Segundo o artigo 14 da Lei 11/2021, do 14 de maio, de recuperación da terra agraria de Galicia, o Banco de Terras de Galicia, dependente da Axencia Galega de Desenvolvemento Rural, configúrase como un instrumento público de intermediación entre persoas titulares de terras agroforestais e persoas interesadas no seu aproveitamento, que ten como obxectivo principal contribuír á mobilización produtiva desas terras mediante arrendamentos, cesións, permutas, alleamentos ou calquera outro negocio xurídico.
O Banco de Terras de Galicia, en funcionamento desde o ano 2007, conta na actualizade con máis de 18.000 parcelas, que supoñen máis de 7.000 hectáreas, e que son ofertadas para que todas aquelas persoas que así o desexen poidan solicitar o seu arrendamento por tempo determinado.
A presentación electrónica de solicitudes de arrendamento de predios rústicos incorporados ao Banco de Terras no estado de dispoñible en concorrencia está regulada desde o ano 2019 pola Orde do 19 de setembro de 2019 pola que se regula a presentación electrónica de solicitudes de arrendamento de predios rústicos incorporados ao Banco de Terras de Galicia, e as súas posteriores modificacións, co código de procedemento MR711B.
A Lei 11/2021, do 14 de maio, de recuperación da terra agraria de Galicia, no artigo 54.6 indica: «As parcelas que non tiveren ningunha solicitude válida ou cuxas eventuais solicitudes resultaren resoltas negativamente, de acordo co procedemento sinalado neste artigo, pasarán ao estado de dispoñibles sen concorrencia no Sitegal e serán arrendadas, sen procedemento de concorrencia competitiva, a aquela persoa que faga unha solicitude que se axuste aos requisitos fixados nesta lei. No caso de presentación de varias solicitudes, darase preferencia á orde de presentación». Polo tanto, unha vez que está aprobado o procedemento de solicitude de parcelas no estado de dispoñible en concorrencia (MR711B), é preciso aprobar unha orde que regule o procedemento de solicitude de parcelas no estado de dispoñible sen concorrencia, segundo o previsto no antedito artigo da Lei 11/2021, do 14 de maio, de recuperación da terra agraria de Galