tarefas de formación e de asistencia técnica en áreas profesionais definidas e no apoio á consolidación das organizacións empresariais, ou outro tipo de institucións.

c) A promoción dos contactos previos e dos estudos de identificación ou perfectibilidade que alenten a creación de oportunidades para a posta en marcha de iniciativas empresariais, que permitan xerar renda e emprego no país en desenvolvemento, fortalecendo o tecido produtivo do país, priorizando as actuacións das micro, pequenas e medianas empresas ou aquelas de economía social. Estas iniciativas deberán incluír unha especial atención ao respecto e á defensa dos dereitos laborais, humanos, do dereito ao territorio, e atenderán ao impacto na loita pola igualdade de xénero e á súa contribución coa loita contra a pobreza e a sustentabilidade ambiental.

d) Actividades encamiñadas á promoción de prácticas de responsabilidade social corporativa.

e) O desenvolvemento de proxectos de economía social e fortalecemento do tecido produtivo que favorezan o crecemento económico de base aproveitando o coñecemento do país, a implantación e a rede de relacións que as empresas crean.

Organizacións sindicais:

a) Actividades de apoio, a través dos seus recursos e capacidades humanas e técnicas, ás intervencións directas dos actores de cooperación.

b) Actividades de apoio á organización sindical nos países en desenvolvemento, potenciando a capacidade técnica e organizativa destas institucións e apoiando a súa participación no diálogo social nos seus respectivos países, co obxectivo de contribuír a unha maior articulación e fortaleza da sociedade civil.

c) Actividades de promoción da organización da produción a través da transferencia da experiencia dos sindicatos agrarios.

d) Actividades encamiñadas á promoción de prácticas de defensa dos dereitos laborais, cunha especial atención aos dereitos laborais das mulleres.

Comunidades galegas no exterior:

a) O desenvolvemento de proxectos de economía social e fortalecemento do tecido produtivo que favorezan o crecemento económico de base, aproveitando o coñecemento do país, a implantación e a rede de relacións creadas polas comunidades galegas.

b) A promoción da igualdade de oportunidades entre homes e mulleres e a defensa dos grupos de poboación máis vulnerables, con especial incidencia na infancia e mocidade, terceira idade, persoas refuxiadas, desprazadas, migrantes, retornadas, as minorías étnicas e as comunidades indíxenas.

Outros axentes sociais ou entidades que teñan entre os seus fins a realización de actividades de cooperación para o desenvolvemento:

Actuacións ou actividades de apoio a organizacións e institucións dos países socios, que desempeñen ou estean relacionadas co fin principal que a entidade solicitante realice en Galicia.

Artigo 4. Forma, lugar e prazo de presentación das solicitudes

4.1. As solicitudes deberán presentarse obrigatoriamente por medios electrónicos a través do formulario normalizado (anexo II) dispoñible na sede electrónica da Xunta de Galicia https://sede.xunta.gal

De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das entidades interesadas presenta a súa solicitude presencialmente, requirirase para que a emende a través da súa presentación electrónica. Para estes efectos considerarase como data de presentación da solicitude aquela en que fose realizada a emenda.

Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e Chave365 (https://sede.xunta.gal/chave365).

As solicitudes poderán presentarse no prazo dun mes contado desde o día seguinte ao de publicación desta orde no Diario Oficial de Galicia.

4.2. As entidades solicitantes poderán presentar un máximo de dous proxectos, ben sexan individuais ou ben en agrupación con outras entidades. Non obstante o anterior, no caso de ter obtido subvención con cargo á convocatoria para a execución de programas de cooperación para o desenvolvemento no exterior promovidos polas organizacións non gobernamentais de desenvolvemento para o ano 2025 (código de procedemento PR804C), unicamente poderán presentar unha solicitude de proxecto.

No caso de presentar máis dun proxecto, polo menos un ten que se executar necesariamente nun país definido como prioritario no V Plan director da cooperación galega.

Os proxectos presentados por unha agrupación de entidades contan como un proxecto presentado por cada unha das entidades agrupadas. Polo que respecta ás universidades, esta limitación aplicarase por departamento.

Artigo 5. Documentación complementaria

5.1. As entidades interesadas deberán achegar coa solicitude (anexo II) a seguinte documentación.

Carpeta 1. Información relativa á entidade solicitante. No caso de agrupación de entidades, deberase achegar tamén de cada unha das entidades agrupadas.

a) Copia das contas anuais da entidade (ingresos de carácter público e privado e gastos) da última liquidación do orzamento rendida e aprobada polo órgano competente da entidade. Desta obriga quedarán exceptuadas as universidades.

b) Memoria da organización na cal se inclúan as accións da entidade nos últimos dous anos.

c) Listaxe dos proxectos de cooperación para o desenvolvemento levados a cabo en anos anteriores, financiados por entidades públicas ou privadas, daquelas actuacións levadas a cabo na mesma zona e no sector do proxecto que se presenta, coas mesmas persoas destinatarias e co mesmo socio local.

d) Planificación/estratexia de cooperación para o desenvolvemento da entidade para os seguintes anos, na cal se enmarca o proxecto presentado. No caso de empresas ou agrupacións empresariais, deberán incluír, de ser posible, o Plan de responsabilidade social corporativa en que se insire o proxecto.

e) No caso de agrupación de entidades, deberá xuntar o contrato ou o acordo de colaboración asinado polas persoas que exerzan a representación legal das entidades, polo cal se obrigan solidariamente ante a Xunta de Galicia polas posibles responsabilidades derivadas da execución do proxecto e, se é o caso, ao reintegro total ou parcial das subvencións nos supostos de falsidade ou ocultación de datos ou de incumprimento pleno ou parcial dos fins para os cales se lle concedeu a subvención.

No contrato ou acordo de colaboración entre as entidades agrupadas designarán unha persoa que exerza a representación legal, que necesariamente pertencerá á entidade solicitante, e un enderezo único para os efectos de notificacións. Así mesmo, deberán facer constar, como mínimo, as seguintes cuestións:

Compromisos de execución asumidos por cada entidade membro da agrupación, así como os importes da subvención e as achegas propias que executará cada unha delas en cada anualidade.

Compromiso da entidade solicitante de responsabilizarse do control financeiro e contable unificado do proxecto e de comunicación ante a Xunta de Galicia de todos os ingresos e gastos do proxecto.

A/as entidade/s agrupada/s distinta/s da solicitante deberán xuntar unha declaración de que está/n ao día nas súas obrigas tributarias e coa Seguridade Social e nas obrigas de reintegro de subvencións, e de que non está/n incursa/s en ningunha das restantes circunstancias previstas nos números 2 e 3 do artigo 10 da Lei 9/2007, do 13 de xuño, de subvencións de Galicia, na súa normativa de desenvolvemento e no artigo 13 da Lei 38/2003, do 17 de novembro, xeral de subvencións, segundo o modelo do anexo III.

A agrupación non se poderá disolver ata que transcorra o prazo de prescrición de catro anos desde a finalización da execución do proxecto. No caso das universidades, o contrato ou acordo de colaboración deberá ser asinado pola persoa que exerza a súa representación legal.

f) Os axentes de cooperación que pola súa natureza xurídica posúan ánimo de lucro achegarán un documento de compromiso de non obter ningún beneficio da operación, segundo o establecido no artigo 97.2 da Lei 10/2021, do 9 de marzo, reguladora da acción exterior e da cooperación para o desenvolvemento de Galicia. O devandito documento estará asinado pola persoa que exerza a representación legal da entidade.

g) As universidades incluirán unha certificación, expedida pola persoa que exerza a representación legal segundo o establecido ao respecto na normativa de universidades e nos respectivos estatutos, en que se autorice a presentación do proxecto á convocatoria, así como, o compromiso de gasto correspondente.

Carpeta 2. Información relativa á contraparte ou socio local (no caso de seren varias entidades, deberase achegar de cada unha delas).

a) Carta de compromiso de participación no proxecto por parte da contraparte local, asinada pola persoa que exerza a representación legal da entidade.

b) Documentación acreditativa da representación legal da entidade: copia do documento en que se recolla o nomeamento da persoa que exerza actualmente a representación legal. Esta documentación será coincidente coas sinaturas do resto dos documentos relacionados nesta epígrafe.

c) Declaración da persoa que exerza a representación legal da entidade en que se especifiquen a personalidade xurídica da entidade socia ou contraparte local, o seu domicilio social, a cuantificación do número de socios/as da entidade, o seu organigrama e a descrición da vinculación existente entre a entidade e o persoal ao seu servizo.

d) Copia dos estatutos da entidade.

e) Declaración de que a misión principal da entidade é a promoción dos dereitos das mulleres e/ou das nenas asinada polo representante legal da entidade, en aplicación do disposto no artigo 3.1.e), de ser o caso.

f) Experiencia na execución de, como mínimo, catro proxectos en defensa dos dereitos das mulleres antes da data de publicación desta convocatoria, no caso de solicitudes para proxectos de apoio a organizacións feministas e de defensa dos dereitos das mulleres, asinado polo representante legal (anexo VIII).

g) Copia do documento de inscrición no rexistro correspondente da entidade socia ou contraparte local.

h) Copia do número de identificación fiscal da entidade ou documentos similares no país de orixe.

i) Copia das contas anuais da entidade (ingresos de carácter público e privado e gastos) da última liquidación do orzamento rendida e aprobada polo órgano competente da entidade.

j) Memoria da organización en que se inclúan as accións da entidade nos últimos dous anos ou máis. Recoméndase achegar unha listaxe dos proxectos de cooperación para o desenvolvemento levados a cabo en anos anteriores, financiados por entidades públicas ou privadas, daquelas actuacións levadas a cabo na mesma zona e sector do proxecto que se presenta, coas mesmas persoas destinatarias e co mesmo socio.

k) Planificación/estratexia da entidade para os seguintes anos, na cal se enmarca o proxecto presentado.

l) No caso de que a contraparte ou socio local sexa unha Administración, universidade ou outra entidade pública, deberá presentar:

– Carta de compromiso de participación no proxecto.

– Copia do documento en que se recolla o nomeamento da persoa que exerza actualmente a representación legal. Esta documentación será coincidente coas sinaturas do resto dos documentos relacionados nesta epígrafe.

– Memorias, informes, plans, estratexia e/ou relación de proxectos ou actividades de cooperación para o desenvolvemento e outros traballos relacionados co proxecto presentado.

Carpeta 3. Información relativa ao proxecto.

A información sobre o proxecto presentarase nos seguintes documentos normalizados que se poderán descargar da páxina web da Cooperación Galega https://cooperacion.xunta.gal/

– Formulario de presentación do proxecto, en formato pdf, word ou o correspondente en libre office.

– Orzamento do proxecto, en formato excel ou o correspondente en libre office.

Calquera problema, dúbida ou aclaración poderá formularse directamente ante a Dirección Xeral de Relacións Exteriores e coa Unión Europea ou a través do enderezo electrónico cooperacion.exterior@xunta.gal

5.2. A falta de documentación e/ou información nalgunha das carpetas 1, 2 e 3 impedirá a avaliación do proxecto se non se emenda dentro do prazo establecido no artigo 10 desta orde. Quedará excluído de emenda o non envío ou envío noutro formato dos documentos normalizados de formulación técnica e económica da carpeta 3.

5.3. De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán recadados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, se non se puideran obter os citados documentos, poderáselle solicitar novamente á persoa interesada a súa achega.

5.4. A documentación complementaria deberá presentarse electronicamente.

Se algunha das persoas interesadas presenta a documentación complementaria presencialmente, requiriráselle para que a emende a través da súa presentación electrónica. Para estes efectos considerarase como data de presentación aquela en que fose realizada a emenda.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o cal poderá requirir a exhibición do documento ou da información orixinal.

5.5. Sempre que se realice a presentación de documentos separadamente da solicitude, a persoa interesada ou representante deberá indicar o código e o órgano responsable do procedemento, o número de rexistro de entrada da solicitude e o número do expediente, se se dispón del.

5.6. No caso de que algún dos documentos que se vaian presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no parágrafo anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

Artigo 6. Comprobación de datos

Para a tramitación deste procedemento poderán consultarse automaticamente, tanto da entidade solicitante como da/das entidade/s agrupada/s, de ser o caso, os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

– NIF da entidade solicitante.

– NIF da entidade agrupada, de ser o caso.

– DNI ou NIE da persoa representante.

– Certificado da Axencia Estatal da Administración Tributaria de estar ao día no pagamento das obrigas tributarias para a solicitude de axudas e subvencións.

– Certificado da Tesouraría Xeral da Seguridade Social de estar ao día nos pagamentos.

– Certificado de estar ao día no pagamento das débedas coa Administración pública da Comunidade Autónoma.

– Vixencia dos datos depositados no Rexistro Galego de Axentes de Cooperación para o Desenvolvemento.

– Inhabilitación para obter subvencións e axudas.

– Consulta de concesións ampliadas.

– Consulta de axudas do Estado.

No caso de que as persoas interesadas se opoñan a esta consulta, deberán indicalo no recadro correspondente habilitado nos anexos II e III, de ser o caso, e achegar os documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.

Non obstante o anterior, en aplicación do establecido no artigo 31.7.i) da Lei 9/2007, do 13 de xuño, de subvencións de Galicia, e no artigo 11 do Decreto 11/2009, do 8 de xaneiro, de desenvolvemento da anterior, no caso de entidades sen fins lucrativos bastará coa declaración responsable da persoa solicitante de non estar incursa en ningunha das circunstancias previstas nos números 2 e 3 do artigo 10 da Lei 9/2007, do 13 de xuño, de subvencións de Galicia, na súa normativa de desenvolvemento e no artigo 13 da Lei 38/2003, do 17 de novembro, xeral de subvencións, para acreditar estar ao día nas obrigas tributarias e fronte á Seguridade Social, non ter pendente de pagamento ningunha outra débeda coa Administración pública da Comunidade Autónoma e non ser debedora por resolución de procedencia de reintegro, declaración que se considerará suficiente para os efectos da concesión e pagamento da subvención, de ser o caso.

Artigo 7. Condicións de financiamento

7.1. A Xunta de Galicia poderá financiar ata un 95 % do orzamento total do proxecto, se ben a subvención concedida non superará en ningún caso os 185.000 euros para proxectos plurianuais. Para proxectos cuxa execución estea limitada ao ano 2026 o importe máximo da subvención será de 60.000 euros.

Nos proxectos presentados por unha agrupación de entidades, a subvención concedida non excederá o límite de 240.000 euros. Para proxectos cuxa execución estea limitada ao ano 2026, o importe máximo da subvención será de 100.000 euros.

A contía mínima que a entidade solicitante deberá achegar a través de fondos propios ou doutros nunca poderá comprender financiamento solicitado ou concedido pola Dirección Xeral de Relacións Exteriores e coa Unión Europea, a través de calquera dos medios previstos no V Plan director da cooperación galega.

Aceptarase o financiamento solicitado ou concedido por outros organismos financiadores que sexan distintos da Dirección Xeral de Relacións Exteriores e coa Unión Europea, sempre que en ningún caso a totalidade do proxecto quede financiada con fondos da Xunta de Galicia.

As achegas do resto de financiadores non poderán ser na súa totalidade valorizadas.

7.2. A subvención concedida aos proxectos plurianuais en calquera das súas liñas de subvención, distribuirase o 35 % no 2026 e 65 % no 2027. No caso de que na solicitude de subvención a entidade solicitante non respecte esta porcentaxe, axustarase de oficio pola Administración concedente e comunicarase coa resolución de concesión, e entenderase a súa conformidade coa aceptación posterior da subvención da entidade beneficiaria. Esta distribución non será obrigada no caso da última subvención concedida, a cal poderá acadar unhas porcentaxes diferentes en función do crédito que estea dispoñible para cada anualidade.

7.3. Os xuros que, se é o caso, xeren os fondos transferidos pola Xunta de Galicia, reinvestiranse en custos directos, de xeito que non poderán ser imputados a custos indirectos.

Artigo 8. Gastos do proxecto

8.1. Gastos subvencionables:

1º. Todos os gastos do proxecto deberán cumprir as condicións establecidas neste artigo, con independencia de quen os financie, e consideraranse subvencionables tanto os custos directos como os indirectos, agás no suposto de que as entidades solicitantes posúan ánimo de lucro, caso en que se subvencionarán exclusivamente os custos directos.

2º. Entenderase por custos directos aqueles que son imprescindibles para a posta en marcha do proxecto, vinculados á execución da intervención e que financian a consecución dos obxectivos e que serán os que, a seguir, se relacionan:

a) Aqueles derivados da identificación con perspectiva de xénero da intervención no terreo, sempre que se realice nos tres meses anteriores á data de presentación de solicitudes desta convocatoria. Así mesmo, aqueles gastos derivados da elaboración de liñas de base, que será obrigatoria nos proxectos presentados por fases.

Para que se poidan imputar á subvención solicitada, tanto a identificación como a liña de base deberán ser realizadas por persoal externo ás organizacións beneficiarias; en caso contrario, deberán de ser financiadas coas achegas doutros financiadores.

O importe máximo aplicable por este concepto non poderá superar os 10.000 euros.

b) Terreos e inmobles no país de execución do proxecto (inclúe compra ou arrendamento). No suposto de adquisición de bens inmobles, inclúe os gastos necesarios para a compra de terreos e inmobles e a súa inscrición legal nos rexistros locais de propiedade (impostos, taxas, gastos notariais, licenzas legais, etc.). Debe achegarse un certificado dun taxador/a independente, debidamente acreditado/a e inscrito/a no correspondente rexistro oficial.

Non se poderán imputar nesta partida os gastos de alugueiro ou adquisición da vivenda do persoal expatriado nin dos locais ou sedes da entidade beneficiaria ou do socio local. O arrendamento dos locais da entidade beneficiaria en terreo ou do socio local imputarase na partida de funcionamento.

c) Construción e/ou reforma de inmobles e infraestruturas: inclúe a elaboración do proxecto, planos e estudos técnicos, man de obra, dirección de obra, licenza de obras e taxas, materiais de construción e transporte destes, obras de acceso e instalacións de auga, eléctricas e de saneamento, construción de pozos e sistemas de regadíos, etc. No caso de que a man de obra ligada a estas tarefas sexa achegada pola contraparte local ou a poboación beneficiaria, só se aceptará a súa valoración de estar acreditada de xeito suficiente a prezos do mercado local.

Non se poderán imputar gastos por reformas ou reparacións na vivenda do persoal expatriado nin en locais ou sedes da entidade beneficiaria ou do socio local.

d) Equipos e materiais.

Considerarase equipamento e materiais inventariables a adquisición de elementos de inmobilizado, distintos de terreos e edificios, afectos á actividade subvencionada, como maquinaria, mobiliario, equipos informáticos (hardware e software), dotación de bibliotecas e outro equipamento. Nese concepto inclúense os gastos derivados do envío, traslado e posta en funcionamento dos equipos, taxas aduaneiras ou portuarias, etc. Así mesmo, no caso de proxectos produtivos, inclúese tamén a adquisición de animais, árbores, sementes, etc., e o seu transporte e almacenamento.

Considérase materiais consumibles a adquisición de elementos que se consomen ou usan en prazos inferiores a un ano: material de escritorio, material informático, material de formación, libros, materiais didácticos, materiais sanitarios, reprografías e imprenta, reparacións e mantemento de maquinaria, utensilios, etc. Tamén se inclúe o arrendamento de maquinaria, instalacións e ferramentas necesarias para a execución da intervención.

e) Adquisición de medios de transporte de dúas rodas e de vehículos especializados e vinculados coa actividade subvencionada (como ambulancias, cisternas de auga, tractores, etc.).

f) Persoal. Para os efectos desta convocatoria entenderase por:

Persoal expatriado: aquel persoal da entidade española sometido á lexislación española, que presta os seus servizos no país onde se executa a intervención obxecto da subvención e cuxas funcións e tarefas están directamente relacionadas con aquela.

Persoal local: aquel persoal da contraparte ou socio local ou contratado ao servizo do proxecto, sometido á lexislación laboral do país onde se executa a intervención obxecto da subvención e no cal presta os seus servizos de acordo co réxime laboral correspondente ás súas funcións e desempeño, cuxas funcións e tarefas están directamente relacionadas coa intervención.

Persoal en sede: aquel da entidade en Galicia sometido á lexislación española, que presta os seus servizos en Galicia, con independencia de que por razón das súas funcións teña que desprazarse, ocasional ou regularmente, aos países de execución, e cuxas funcións e tarefas están imputadas á posta en execución e seguimento da intervención obxecto da subvención. En todos os casos a imputación poderá ser total ou parcial en función da dedicación.

A entidade solicitante deberá recorrer, na medida do posible, aos recursos humanos locais.

Os gastos de persoal subvencionables poderán incluír salarios, liquidacións proporcionais ao período imputado ao proxecto, seguros sociais a cargo da entidade do persoal afecto á intervención, así como calquera outro seguro que se subscriba a nome do persoal ou da súa familia en primeiro grao. No caso de imputar como gasto as pagas extras e liquidacións, estas deberán computarse en proporción aos meses que o persoal está imputado ao proxecto.

O importe máximo aplicable por este concepto non poderá superar o 70 % do orzamento total do proxecto, incluído o persoal imputado na partida de custos indirectos, se é o caso. Este límite non será aplicable cando o período de execución do proxecto sexa ampliado en máis de seis meses.

g) Servizos técnicos e profesionais requiridos para a realización de capacitacións, seminarios, diagnósticos, informes, publicacións, control de xestión ou outras necesidades previstas na formulación da intervención (distintos aos de identificación, elaboración de liñas de base, avaliación e auditoría que se imputan nas súas partidas correspondentes). Incluiranse, como achega das entidades solicitantes, as achegas valorizadas do traballo do seu persoal voluntario para realizar os servizos previstos nesta partida.

Tamén se incluirán os gastos derivados de pólizas de seguros de accidente, enfermidade e de responsabilidade civil subscritos a favor do voluntariado da organización que non perciba contraprestación económica e que participe directamente nos proxectos subvencionados, e calquera outro gasto en que puidese incorrer e que estea directamente relacionado coa intervención.

As bolsas de formación que consistan no pagamento da matrícula ou entrega monetaria inclúense nesta epígrafe, igual que outros honorarios entregados pola participación no proxecto. As bolsas de transporte, alimentación ou material incluiranse na epígrafe que corresponda segundo o obxecto da bolsa.

h) Funcionamento no terreo: gastos correntes de funcionamento acaecidos no país de execución e ligados á execución do proxecto. Inclúese o arrendamento de oficinas, electricidade, auga, comunicacións, papelería ou outros gastos de oficina, limpeza, mantemento e seguridade (incluídos os gastos de persoal vinculados a estas actividades), ata un máximo do 4 % do orzamento do proxecto.

i) Viaxes, aloxamento e axudas de custo. Inclúense, entre outros, os gastos vinculados á mobilidade individual ou colectiva do persoal (local, expatriado e en sede), das persoas voluntarias e beneficiarias, necesarios para a execución da intervención (incluídos combustible, seguros, arrendamento e mantemento de vehículos), así como o aloxamento, a manutención das persoas participantes en formacións e capacitacións e, de seren necesarios, os incentivos (monetarios e en especie) ás persoas beneficiarias dos proxectos que sexan membros de comités, redes ou similares, necesarios para a boa execución do proxecto.

j) Avaliación externa con enfoque de xénero obrigatoria ao final da intervención e requirida polas bases desta convocatoria no caso dos proxectos que reciban unha subvención superior a 90.000 euros. A avaliación externa deberá ser realizada por persoa ou entidade de recoñecida experiencia en Galicia ou no país de execución do proxecto. Así mesmo, consideraranse subvencionables aqueles gastos de similar natureza non obrigatorios que se recollan no documento de formulación do proxecto que se xunta coa solicitude de subvención.

Consonte o que establece o artigo 22.1 do Decreto 29/2017, do 9 de marzo, de cooperación para o desenvolvemento, a avaliación externa poderá realizarse logo do remate do prazo de execución do proxecto, nun prazo máximo de tres meses, con independencia de que se supere o termo do correspondente exercicio orzamentario.

A contía máxima que se pode imputar a este concepto non superará os 6.000 euros.

k) Auditoría contable. Financiarase para os axentes de cooperación que non posúan ánimo de lucro. Será obrigatoria para subvencións por importe superior a 50.000 euros e para os proxectos executados por entidades que posúan ánimo de lucro, e opcional no caso de subvencións por importe igual ou inferior a 50.000 euros. O importe máximo imputado a este concepto non excederá os 4.000 euros.

Consonte o que establece o artigo 22.1 do Decreto 29/2017, do 9 de marzo, a auditoría externa poderá realizarse logo do remate do prazo de execución do proxecto, nun prazo máximo de tres meses, con independencia de que se supere o termo do correspondente exercicio orzamentario.

As universidades están exentas da presentación da dita auditoría contable.

As entidades que posúan ánimo de lucro terán a obriga de encargar pola súa conta unha auditoría contable, que deberá ser efectuada por persoal profesional independente inscrito, no caso de persoal español, no Rexistro Oficial de Auditores de Contas (ROAC). As persoas auditoras exercentes no país onde se levará a cabo a revisión consideraranse como tales sempre que no dito país exista un réxime de habilitación para o exercicio da profesión e, se é o caso, sexa preceptiva a obriga de someter á auditoría os seus estados contables. De non existir un sistema de habilitación para o exercicio da profesión, a revisión prevista poderá realizarse por un/unha auditor/a establecido/a no dito país, sempre que a designación deste/a siga uns criterios técnicos que garantan a axeitada calidade.

l) Fondo rotatorio: enténdese por tal a cantidade económica que se emprega como préstamos directos ou en especie ás persoas beneficiarias, que deben ser devoltos por elas nas condicións contractuais que se establezan, destinadas a garantir a súa devolución. Achegarase, en todo caso, o regulamento do funcionamento do fondo. Inclúense os gastos de funcionamento, administración e xestión do fondo. O fondo rotatorio non poderá superar o 9 % do orzamento total.

m) Os gastos financeiros, os gastos de asesoría xurídica ou financeira e os gastos rexistrais e periciais para a realización do proxecto son subvencionables sempre que estean directamente relacionados coa actividade subvencionada e sexan indispensables para a preparación adecuada ou a execución desta, e sempre que non deriven de malas prácticas ou incumprimentos legais. Tamén serán subvencionables os gastos bancarios producidos pola conta do proxecto e os gastos derivados das transferencias bancarias dos fondos ao país de execución do proxecto, os derivados da compulsa de documentos por parte de notarios, autoridades locais ou servizos consulares españois e os gastos de tradución de documentos cando se requira na convocatoria.

3º. Custos indirectos: son os gastos de natureza corrente propios do funcionamento regular da entidade solicitante e da contraparte ou socio local para o sostemento da execución do proxecto, así como da difusión da execución e do seguimento do proxecto en Galicia. O persoal imputado nesta partida computará para o cálculo do límite establecido para gastos de persoal do 70 % do orzamento total.

A porcentaxe máxima aplicable ao concepto de custos indirectos será de ata o 10 % do importe total do orzamento do proxecto.

Estes gastos imputaranse pola entidade beneficiaria á actividade subvencionada na parte que razoablemente corresponda, de acordo cos principios e coas normas de contabilidade xeralmente aceptadas e, en todo caso, na medida en que tales importes correspondan ao período en que efectivamente se realiza a actividade.

Os ditos gastos imputaranse dentro do período de execución da intervención e serán acreditados ante a Dirección Xeral de Relacións Exteriores e coa Unión Europea pola entidade solicitante mediante unha certificación desagregada e detallada dos gastos incluídos e asinada pola persoa que exerza a representación legal.

Se a entidade solicitante é unha entidade con ánimo de lucro, non se subvencionarán os custos indirectos.

4º. Aceptaranse, por parte da entidade solicitante, as achegas en especie ou as valorizacións nos seguintes conceptos:

a) Aqueles derivados da identificación con perspectiva de xénero da intervención no terreo, sempre que se realicen tres meses antes da data de presentación de solicitudes desta convocatoria.

b) Gastos derivados da elaboración de liñas de base nos proxectos executados por fases.

c) Traballo realizado por persoal voluntario: deberase presentar unha estimación xustificada das horas de traballo voluntario que se achegan en cada actividade e o custo suposto (que non deberá exceder os 20 euros por hora). Todo traballo voluntario realizarase baixo a forma de contrato privado, no cal se especifiquen as responsabilidades (deberes e dereitos) de cada unha das partes, destacando o papel do/da voluntario/a no proxecto. No contrato deben constar o nome, os apelidos e o DNI da persoa voluntaria.

5º. Aceptaranse como achegas locais nos conceptos de gasto susceptibles de axuda as achegas monetarias ou en especie e as valorizacións.

Considéranse valorizacións as achegas de terreos, locais, equipos, materiais e servizos por parte da poboación beneficiaria final, socios locais e outras entidades locais distintas das beneficiarias, así como tamén a man de obra das persoas beneficiarias finais directamente vinculadas á execución das actividades orzadas e que, en caso de terreos, locais ou equipos, vaian ser transferidas definitivamente cando acabe a execución, xunto co resto de bens adquiridos con cargo ao proxecto obxecto de axuda. Tamén poden valorarse os bens, o persoal voluntario da contraparte ou socio local e os locais postos temporalmente á disposición da execución directa do proxecto, por un importe equivalente ao alugueiro destes durante o tempo en que sexan utilizados dentro do prazo de execución. Todos estes gastos deberán estar suficientemente acreditados e intrinsecamente vinculados, de maneira exclusiva ou proporcional, á intervención que ten que desenvolverse.

As valorizacións acreditaranse cun certificado da contraparte ou socio local, da poboación beneficiaria final do proxecto ou da entidade que achegue os bens e servizos. Neste certificado, ou nun documento anexo, describirase e cuantificarase a achega, con indicación do número de unidades, horas de traballo, prezos unitarios (se corresponde) e a valoración total.

As valorizacións axustaranse aos prezos de mercado local e, no caso de equipos e bens, deben ter en conta a antigüidade.

6º. Cando o importe do gasto subvencionable supere a contía de 40.000 euros, no suposto de custo por execución de obra, ou de 15.000 euros, no suposto de subministración de bens de equipamento ou prestación de servizos por empresas de consultoría ou asistencia técnica, a entidade beneficiaria deberá solicitar, como mínimo, tres ofertas de diferentes provedores, con carácter previo á contratación do compromiso para a prestación do servizo ou a entrega do ben, salvo que polas especiais características dos gastos subvencionables non exista no mercado suficiente número de entidades que o subministren ou presten, ou salvo que o gasto se realizase con anterioridade á solicitude da subvención. A elección entre as ofertas presentadas, que se deberán achegar na xustificación, ou, de ser o caso, na solicitude da subvención, realizarase conforme a criterios de eficiencia e economía, e deberase xustificar expresamente nunha memoria a elección cando non recaia na proposta económica máis vantaxosa.

7º. No suposto de adquisición, construción, rehabilitación e mellora de bens inventariables, unha vez rematada esta actuación, estes deberán destinarse ao fin concreto para o que se concedeu a subvención, durante dez anos no caso de bens inscritibles nun rexistro público e durante dous anos o resto de bens. Esta afectación no uso e a súa temporalidade deberán figurar na escritura ou documento de adquisición ou cesión que corresponda e debe constar como adquirente, propietario ou cesionario unha Administración pública do país beneficiario, a contraparte ou socio local do proxecto ou as persoas beneficiarias directas. No citado documento deberá mencionarse que estes adquirentes, propietarios ou cesionarios se fan responsables da utilización dos bens para o fin creado e do seu correcto mantemento, como mínimo, durante o período indicado.

No suposto dos bens inscritibles nun rexistro público, deberase facer constar na escritura pública a circunstancia da afectación e o período polo que se afectan os bens, cuestións que deberán ser obxecto de inscrición no rexistro público correspondente.

O incumprimento da devandita obriga de destino, que se producirá en todo caso co alleamento ou o gravame do ben, será causa de reintegro, nos termos establecidos no artigo 33 da Lei 9/2007, do 13 de xuño, de subvencións de Galicia, e no artigo 74 do Decreto 11/2009, do 8 de xaneiro, polo que se aproba o Regulamento da devandita Lei 9/2007, quedando o ben afecto ao pagamento do reintegro, calquera que sexa a persoa ou entidade posuidora, salvo que resulte ser unha terceira protexida pola fe pública rexistral ou se xustifique a adquisición dos bens con boa fe e xusto título, ou en establecemento mercantil ou industrial, no caso de bens mobles non inscritibles.

8º. Permítese a subcontratación nunha porcentaxe non superior ao 60% da actividade subvencionada. Enténdese por subcontratación a concertación con terceiros da execución total ou parcial desta, e queda fóra deste concepto a contratación daqueles gastos en que teña que incorrer a entidade beneficiaria para realizar por si mesma a actividade subvencionada.

8.2. En ningún caso serán gastos subvencionables:

• Os elementos de transporte, a excepción dos vehículos de dúas rodas e vehículos especializados como ambulancias, cisternas de auga, tractores, etc., sempre que estean indefectiblemente vinculados á actividade subvencionada.

• Os gastos de arrendamento ou adquisición da vivenda do persoal expatriado.

• Os xuros debedores das contas bancarias.

• Os xuros, recargas e sancións administrativas e penais.

• Os gastos de procedementos xudiciais.

• As amortizacións de bens inventariables.

• Os gastos en atencións protocolarias (xantares, festas, recepcións, regalos, flores, entradas a espectáculos, etc.).

• Os billetes de avión en primeira clase ou en clase preferente.

• As indemnizacións por despedimento do persoal.

Artigo 9. Criterios e valoración dos proxectos

As prioridades xeográficas e transversais e os ámbitos estratéxicos serán os establecidos no V Plan director da cooperación galega.

9.1. Polo que respecta aos proxectos presentados ás liñas de ONGD e outros axentes que cumpran os requisitos sinalados nestas bases reguladoras, serán avaliados tendo en conta os seguintes criterios:

9.1.1. Aspectos relacionados coa entidade solicitante: ata 17 puntos.

1. Experiencia relevante en accións de cooperación para o desenvolvemento (no sector de actuación do proxecto e no país, zona, comunidade onde se vai executar, co mesmo socio local ou poboación destinataria) suficientemente descrita nas carpetas 1 e 3, para os obxectivos e características do proxecto. Máximo: 4 puntos.

2. Capacidade de execución do proxecto pola entidade (xestión, recursos humanos capacitados para desenvolver o seu traballo con perspectiva de xénero e baixo o resto das prioridades transversais recollidas no V Plan director da cooperación galega e recursos técnicos e económicos para o desenvolvemento do proxecto). Máximo: 5 puntos.

3. Estratexia de cooperación da entidade e, no caso de empresas e agrupacións empresariais, o Plan de responsabilidade social corporativa (carpeta 1) en que se insira a proposta presentada e que incorpore a perspectiva de xénero e/ou a política de xénero da entidade, así como o resto de prioridades transversais recollidas no V Plan director da cooperación galega para os vindeiros anos. Máximo: 3 puntos.

4. Contribución da entidade solicitante ao fomento do sector galego de cooperación (valoraranse o traballo e a presenza en Galicia, o acomodo ás liñas estratéxicas da cooperación Galega e a participación acreditada en redes). Máximo: 2 puntos.

5. Presentación da proposta en agrupación de entidades. Terase en conta o valor engadido da agrupación ao proxecto, así como a repartición coherente e xustificada da participación de cada unha das entidades agrupadas. Máximo: 2 puntos.

6. Achega financeira da entidade solicitante ao proxecto, tanto no referido a fondos propios como obtidos doutros financiadores . Esta deberá ser dun mínimo do 5% para ser puntuada e non se valorarán as achegas en especie ou valorizadas. Máximo: 1 punto.

9.1.2. Aspectos relacionados co socio local: ata 17 puntos.

1. Experiencia de traballo en proxectos de cooperación para o desenvolvemento na zona ou comunidade onde se vai executar o proxecto e no sector de actuación deste, descrita suficientemente nas carpetas 2 e 3 para os obxectivos e as características do proxecto. Máximo: 5 puntos.

2. Capacidade de execución do proxecto pola contraparte ou socio local. Garantía de implicación da entidade na comunidade e da propia comunidade no proxecto mediante a intervención do socio local. Adecuación e coherencia no sector de traballo da entidade e o obxectivo do proxecto. Máximo: 5 puntos.

3. Estratexia en que se enmarque o proxecto para os seguintes anos. Máximo: 2 puntos.

4. Participación en redes, foros, espazos locais ou internacionais no ámbito do sector de actuación do proxecto debidamente acreditada. Máximo: 2 puntos.

5. Participación no proxecto xunto con outras organizacións ou institucións locais especialmente no caso dos titulares de obrigas e responsabilidades e se existen convenios de colaboración ou compromisos de participación deles. Máximo: 2 puntos.

6. Achega financeira do socio local ao proxecto. Esta deberá ser dun mínimo do 5 % para ser puntuada e non se valorarán as achegas en especie ou valorizadas. Máximo: 1 punto.

9.1.3. Aspectos relacionados co contido do proxecto: ata 50 puntos.

1. Pertinencia do proxecto baixo o enfoque de dereitos, con especial concreción sobre o contexto social, económico, político e cultural das persoas ou institucións destinatarias, atendendo especificamente á situación de homes e mulleres, zona, país e sector onde se vai desenvolver, os seus antecedentes e a xustificación do proxecto. Máximo: 5 puntos.

2. Coherencia dos obxectivos e resultados coa problemática presentada e a análise de alternativas realizada, tomando en consideración o enfoque de dereitos e a repartición de obrigas e responsabilidades. Máximo: 5 puntos.

3. Intervencións integradas en estratexias ou proxectos dos axentes con marcos de planificación a medio prazo ou que dean continuidade a intervencións previas, ou que sexan sinérxicas con outras no terreo. Valorarase xustificar adecuadamente a necesidade de continuidade, así como as sinerxías concretas establecidas. Máximo: 3 puntos.

4. Viabilidade do proxecto tendo en conta as políticas de apoio, aspectos institucionais, aspectos socioculturais, enfoque de xénero, factores tecnolóxicos, ambientais e económico-financeiros. Máximo: 4 puntos.

5. Poboación beneficiaria: descrición precisa das persoas destinatarias (titulares de dereitos, obrigas e responsabilidades), criterios de identificación e selección, grao de participación nas distintas fases do proxecto e mecanismos previstos para a súa apropiación. Valorarase o traballo cos colectivos prioritarios establecidos no V Plan director da cooperación galega. Máximo: 5 puntos.

6. Accións que se van desenvolver, metodoloxías empregadas para fomentar a participación, a apropiación, o apoderamento e fortalecemento. Prazo de execución e coherencia na programación temporal. Máximo: 3 puntos.

7. Financiamento: coherencia das partidas orzamentarias cos obxectivos, resultados ou produtos do proxecto, tendo en conta o contexto de intervención. Valorarase a achega de pro formas ou táboas de prezos que permitan contrastar importes. Máximo: 4 puntos.

8. Consideración das condicións previas necesarias para a posta en marcha do proxecto, definición adecuada dos riscos e das medidas de control establecidas de cara á súa monitorización e á súa mitigación. Máximo: 2 puntos.

9. Aliñamento coas políticas do país de intervención e inserción do proxecto nas estratexias de planificación de desenvolvemento de carácter público. Máximo: 3 puntos.

10. Contribución e complementariedade cos instrumentos de planificación da cooperación española, particularmente no caso dos MAP e dos ACA. Valorarase, especificamente, a incorporación dos indicadores dos MAP e a súa medición nas propostas presentadas. Máximo: 1,5 puntos.

11. Transversalización de enfoques. Definición e incorporación dos enfoques transversais relevantes e tomados en consideración na intervención. Valorarase especificar as medidas e metodoloxías de incorporación e, de ser o caso, o orzamento específico destinado a cada un dos enfoques. Máximo: 3,5 puntos.

12. Recursos humanos, técnicos e materiais suficientes e adecuados para acadar os obxectivos do proxecto. Valorarase achegar o CV do persoal vinculado así como xustificar a súa necesidade, e os TDR dos servizos planificados. Máximo: 3 puntos.

13. Seguimento e avaliación previstos (internos e externos) adaptados ao contexto de intervención. Máximo: 3 puntos.

14. Sustentabilidade: valorarase a incorporación de medidas que garantan o mantemento dos resultados e produtos mais alá do período de execución e financiamento, e a garantía de transferencia a unha Administración pública do país beneficiario, a unha contraparte ou socio local ou á poboación destinataria dos inmobles, equipamentos, financiados con cargo ao proxecto. Máximo: 2 puntos.

15. Contribución aos ODS e ás súas metas, concretando o seu financiamento e valorando a existencia de mecanismos de coordinación e comunicación coas institucións e sistemas encargados da súa medición e seguimento no país de intervención. Máximo: 2 puntos.

16. Difusión do proxecto en Galicia. Máximo: 1 punto.

9.1.4. Coincidencia do proxecto coa estratexia da Cooperación Galega. Máximo: 16 puntos.

1. País prioritario para a Cooperación Galega, país PMA ou con IDH baixo. Máximo: 5 puntos.

2. Ámbitos estratéxicos da Cooperación Galega. Máximo: 9 puntos, que poderán ser acadados por un só ámbito ou entre varios deles.

AE 1. Promover o exercicio dos dereitos sociais básicos (saúde, educación, alimentación, hábitat e auga e saneamento básico) por parte das persoas e colectivos máis pobres e vulnerables.

AE 2. Apoiar a agricultura, a pesca e a acuicultura sustentables cun enfoque de soberanía alimentaria, preservando os recursos naturais no marco de modelos de desenvolvemento rural e territorial integrados, inclusivos, solidarios e redistributivos para unha prosperidade compartida.

AE 3. Impulsar a igualdade de xénero cun enfoque feminista interseccional e de diversidades, o apoderamento e o exercicio de dereitos das nenas, adolescentes e mulleres, e o fortalecemento das súas organizacións.

AE 4. Promover a garantía e a defensa dos dereitos humanos, a democracia e o fortalecemento da sociedade civil organizada.

AE 5. Loitar contra o cambio climático e promover a sustentabilidade e a xustiza ambientais.

AE 6. Protexer e salvar vidas, aliviar o sufrimento e manter a dignidade humana respondendo ás crises humanitarias con eficacia e calidade, e cunha perspectiva de redución de vulnerabilidades e fomento da resiliencia.

AE 7. Construír unha cidadanía global comprometida coa transformación social positiva, a solidariedade e o desenvolvemento humano sustentable.

3. Complementariedade e sinerxías con intervencións directas da Cooperación Galega, especialmente coas estruturas integradas de desenvolvemento (IDI República Dominicana, IDI Guatemala, Aqua-Moz, Acuipesca-Perú e Peixan MZ). Máximo: 2 puntos.

9.2 Polo que respecta aos proxectos presentados á liña de apoio a organizacións feministas e de defensa dos dereitos das mulleres que cumpran os requisitos sinalados nestas bases reguladoras, serán avaliados tendo en conta os seguintes criterios:

9.2.1. Aspectos relacionados coa entidade solicitante: ata 21 puntos.

1. Experiencia relevante en accións no marco do feminismo, a igualdade de xénero e os dereitos humanos das mulleres (no sector de actuación do proxecto e no país, zona, comunidade onde se vai executar, coa mesma socia local ou poboación destinataria) suficientemente descrita nas carpetas 1 e 3, para os obxectivos e as características do proxecto. Máximo: 5 puntos.

2. Capacidade de execución do proxecto pola entidade (xestión, recursos humanos capacitados para desenvolver o seu traballo con perspectiva de xénero e feminista, presenza de mulleres nos órganos directivos da entidade, política de xénero, traxectoria no marco do feminismo, da igualdade de xénero e dos dereitos humanos das mulleres). Máximo: 5 puntos.

3. Estratexia e compromiso institucional co enfoque feminista, interseccional e de xénero. Valorarase contar con plans estratéxicos de xénero, plans de igualdade, política de xénero... Máximo: 3 puntos.

4. Alianzas estratéxicas e participación activa en movementos e redes (locais, nacionais ou internacionais) feministas, de igualdade de xénero e de defensa dos dereitos das mulleres, adecuadamente acreditada. Máximo: 3 puntos.

5. Contribución da entidade solicitante ao fomento do sector galego de cooperación (valorando o traballo e a presenza en Galicia, a acreditación de participación en redes, o acomodo ás liñas estratéxicas da cooperación). Máximo: 2 puntos.

6. Presentación da proposta en agrupación de entidades. Terase en conta o valor engadido da agrupación ao proxecto, así como a repartición coherente e xustificada da participación de cada unha das entidades agrupadas. Máximo: 2 puntos.

7. Achega financeira da entidade solicitante ao proxecto, tanto no referido a fondos propios como obtidos doutros financiadores. Esta deberá ser dun mínimo do 5 % para ser puntuada e non se valorarán as achegas en especie ou valorizadas. Máximo: 1 punto.

9.2.2. Aspectos relacionados coa socia local: ata 22 puntos.

1. Experiencia de traballo no marco do feminismo, a igualdade de xénero e os dereitos humanos das mulleres (no sector de actuación do proxecto e no país, zona, comunidade onde se vai executar, coa mesma socia ou poboación destinataria) suficientemente descrita nas carpetas 2 e 3, para os obxectivos e as características do proxecto. Máximo: 5 puntos.

2. Capacidade de execución do proxecto pola entidade (xestión, recursos humanos capacitados para desenvolver o seu traballo con perspectiva de xénero, presenza de mulleres nos órganos directivos da entidade, política de xénero, traxectoria no marco do feminismo, da igualdade de xénero e dos dereitos humanos das mulleres). Máximo: 5 puntos.

3. Estratexia e compromiso institucional co enfoque feminista e de xénero. Valorarase contar con plans estratéxicos de xénero, plans de igualdade, política de xénero... Máximo: 4 puntos.

4. Participación en redes, foros, movementos, espazos locais ou internacionais de igualdade de xénero, feminismos e defensa dos dereitos das mulleres, adecuadamente acreditada. Máximo: 4 puntos.

5. Participación no proxecto xunto con outras organizacións ou institucións locais, nacionais e/ou internacionais, que garantan unha mellor execución da proposta, especialmente no caso dos titulares de obrigas e responsabilidades naqueles contextos en que se poida traballar conxuntamente. Valorarase a existencia de convenios de colaboración ou compromisos de participación. Máximo: 3 puntos.

6. Achega financeira do socio local ao proxecto. Esta deberá ser dun mínimo do 5 % para ser puntuada e non se valorarán as achegas en especie ou valorizadas. Máximo: 1 punto.

9.2.3. Aspectos relacionados co contido do proxecto: ata 47 puntos.

1. Pertinencia do proxecto baixo o enfoque feminista e de xénero, con especial concreción da análise integrada do contexto da desigualdade de xénero (desigualdades e discriminacións de xénero máis relevantes, necesidades prácticas e intereses estratéxicos de xénero dos colectivos destinatarios, acceso e control de recursos e beneficios, división sexual do traballo, interseccionalidades...) e do contexto de vulneración de dereitos, tamén diferenciado por xénero, no lugar de execución (análise do estado de dereito ou dereitos a priorizar, causas estruturais da súa vulneración, análises de fendas de capacidades). Máximo: 5 puntos.

2. Coherencia dos obxectivos e resultados coa problemática presentada e a análise de alternativas realizada, tomando en consideración as causas estruturais da desigualdade entre homes e mulleres, e que estean encamiñados a transformar as desigualdades existentes e a mellorar o exercicio dos dereitos das mulleres. Máximo: 5 puntos.

3. Intervencións integradas en estratexias ou proxectos dos axentes con marcos de planificación a medio prazo, ou que dean continuidade a intervencións previas ou sexan sinérxicas con outras no terreo. Valorarase xustificar adecuadamente a necesidade de continuidade, así como as sinerxías concretas establecidas. Máximo: 4 puntos.

4. Viabilidade do proxecto tendo en conta as políticas de apoio, os aspectos institucionais, os aspectos socioculturais, os factores de xénero, os factores tecnolóxicos, ambientais e económico-financeiros. Máximo: 3 puntos.

5. Poboación destinataria: descrición precisa das persoas e/ou colectivos de mulleres destinatarias, criterios de identificación e selección, grao de participación nas distintas fases do proxecto e mecanismos previstos para a súa apropiación. Valorarase que a intervención vaia dirixida a colectivos de mulleres con dereitos potencialmente vulnerados, así como que estes colectivos teñan unha participación efectiva en todo o ciclo do proxecto. Máximo: 5 puntos.

6. Accións que se van desenvolver, metodoloxías empregadas para fomentar a participación, a apropiación, o protagonismo das mulleres e/ou o fortalecemento das súas organizacións, das súas axendas e enfoques. Prazo de execución e coherencia na programación temporal. Máximo: 4 puntos.

7. Financiamento: coherencia das partidas orzamentarias cos obxectivos, resultados ou produtos do proxecto, tendo en conta o contexto de intervención. Valorarase a achega de pro formas ou táboas de prezos que permitan contrastar importes. Máximo: 4 puntos.

8. Consideración das condicións previas necesarias para a posta en marcha do proxecto, definición adecuada dos riscos e das medidas de control establecidas de cara á súa monitorización e á súa mitigación. Máximo: 3 puntos.

9. Aliñamento coas políticas do país de intervención e inserción do proxecto nas estratexias de planificación de desenvolvemento de carácter público, coa Plataforma de Acción de Beixing, coa CEDAW e coa resolución 1325 e posteriores do Consello de Seguridade da ONU relativas á mulleres, á paz e á seguridade. Máximo: 3 puntos.

10. Contribución e complementariedade cos instrumentos de planificación da cooperación española, particularmente no caso dos MAP e dos ACA. Máximo: 1 punto.

11. Recursos humanos, técnicos e materiais suficientes e adecuados para acadar os obxectivos do proxecto. Valorarase achegar o CV do persoal vinculado así como xustificar a súa necesidade, e os TDR dos servizos planificados. Máximo: 3 puntos.

12. Seguimento e avaliación previstos (internos e externos) adaptados ao contexto da intervención e nos cales participen os colectivos de mulleres protagonistas. Máximo: 3 puntos.

13. Sustentabilidade: valorarase a incorporación de medidas que garantan o mantemento dos resultados e produtos mais alá do período de execución e financiamento, e a garantía de transferencia a unha Administración pública do país destinatario, a unha contraparte ou socia local ou á poboación destinataria dos inmobles, equipamentos, financiados con cargo ao proxecto. Máximo: 2 puntos.

14. Contribución aos ODS e ás súas metas, concretando o seu financiamento e valorando a existencia de mecanismos de coordinación e comunicación coas institucións e sistemas encargadas da súa medición e seguimento no país de intervención. Máximo: 1 punto.

15. Difusión do proxecto en Galicia. Máximo: 1 punto.

9.2.4. Coincidencia do proxecto coa Cooperación Galega. Máximo: 10 puntos.

1. País prioritario para a Cooperación Galega, país PMA ou con IDH baixo. Máximo: 5 puntos.

2. Acomodo ao AE 3 Impulsar a igualdade de xénero cun enfoque feminista interseccional e de diversidades, o apoderamento e o exercicio de dereitos das nenas, adolescentes e mulleres, e o fortalecemento das súas organizacións. A través da posta en marcha de proxectos que (máximo 5 puntos):

– Melloren a autonomía e o desenvolvemento persoal, laboral, político e social das mulleres.

– Fortalezan o movemento feminista e as organizacións de mulleres e o cumprimento das súas axendas e estratexias.

– Cuestionen e dean resposta a relacións de poder desiguais entre homes e mulleres.

– Propoñan cambios no acceso e control dos recursos e no poder de toma de decisións.

– Fagan visíbeis alternativas que poñen no centro a sostibilidade da vida, o dereito ao coidado e ao autocoidado.

– Encamiñados a erradicar a violencia contra as mulleres.

– Buscan acabar con prácticas que prexudican e discriminan ás mulleres (como a mutilación xenital, as unións matrimoniais temperás...).

– Cuestionen as estruturas globais de iniquidade e os modelos baseados na explotación e a desigualdade.

Artigo 10. Instrución

A instrución do procedemento corresponderá á Subdirección Xeral de Cooperación Exterior. Unha vez recibidas e examinadas as solicitudes, se estas non reúnen os requisitos sinalados ou carecen de documentación, requiriranse as entidades interesadas para que, nun prazo de dez días, corrixan a falta ou acompañen os documentos preceptivos, con indicación de que, se así non o fixesen, desistirán da súa petición, logo dunha resolución que deberá ser ditada nos termos previstos nos artigos 21, 22 e 23 da Lei 39/2015, do 1 de outubro, do procedemento administrativo común das administracións públicas.

Artigo 11. Notificacións

11.1. As notificacións de resolucións e actos administrativos efectuaranse só por medios electrónicos, nos termos previstos na normativa reguladora do procedemento administrativo común.

11.2. De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas efectuaranse mediante a comparecencia na sede electrónica da Xunta de Galicia e a través do Sistema de notificación electrónica de Galicia-Notifica.gal. Este sistema remitiralles ás persoas interesadas avisos da posta á disposición das notificacións á conta de correo e/ou teléfono móbil que consten na solicitude. Estes avisos non terán, en ningún caso, efectos de notificación efectuada e a súa falta non impedirá que a notificación sexa considerada plenamente válida.

11.3. De conformidade co artigo 47 da Lei 4/2019, do 17 de xullo, de administración dixital de Galicia, as persoas interesadas deberán crear e manter o seu enderezo electrónico habilitado único a través do Sistema de notificación electrónica de Galicia-Notifica.gal, dispoñible a través da sede electrónica da Xunta de Galicia (https://sede.xunta.gal) para todos os procedementos tramitados pola Administración xeral e as entidades instrumentais do sector público autonómico. En todo caso, a Administración xeral e as entidades do sector público autonómico de Galicia poderán crear de oficio o indicado enderezo, para os efectos de asegurar o cumprimento por parte das persoas interesadas da súa obriga de relacionarse por medios electrónicos.

11.4. As notificacións entenderanse efectuadas no momento en que se produza o acceso ao seu contido, e rexeitadas cando transcorresen dez días naturais desde a posta á disposición da notificación sen que se acceda ao seu contido.

11.5. Se o envío da notificación electrónica non fora posible por problemas técnicos, efectuarase a notificación polos medios previstos na normativa reguladora do procedemento administrativo común.

Artigo 12. Trámites administrativos posteriores á presentación de solicitudes

Todos os trámites administrativos que as persoas interesadas deban realizar tras a presentación da solicitude deberán ser realizados electronicamente accedendo á Carpeta cidadá da persoa interesada, dispoñible na sede electrónica da Xunta de Galicia.

Artigo 13. Valoración das solicitudes

13.1. Para a súa valoración constituirase una comisión avaliadora, que adaptará o seu funcionamento ao previsto nesta convocatoria e, supletoriamente, aos preceptos contidos no título preliminar, capítulo II, sección 3ª, artigos 15 e seguintes da Lei 40/2015, do 1 de outubro, de réxime xurídico do sector público.

A Comisión estará integrada polas seguintes persoas:

– Presidente/a: a persoa titular da Subdirección Xeral de Cooperación Exterior.

– Secretario/a: un/unha funcionario/a da Dirección Xeral de Relacións Exteriores e coa Unión Europea.

– Vogais: dous/dúas funcionarios/as da Dirección Xeral de Relacións Exteriores e coa Unión Europea.

A Comisión, para unha mellor valoración dos proxectos e con anterioridade a ditarse a proposta de resolución, poderá solicitar os informes técnicos que se consideren oportunos. Os devanditos informes, que en ningún caso serán vinculantes, de encargarse, terán que ser realizados por persoas expertas independentes non vinculadas a ningún dos axentes de cooperación.

As persoas que interveñan na Comisión de Valoración manifestarán de forma expresa a ausencia de conflitos de intereses e non poderán participar na comisión, persoas en que exista o devandito conflito.

13.2. Para superar a fase de valoración dos proxectos de cooperación no exterior será necesario acadar unha puntuación mínima do 50 % nas epígrafes I Entidade solicitante (9.1.1 e 9.2.1) e II Socio local (9.1.2 e 9.2.2), e do 50 % na epígrafe III Proxecto (9.1.3 e 9.2.3).

Amais do anterior, será necesario acadar unha puntuación mínima de 4 puntos entre a suma dos criterios de pertinencia e coherencia, en calquera das liñas de financiamento.

No caso de empate na puntuación total obtida, este resolverase aplicando por orde os seguintes criterios:

– A maior puntuación obtida na valoración do proxecto.

– A maior puntuación obtida na valoración da entidade solicitante.

– A maior puntuación obtida na valoración da contraparte ou socio local.

Unha vez superada a fase de avaliación, estableceranse tres listaxes, unha para cada unha das liñas de actuación indicadas no artigo único punto 1 da presente convocatoria, coas puntuacións obtidas polos proxectos presentados en orde descendente. Serán financiados por orde de puntuación todos aqueles que sexa posible.

13.3. Cando da prelación dos proxectos avaliados resulte que o último proxecto con financiamento non acade a totalidade da subvención solicitada, a Comisión de Avaliación, en virtude do artigo 25 da Lei 9/2007, do 13 de xuño, instará a entidade beneficiaria á reformulación da súa solicitude para axustar os compromisos e condicións á subvención outorgable, a cal será novamente avaliada pola dita comisión para os efectos de comprobar que se respecten o obxecto, as condicións e a finalidade da subvención, así como os criterios de valoración establecidos respecto das solicitudes ou peticións.

13.4. No suposto de que non se esgotasen os recursos financeiros asignados a esta convocatoria, a Xunta de Galicia empregará os devanditos recursos para financiar outras actuacións de cooperación para o desenvolvemento a través dos outros medios previstos no V Plan director da cooperación galega e de conformidade co establecido na Lei de réxime orzamentario de Galicia e nas leis anuais de orzamentos.

Artigo 14. Prazo de resolución

O prazo de resolución e notificación será de catro meses, como máximo, contados desde o día seguinte ao de finalización do prazo de presentación de solicitudes. De non notificarse resolución expresa neste prazo, as solicitudes daranse por desestimadas.

Artigo 15. Resolución

En vista da proposta de resolución do instrutor debidamente motivada, o órgano competente, por delegación do conselleiro de Presidencia, Xustiza e Deportes, resolverá o procedente.

Artigo 16. Compatibilidade de subvencións

As axudas aquí reguladas serán compatibles con calquera outra procedente doutras administracións públicas, organizacións internacionais, entidades privadas non lucrativas ou doazóns de particulares, sempre e cando a suma de todas as obtidas non supere o custo do proxecto subvencionado.

A entidade beneficiaria obrígase a comunicarlle ao órgano concedente a obtención doutras subvencións, axudas, ingresos ou recursos que financien as actividades subvencionadas, así como a modificación das circunstancias que fundamentasen a concesión. Esta comunicación deberase efectuar no momento en que se coñeza e, en todo caso, con anterioridade á xustificación da aplicación dada aos fondos percibidos.

Artigo 17. Aceptación da subvención e compromiso de financiamento

Unha vez notificada a concesión da axuda, a entidade beneficiaria presentará, nun prazo máximo de dez días, pola sede electrónica accedendo á Carpeta cidadá, unha declaración por escrito da aceptación da axuda na cal conste o seu compromiso de achegar directamente ou cubrir con outras achegas a diferenza entre o custo total do proxecto e a contía da subvención finalmente concedida. Transcorrido o devandito prazo sen que se produza a manifestación expresa, entenderase tacitamente aceptada, de acordo co establecido no artigo 21.5 da Lei 9/2007, do 13 de xuño, de subvencións de Galicia. Igualmente deberá confirmar, se é o caso, que as subvencións solicitadas a outras institucións xa foron concedidas, ou ben que se compromete a financiar as cantidades adicionais que correspondan.

Así mesmo, a entidade beneficiaria poderá, dentro do mesmo prazo, renunciar á axuda ou presentar unha readaptación á subvención concedida, sempre que tecnicamente sexa posible e non altere a finalidade nin o orzamento total do proxecto aprobado. Esta solicitude de readaptación será sometida a unha nova análise para os efectos de comprobar que non afecte a orde de prelación dos proxectos subvencionados. Logo das comprobacións pertinentes, ditarase de novo unha resolución polo mesmo órgano que ditou a resolución inicial, a cal lle será notificada á entidade no prazo dun mes.

De producirse renuncias ás subvencións ou revogacións das axudas, os seus importes poderán destinarse a incrementar a axuda inicialmente concedida a outros proxectos ou ben a subvencionar os que, reunindo os requisitos destas bases reguladoras e inicialmente non subvencionados, quedasen sen financiamento ou este non acadase a totalidade da subvención solicitada.

Artigo 18. Anticipos

18.1. Con base na disposición adicional segunda da Lei 9/2007, do 13 de xuño, de subvencións de Galicia, e no artigo 94.3.a) da Lei 10/2021, do 9 de marzo, reguladora da acción exterior e da cooperación para o desenvolvemento de Galicia, realizaranse pagamentos anticipados do 100 % da anualidade de que se trate mediante unha resolución motivada e sen necesidade de exixir garantía, e será obrigatorio presentar un informe técnico de seguimento na primeira anualidade e o informe técnico final na segunda anualidade, nos termos establecidos no artigo seguinte.

18.2. Para o pagamento do anticipo da subvención, as entidades beneficiarias deberán presentar o anexo IV desta orde asinado dixitalmente polo/a representante legal da entidade, xunto coa ficha de datos estatísticos do proxecto que se poderá descargar da páxina web da Cooperación Galega https://cooperacion.xunta.gal/

No caso de subvencións outorgadas a entidade/s agrupada/s, aquelas distintas da solicitante deberán achegar o anexo III de declaración do artigo 10 da Lei de subvencións para entidades agrupadas distintas da solicitante, actualizado, ou os documentos que acrediten as ditas circunstancias.

18.3. No caso de proxectos plurianuais, para o pagamento da subvención concedida na segunda anualidade e unha vez executada e xustificada a subvención concedida na primeira anualidade, polo menos nunha porcentaxe dun 75 %, en virtude do disposto no artigo 94.3.b) da Lei 10/2021, do 9 de marzo, reguladora da acción exterior e da cooperación para o desenvolvemento de Galicia, e de acordo coas previsións do artigo 19.4 destas bases reguladoras, as entidades beneficiarias deberán presentar o anexo VI da solicitude do pagamento anticipado da contía concedida para esta anualidade, asinado dixitalmente polo/a representante legal da entidade.

No caso de subvencións outorgadas a entidade/s agrupada/s, aquelas distintas da solicitante deberán achegar o anexo III da declaración do artigo 10 da Lei de subvencións para entidades agrupadas distintas da solicitante, actualizado, ou os documentos que acrediten as ditas circunstancias.

Artigo 19. Prazo e forma de xustificación das subvencións outorgadas

19.1. Con base no que establece o artigo 94.3 da Lei 10/2021, do 9 de marzo, reguladora da acción exterior e da cooperación para o desenvolvemento de Galicia, e a disposición adicional segunda da Lei 9/2007, do 13 de xuño, de subvencións de Galicia, co fin de lograr unha maior eficacia e eficiencia dos fondos públicos e considerando a natureza dos proxectos e as características dos destinatarios, a xustificación destas subvencións rexerase polo previsto nos puntos seguintes. A xustificación dos proxectos realizarase sobre o seu custo total, incluídas, de ser o caso, as cantidades xeradas polo cambio no mercado monetario e os xuros bancarios.

19.2. As subvencións concedidas para proxectos que teñan un período de execución comprendido no exercicio corrente deberán ser xustificadas coa presentación do anexo VII xunto coa documentación que se sinala no punto quinto deste artigo. O prazo de entrega da dita documentación será de tres meses desde a finalización do prazo para a realización das actividades do proxecto subvencionado, conforme o establecido no artigo 94.3.d) da Lei 10/2021, do 9 de marzo, reguladora da acción exterior e da cooperación para o desenvolvemento de Galicia, e no artigo 28.2 da Lei 9/2007, do 13 de xuño, de subvencións de Galicia, e con data límite do 31 de marzo de 2027.

Os proxectos con subvención plurianual xustificarán cada anualidade independentemente. A primeira anualidade dentro do primeiro trimestre do ano seguinte, coa documentación que se sinala no punto cuarto deste artigo, e a segunda anualidade, coa documentación que se sinala no punto quinto deste artigo, con data máxima do 31 de marzo de 2028, en virtude do establecido no artigo 94.3.d) da Lei 10/2021, do 9 de marzo, reguladora da acción exterior e da cooperación para o desenvolvemento de Galicia, e conforme o establecido no artigo 28.2 da Lei 9/2007, do 13 de xuño, de subvencións de Galicia.

19.3. Para a presentación dos informes técnicos de seguimento e final deberá utilizarse o modelo facilitado pola Dirección Xeral de Relación Exteriores e coa Unión Europea da Xunta de Galicia, que se poderá descargar da páxina web https://cooperacion.xunta.gal/

19.4. Para a xustificación da primeira anualidade, a entidade beneficiaria deberá presentar o escrito de presentación da xustificación no modelo que figura como anexo V xunto cos seguintes documentos:

a) Certificación acreditativa da execución do proxecto de conformidade co previsto e da aplicación dos fondos ao fin destinado, asinada dixitalmente polo/a representante legal da entidade.

b) Informe técnico de seguimento sobre o estado de execución do proxecto, que deberá estar asinado dixitalmente pola persoa responsable da xestión técnico-económica do proxecto en Galicia.

c) Certificación dos gastos do proxecto na primeira anualidade, por partidas orzamentarias e na cal se indiquen as distintas fontes de financiamento, asinada dixitalmente pola persoa que exerza a representación legal da entidade beneficiaria.

d) Certificado de custos indirectos, asinado dixitalmente pola persoa que exerza a representación legal da entidade beneficiaria.

e) Relación de todos os gastos efectuados, con indicación da data, número da factura ou do documento xustificativo, identificación do seu emisor, data e forma de pagamento e descrición do gasto, co seu importe en moeda local e o seu contravalor en euros.

f) Documento da liña base, de ser o caso.

19.5. Para a xustificación final do proxecto e co fin de acreditar a realización total das actividades, así como a finalidade para a cal se concedeu a subvención, a entidade beneficiaria deberá presentar o anexo VII xunto tanto coa xustificación técnica como da económica, coa documentación que se sinala a seguir:

19.5.1. Xustificación técnica. Integrada polos seguintes documentos:

– Certificación acreditativa da total realización do proxecto e da aplicación dos fondos ao fin destinado, asinada dixitalmente pola persoa que exerza a representación legal da entidade beneficiaria.

– Informe técnico final de execución sobre os obxectivos, actividades e resultados acadados polo proxecto, que indicará, co máximo detalle, os obxectivos conseguidos, os resultados obtidos, as actividades realizadas, o proceso de transferencia e a xestión das intervencións despois da súa finalización, así como a análise da súa sustentabilidade futura. Deberá estar asinado dixitalmente pola persoa responsable da xestión técnico-económica do proxecto en Galicia.

Esta xustificación permitirá constatar e verificar o cumprimento dos requisitos técnicos fixados na presente orde de bases, e entenderase suficiente para os efectos do establecido no artigo 45.5 do Decreto 11/2009, do 8 de xaneiro.

19.5.2. Xustificación económica e de resultados. Comprenderá toda a documentación que acredite os gastos efectuados con cargo á subvención concedida e ao resto de financiadores, así como a de avaliación externa de resultados que se recolla no documento de formulación que vai xunto coa solicitude de subvención e o documento da liña base, no caso de non telo achegado na xustificación intermedia. Incorporarase tamén a táboa de medición dos indicadores de rendición de contas (IRC).

A xustificación económica realizarase mediante a forma de conta xustificativa, sen prexuízo do establecido nos números 19.5.3 e 19.5.4 en relación coas universidades e as axencias ou organismos internacionais das Nacións Unidas, que se rexerán polo establecido neles, e incluirá a declaración das actividades realizadas, o seu custo total e desagregado, e irá xunto con toda a documentación que acredite os gastos efectuados con cargo á subvención concedida.

A conta xustificativa poderá ser:

– Conta xustificativa con achega de xustificantes de gastos, no caso de subvencións por importe igual ou inferior a 50.000 euros. Exceptúanse desta modalidade de xustificación os proxectos executados por entidades que posúan ánimo de lucro.

– Conta xustificativa con entrega do informe do auditor/a, obrigatoria para subvencións por importe superior a 50.000 euros e para os proxectos executados por entidades que posúan ánimo de lucro, e opcional no caso de subvencións por importe igual ou inferior a 50.000 euros.

1. A conta xustificativa con achega de xustificantes de gastos incluirá:

a) Certificación dos gastos polo importe total do proxecto, distribuída por partidas orzamentarias e na cal se indiquen as distintas fontes de financiamento, asinada dixitalmente pola persoa que exerza a representación legal da entidade beneficiaria.

b) Certificado desagregado e detallado de custos indirectos, asinado dixitalmente pola persoa que exerza a representación legal da entidade beneficiaria.

c) Relación de todos os gastos efectuados, con indicación da data e do número da factura ou do documento xustificativo do gasto, identificación do seu emisor, da data e forma de pagamento e descrición do gasto, co seu importe en moeda local e o seu equivalente en euros.

d) Facturas ou documentos xustificativos dos gastos de valor probatorio equivalente no tráfico xurídico mercantil ou con eficacia administrativa que estean incorporados na relación a que se fai referencia no parágrafo anterior, e a documentación acreditativa do seu pagamento.

e) Acta de transferencia dos bens, no suposto de adquisición, construción, rehabilitación e mellora de bens inventariables.

2. A conta xustificativa con entrega do informe do/da auditor/a, para subvencións por importe superior a 50.000 euros e para os proxectos executados por entidades que posúan ánimo de lucro, e opcional no caso de subvencións por importe igual ou inferior a 50.000 euros, incluirá:

a) Certificación dos gastos polo importe total do proxecto, distribuída por partidas orzamentarias e na cal se indiquen as distintas fontes de financiamento, asinada dixitalmente pola persoa que exerza a representación legal da entidade beneficiaria.

b) Certificado desagregado e detallado de custos indirectos, asinado dixitalmente pola persoa que exerza a representación legal da entidade beneficiaria.

c) Relación de todos os gastos efectuados, con indicación da data e do número da factura ou do documento xustificativo do gasto, identificación do seu emisor, da data e forma de pagamento e descrición do gasto, co seu importe en moeda local e o seu equivalente en euros.

d) Acta de transferencia de bens, no suposto de adquisición, construción, rehabilitación e mellora de bens inventariables.

e) Informe do/da auditor/a de contas, que deberá estar inscrito/a como exercente no Rexistro Oficial de Auditores de Contas (ROAC) no caso de ser realizada por persoal sometido á lexislación española, asinado dixitalmente.

No caso de que o informe sobre a conta xustificativa por parte dun/dunha auditor/a de contas se produza no estranxeiro, poderá ser realizado por auditores/as exercentes no país onde se levará a cabo, sempre que no dito país exista un réxime de habilitación para o exercicio da actividade de auditoría de contas. De non existir un sistema de habilitación para o exercicio da actividade de auditoría de contas no dito país, o informe previsto neste artigo poderá ser realizado por un/unha auditor/a establecido/a nel, sempre que a súa designación a leve a cabo o órgano concedente, ou sexa ratificada por este a proposta do beneficiario e que a designación deste/a siga uns criterios técnicos que garantan a axeitada calidade. A dita ratificación se entenderá aplicada no caso de que o órgano concedente acepte o informe remitido. Nestes casos non será obrigatoria a sinatura dixital do/da auditor/a, substituirase esta por un documento asinado manualmente polo/a auditor/a e, pola súa vez, conformado dixitalmente polo/a representante legal da entidade.

A revisión da conta xustificativa polo/a auditor/a de contas realizarase de conformidade coas normas de actuación e supervisión que, se é o caso, propoña o órgano que teña atribuídas as competencias de control financeiro de subvencións en Galicia.

No caso de que a actividade subvencionada fose executada en todo ou en parte por un socio local ou contraparte estranxeira, non será exixible que os documentos xustificativos do gasto da subvención fosen reflectidos nos rexistros contables da entidade beneficiaria; nese caso, o alcance da revisión do/da auditor/a estenderase ás contas do socio local ou contraparte.

A auditoría realizarase de acordo co establecido na Orde EHA/1434/2007, do 17 de maio, pola que se aproba a norma de actuación dos auditores de contas na realización dos traballos de revisión de contas xustificativas de subvencións, no ámbito do sector público estatal, previstos no artigo 74 do Regulamento da Lei 38/2003, do 17 de novembro, xeral de subvencións, aprobado mediante o Real decreto 887/2006, do 21 de xullo. A memoria económica deberá abranguer a totalidade dos gastos e pagamentos incorridos na realización das actividades subvencionadas, independentemente de quen os financie.

A presentación da auditoría como forma xustificativa do gasto non exime a entidade beneficiaria da subvención do mantemento do soporte documental de acordo cos prazos estipulados pola lei. A Dirección Xeral de Relacións Exteriores e coa Unión Europea ou os organismos competentes da Administración da Comunidade Autónoma poderán solicitar a documentación soporte da auditoría, de acordo co establecido nesta orde.

Finalizada a revisión da conta xustificativa, o/a auditor/a deberá emitir un informe no cal detallará os procedementos de revisión levados a cabo, o seu alcance, a porcentaxe de deficiencias advertida e a contía dos gastos afectados.

O informe deberá incluír a listaxe dos xustificantes de gastos da totalidade do proxecto, selada e asinada polo/a auditor/a.

O informe mencionará se a entidade beneficiaria facilitou canta información lle solicitou o/a auditor/a para realizar o traballo de revisión. No caso de que a entidade beneficiaria non facilitase a totalidade da información solicitada, mencionarase tal circunstancia con indicación da información omitida.

O informe referirase ao resultado das comprobacións realizadas, mencionando os feitos observados que puidesen supor un incumprimento por parte da entidade beneficiaria da normativa aplicable ou das condicións impostas para a percepción da subvención, e deberá proporcionar a información co suficiente detalle e precisión para que o órgano xestor poida concluír respecto diso.

19.5.3. No caso dos proxectos presentados polas universidades e no caso de proxectos executados por unha agrupación de entidades en que participen as universidades, e conforme o establecido no artigo 28.5 da Lei 9/2007, do 13 de xuño, de subvencións de Galicia, a xustificación dos gastos da parte executada directamente pola universidade, consistirá nunha certificación de gastos da Intervención ou do órgano que teña atribuídas as facultades de control da toma de razón en contabilidade e do cumprimento da finalidade para a cal foi concedida. A persoa que figure na solicitude de subvención como responsable técnica do proxecto será a encargada de facilitar a remisión desta documentación á Dirección Xeral de Relacións Exteriores e coa Unión Europea.

19.5.4. Ás axencias ou organismos internacionais das Nacións Unidas exixiránselles como xustificación económica os documentos acreditativos das transferencias realizadas, así como o control contable que lles é específico e sempre conforme o funcionamento establecido polos Estados parte para as distintas Nacións Unidas.

19.5.5. Con base no previsto no artigo 94.3.e) da Lei 10/2021, do 9 de marzo, reguladora da acción exterior e da cooperación para o desenvolvemento de Galicia, en casos excepcionais, de producirse situacións ou fenómenos imprevisibles, como desastres naturais, enfrontamentos armados, crises humanitarias, actuacións retardatarias das autoridades locais ou outras continxencias análogas, que afecten de maneira directa a execución da actividade subvencionada e que dificulten ou mesmo imposibiliten dispoñer da adecuada documentación xustificativa do investimento ou do gasto, o órgano xestor poderá aceptar outras formas alternativas de xustificación, como informes de profesionais taxadores independentes e debidamente acreditados e inscritos no correspondente rexistro oficial, declaracións de testemuñas, avaliación por resultados realizada por un profesional verificador acreditado e independente, declaración responsable de provedores ou declaración responsable da entidade beneficiaria na cal se detalle o destino dos fondos públicos percibidos e a realización da acción concreta, así como a súa afectación ao bo fin perseguido, ou outras probas de igual valor e credibilidade, sen que sexa preciso achegar máis xustificantes. Así mesmo, se as ditas circunstancias excepcionais, que deberán estar debidamente acreditadas, dificultan ou imposibilitan a execución total do previsto, o reintegro ou a perda do dereito ao cobramento da axuda ou subvención non afectará as cantidades efectivamente investidas e xustificadas se se cumpriron parcialmente os obxectivos.

19.5.6. Cando no proxecto concorran diversas subvencións e axudas procedentes doutras administracións, a entidade beneficiaria ten que xustificar ante a Xunta de Galicia o importe do gasto subvencionado, ademais das achegas propias e de terceiros financiadores que non sexan Administración pública.

Con respecto ao resto de achegas doutras administracións públicas, unicamente ten que acreditarse a aplicación dos fondos ás actividades previstas, para o cal é suficiente a acreditación mediante certificados que emitan o resto de administracións públicas que financiaron o proxecto ou actividade. As previsións que contén este punto non alteran as funcións que a lexislación vixente outorga á Intervención Xeral da Administración autonómica.

No caso de non xustificar a totalidade do proxecto, o importe da subvención concedida reducirase na mesma proporción en que se reduza a cantidade xustificada respecto do orzamento total presentado. O importe resultante poderá ser devolto á Administración de forma voluntaria consonte o establecido no artigo 22 destas bases.

19.5.7. No suposto de adquisición de bens inmobles, debe achegarse un certificado dun/dunha taxador/a independente, debidamente acreditado/a e inscrito/a no correspondente rexistro oficial.

19.5.8. Cando o importe do gasto subvencionable supere a contía de 40.000 euros, no suposto de custo por execución de obra, ou de 15.000 euros, no suposto de subministración de bens de equipo ou prestación de servizos por empresas de consultaría ou asistencia técnica, a entidade beneficiaria deberá presentar as tres ofertas solicitadas conforme o disposto no artigo 8.1.6º destas bases.

19.5.9. No caso de proxectos con subvencións de capital superiores a 60.000 euros, destinadas a investimentos en activos tanxibles, e conforme o artigo 30 da Lei 9/2007, do 13 de xuño, de subvencións de Galicia, a entidade beneficiaria deberá presentar a xustificación documental que constate de forma razoable e suficiente a realización da actividade subvencionada.

19.6. A entidade beneficiaria terá que conservar todos os comprobantes de gasto durante un período de 4 anos, dende a presentación da xustificación final do proxecto. Nestes supostos, os xustificantes quedarán á disposición das actuacións e comprobación da Dirección Xeral de Relacións Exteriores e coa Unión Europea e dos órganos de control establecidos pola normativa vixente.

Os gastos acreditaranse mediante facturas e os demais documentos de valor probatorio equivalente no tráfico xurídico mercantil ou con eficacia administrativa acompañada dunha declaración responsable garantindo que a documentación é fiel ao orixinal.

Tamén poderán utilizarse como xustificantes de gasto, os recibos de caixa en que conste o nome da entidade beneficiaria, o importe, o nome e apelido da persoa que presta o servizo, o concepto do gasto e o nome do proxecto subvencionado. Este recibo deberá ser asinado pola persoa que presta o servizo (vendedor/a, transportista, etc.).

A utilización de recibos deberá ser, como criterio xeral, autorizada con carácter previo polo órgano concedente da subvención, podendo tamén ser validada con posterioridade por el, sempre que este considere que a autorización se houbera producido de terse solicitado con carácter previo.

Poderán, así mesmo, utilizarse recibos de caixa en lugar de facturas, sexa cal sexa o seu importe ou a contía que representen sobre a subvención concedida e sen necesidade de autorización previa, sempre que na documentación xustificativa se inclúa unha acreditación de que as persoas perceptoras de tales pagamentos non están suxeitas á obriga de emitir factura no país en que se efectuou o gasto. A devandita acreditación deberá ser documentada a través da normativa aplicable ou realizada por un organismo público competente.

Tendo en conta que a execución das actividades subvencionadas se realiza en países en que a utilización dos pagamentos en efectivo está xeneralizada, aceptarase a xustificación do pagamento en efectivo para importes inferiores a 1.000 euros, xunto cun xustificante do provedor, conforme establece o artigo 42.3 do Decreto 11/2009, do 8 de xaneiro, polo que se aproba o Regulamento da Lei 9/2007, de subvencións de Galicia. Esta excepcionalidade poderá estenderse a pagamentos por contía superior, pero estará supeditada a unha xustificación que resida na non obrigatoriedade de efectuar as ditas transaccións por outro método no país de desenvolvemento do proxecto e na non dispoñibilidade de medios electrónicos que posibiliten outros métodos de pagamento alternativos.

Os criterios establecidos para os xustificantes de gastos e de pagamentos deberán respectar as normas e especificidades dos países en que se desenvolva o proxecto.

Cando existan xustificantes redactados nun idioma estranxeiro distinto do inglés, francés, italiano ou portugués, deberán ser debidamente traducidos e indicar a data, o importe, o concepto de gasto, a persoa perceptora e a provedora.

19.7. No caso de que a xustificación, parcial ou total, dos proxectos non estea completa ou presente defectos, o prazo para a súa emenda e para a entrega da documentación complementaria requirida polo órgano que efectuase a revisión será de corenta e cinco días hábiles, consonte o que establece o artigo 22.2 do Decreto 29/2017, do 9 de marzo.

19.8. Os impostos susceptibles de recuperación serán atendidos como un anticipo con cargo á subvención concedida mentres non sexan efectivamente recuperados. No momento da presentación da xustificación da subvención concedida achegarase, de ser o caso, unha declaración responsable de non recuperar os devanditos impostos.

Se a recuperación destes se producise durante o prazo de execución do proxecto ou da actividade, os importes recuperados serán aplicados para sufragar gastos vinculados á actividade, dentro do seu prazo de execución, sen que sexa necesaria a autorización previa do órgano concedente, salvo que a súa aplicación implique cambios ou modificacións que afecten os obxectivos, resultados, a localización territorial, a contraparte ou o socio local ou a poboación beneficiaria.

No caso de que a recuperación se produza nos catro anos seguintes á finalización do prazo de execución da actividade, a entidade beneficiaria poderá propor a súa aplicación a actividades asociadas ou complementarias á actuación subvencionada. O órgano concedente emitirá unha resolución de autorización da aplicación dos fondos que indicará o prazo de execución e xustificación destes, salvo que o devandito órgano entenda que as actividades ás cales se pretenden aplicar as cantidades recuperadas non poden ser consideradas como asociadas ou complementarias á actuación subvencionada; nese caso emitirá unha resolución de denegación da aplicación dos fondos. Se a resolución fose denegatoria, procederase á devolución do anticipo para o pagamento dos impostos.

A obriga de devolverlle á Administración concedente os impostos recuperados subsistirá durante catro anos desde a presentación da xustificación, ao cabo dos cales, de non recuperarse aínda os impostos, deberá emitirse unha declaración responsable que acredite a devandita circunstancia.

Artigo 20. Obrigas da entidade beneficiaria, seguimento, avaliación e control dos proxectos

20.1. As entidades beneficiarias deberán realizar a intervención para a cal se lles concedeu a axuda no período de tempo determinado no documento de formulación, e sempre dentro da anualidade pertinente. Para estes efectos considérase vinculante o orzamento e a documentación presentada no documento de formulación do proxecto e na solicitude ou, de ser o caso, da reformulación, de terse efectuado.

20.2. As entidades beneficiarias de axudas deberán informar de xeito inmediato a Dirección Xeral de Relacións Exteriores e coa Unión Europea sobre calquera acontecemento que altere ou dificulte notoriamente o desenvolvemento adecuado do proxecto subvencionado. Toda alteración das condicións tidas en conta para a concesión da subvención e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución da concesión.

20.3. As entidades beneficiarias obríganse a facilitarlle ao órgano xestor toda canta información lles sexa requirida respecto dos proxectos subvencionados. Así mesmo, as entidades beneficiarias obríganse a conservar os documentos xustificativos da aplicación dos fondos recibidos, incluídos os documentos electrónicos, mentres poidan ser obxecto das actuacións de comprobación e control. O control financeiro interno correspóndelle á Intervención Xeral da Comunidade Autónoma.

20.4. Así mesmo, as entidades beneficiarias obríganse a incorporar de forma visible en todas as accións derivadas do proxecto subvencionado (placas, letreiros, carteis, publicacións, material de difusión, publicidade, etc.) os logotipos oficiais da Xunta de Galicia e da Cooperación Galega, todo isto en formato duradeiro e material resistente, para a debida difusión da orixe da subvención, conforme o Decreto 112/2021, do 22 de xullo, polo que se aproba o uso dos elementos básicos da identidade corporativa da Xunta de Galicia.

Cando a organización financiada exhiba o seu propio logotipo, o da Xunta de Galicia e o da Cooperación Galega deberán figurar co mesmo tamaño e en iguais condicións de seguridade. Ambos os dous logotipos poderanse descargar da páxina web da Cooperación Galega https://cooperacion.xunta.gal/

Os documentos ou material divulgativo publicados, tanto en papel como en soporte audiovisual e/ou electrónico, que sexan resultado de actuacións financiadas pola Xunta de Galicia, ademais de conter o logotipo e o nome da Xunta de Galicia como financiadora, deberán incluír o seguinte parágrafo, traducido ás linguas en que se publiquen os documentos ou materiais divulgativos: «Esta publicación realizouse co apoio financeiro da Xunta de Galicia. O contido da dita publicación é responsabilidade exclusiva de <nome da entidade> e non reflicte necesariamente a opinión da Xunta de Galicia».

20.5. No proceso continuo de homoxeneizar os procedementos, a metodoloxía e os formularios de xestión do ciclo dos proxectos cos da Cooperación Oficial Española e da Unión Europea, o seguimento e a avaliación dos proxectos rexerase polos criterios básicos de pertinencia, eficacia, eficiencia, impacto e sustentabilidade, seguindo a metodoloxía do marco lóxico e a xestión do ciclo do proxecto establecidos polo CAD e pola propia Unión Europea.

20.6. A xestión dos proxectos poderá ser examinada, durante a súa execución ou unha vez finalizada, por representantes da Xunta de Galicia con competencias en materia de cooperación exterior ou por empresas avaliadoras contratadas para o efecto, para o cal a entidade beneficiaria e a contraparte local facilitarán o acceso ás contas e os documentos xustificativos requiridos, así como a calquera outra documentación relevante na execución do proxecto.

A avaliación final do proxecto analizará, de xeito sistemático e obxectivo, a pertinencia, a eficacia, a eficiencia, o impacto e a sustentabilidade do proxecto financiado, e adaptarase á especificidade deste nos termos de referencia (TdR).

A estrutura dos informes de avaliación seguirá tamén a metodoloxía e o formato utilizado pola Cooperación Española e pola Unión Europea, e recollerán, como mínimo:

– Resumo: debe ser formulado de xeito compacto e breve (non máis de 5 páxinas) para ser empregado como un documento separado, centrándose nos puntos analíticos máis importantes e indicando as maiores conclusións, leccións adquiridas e recomendacións específicas.

– Texto principal: comezando por unha descrición do proxecto avaliado e os obxectivos da avaliación, deberá seguir os cinco criterios de avaliación, describindo os feitos e analizándoos segundo cada un.

– Conclusións e recomendacións: en función da análise dos criterios de avaliación, as recomendacións deberían ser realistas, operativas, pragmáticas e orientadas a audiencias de todos os niveis.

– Anexos: termos de referencia da avaliación, nomes dos/das avaliadores/as e das súas empresas, metodoloxía para o estudo (fases, métodos de recollida de datos, etc.), marcos lóxicos (orixinal e actualizado), lista de persoas ou organizacións consultadas, literatura e documentación, outros anexos técnicos, etc.

20.7. As entidades beneficiarias, en relación co seu persoal expatriado cooperante, obríganse a cumprir co establecido no Real decreto 708/2024, do 23 de xullo, polo que se aproba o Estatuto das persoas cooperantes.

Artigo 21. Modificación das condicións

Precisarase autorización previa e expresa para calquera modificación substancial do proxecto, entendendo por tal aquela que afecte os aspectos cualitativos dos seus obxectivos, resultados ou a poboación destinataria, ou o lugar ou prazo de execución ou xustificación do proxecto, así como a modificación ou incorporación dos socios locais. As solicitudes de modificacións substanciais do proxecto deberán estar suficientemente motivadas e seren formuladas por escrito dirixido ao director xeral de Relacións Exteriores e coa Unión Europea, que resolverá e notificará no prazo dun mes sobre a súa autorización ou denegación.

Conforme o que establece o artigo 94.3.c) da Lei 10/2021, do 9 de marzo, reguladora da acción exterior e da cooperación para o desenvolvemento de Galicia, o prazo de execución das actividades subvencionadas poderá ser ampliado automaticamente ata un máximo de seis meses, sen necesidade de autorización previa por parte do órgano xestor, e a entidade beneficiaria deberá comunicarllo previamente ao órgano competente antes de que remate o prazo de execución inicial. Entenderase automaticamente ampliado o prazo coa dita notificación, e será indistinto que se exceda o límite do correspondente exercicio orzamentario. As ampliacións do prazo de execución superiores a seis meses requirirán a autorización previa do órgano xestor.

Excepcionalmente, poderá solicitarse e outorgarse unha segunda ampliación de prazo de execución antes de rematar a primeira, fundamentada en situacións ou fenómenos excepcionais e imprevisibles, como desastres naturais, enfrontamentos armados, crises humanitarias, actuacións retardatarias das autoridades locais ou outras continxencias análogas, que afecten de maneira directa a execución da actividade subvencionada e que deberán acreditarse de forma fidedigna, sempre que non concorran circunstancias imputables á entidade beneficiaria. Nesta segunda ampliación excepcional, o novo prazo outorgarase polo tempo indispensable para facilitar que a entidade beneficiaria supere as devanditas circunstancias ou continxencias. No caso de que a situación excepcional impedise continuar coa execución da actividade financiada ou subvencionada, poderase solicitar unha modificación da finalidade para a que foi outorgada a dita subvención.

Artigo 22. Devolución voluntaria da subvención

De acordo co establecido no artigo 64 do Regulamento da Lei 9/2007, do 13 de xuño, de subvencións de Galicia, a entidade beneficiaria poderá realizar, sen o requirimento previo da Administración, a devolución total ou parcial da subvención concedida, mediante o seu ingreso na conta ES82 2080 0300 8731 1006 3172 de titularidade da Xunta de Galicia, pertencente á entidade Abanca, en concepto de devolución voluntaria da subvención, de conformidade co previsto no artigo 34 da Lei 9/2007, do 13 de xuño, e na disposición adicional terceira da Lei 1/2023, do 20 de febreiro, de cooperación para o desenvolvemento sostible e a solidariedade global.

En todo caso, a entidade beneficiaria deberá presentar ante o órgano concedente a copia xustificativa da devolución voluntaria realizada, na cal consten a data do ingreso, o seu importe, o motivo da devolución e o número do expediente e denominación da subvención concedida.

Artigo 23. Reintegro por incumprimento

23.1. Procederá o reintegro total ou parcial das cantidades percibidas nos casos previstos no artigo 33 da Lei 9/2007, do 13 de xuño, de subvencións de Galicia.

23.2. De conformidade co artigo 14.1, letra n), da Lei 9/2007, de subvencións de Galicia, o importe que haberá que reintegrar por posibles incumprimentos das condicións impostas con motivo da concesión das subvencións determinarase de acordo cos seguintes criterios de gradación:

a) O incumprimento total das obrigas e dos fins para os cales se outorgou a subvención e o incumprimento total das obrigas de xustificación dará lugar ao reintegro da totalidade da cantidade concedida.

b) A cantidade que se deberá reintegrar no caso de incumprimento parcial na execución das accións ou gastos e no caso de incumprimento parcial na xustificación será determinada, de acordo co criterio de proporcionalidade, polo volume e o grao de incumprimento das condicións impostas con motivo da concesión da subvención.

c) No caso de demora na presentación da documentación xustificativa da subvención, sempre que o cumprimento pola entidade beneficiaria se aproxime de modo significativo ao cumprimento total e se acredite por esta unha actuación inequivocamente tendente á satisfacción dos seus compromisos, solicitarase a devolución do 10 % da subvención concedida.

Artigo 24. Información aos órganos fiscalizadores

As entidades beneficiarias estarán obrigadas a facilitar toda a información que lles sexa requirida pola Intervención Xeral da Xunta de Galicia, o Tribunal de Contas español e o Consello de Contas de Galicia no exercicio das súas funcións de fiscalización e control do destino das subvencións.

Artigo 25. Transparencia e bo goberno

25.1. Deberá darse cumprimento ás obrigas de transparencia contidas no artigo 17 da Lei 1/2016, do 18 de xaneiro, de transparencia e bo goberno, e no artigo 15 da Lei 9/2007, do 13 de xuño, de subvencións de Galicia.

25.2. En virtude do disposto no artigo 4 da Lei 1/2016, do 18 de xaneiro, de transparencia e bo goberno, as persoas físicas e xurídicas beneficiarias de subvencións están obrigadas a subministrar á Administración, ao organismo ou á entidade das previstas no artigo 3.1 da Lei 1/2016 a que se encontren vinculadas, logo de requirimento, toda a información necesaria para o cumprimento por aquela das obrigas previstas no título I da citada lei.

Artigo 26. Recursos

As resolucións expresas ou presuntas ditadas en aplicación do disposto nestas bases reguladoras esgotan a vía administrativa e contra elas cabe interpoñer os seguintes recursos:

a) Potestativamente, un recurso de reposición ante o mesmo órgano que ditou a resolución, no prazo dun mes contado a partir do día seguinte ao da notificación, no caso de que o acto fose expreso. Se este non o fose (acto presunto), a entidade solicitante e outras posibles persoas interesadas poderán interpoñelo en calquera momento a partir do día seguinte a aquel en que este se produza, de conformidade co establecido nos artigos 123 e 124 da Lei 39/2015, do 1 de outubro, do procedemento administrativo común das administracións públicas.

b) Directamente, un recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados a partir do día seguinte ao da correspondente notificación, ou no prazo de seis meses, contados a partir do día seguinte a aquel no que se produza o acto presunto.

Artigo 27. Remisión normativa

Para o non previsto nestas bases será de aplicación a Lei 10/2021, do 9 de marzo, reguladora da acción exterior e da cooperación para o desenvolvemento de Galicia; o Decreto 29/2017, do 9 de marzo, de cooperación para o desenvolvemento; a Lei 1/2023, do 20 de febreiro, de cooperación para o desenvolvemento sostible e a solidariedade global; a Lei 9/2007, do 13 de xuño, de subvencións de Galicia; o Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia; os preceptos básicos da Lei 38/2003, do 17 de novembro, xeral de subvencións, así como os do Real decreto 887/2006, do 21 de xullo, polo que se aproba o Regulamento da Lei 38/2003, do 17 de novembro, xeral de subvencións.

Artigo 28. Información ás persoas interesadas

28.1. De acordo co establecido no artigo 14, letra ñ), da Lei 9/2007, do 13 de xuño, de subvencións de Galicia, as persoas beneficiarias quedan informadas, cos datos consignados no modelo normalizado de solicitude, dos aspectos básicos previstos no Regulamento (UE) 2016/679, do Parlamento Europeo e do Consello, do 27 de abril, relativo á protección das persoas físicas no que respecta ao tratamento dos seus datos persoais e á libre circulación destes datos (RXPD), e na Lei orgánica 3/2018, do 5 de decembro, de protección de datos persoais e garantía dos dereitos dixitais.

28.2. Por outra banda, de conformidade co previsto no artigo 20.8.a) da Lei 38/2003, do 17 de novembro, xeral de subvencións, deberáselle transmitir á Base de datos nacional de subvencións o texto da convocatoria e a información requirida pola dita base de datos.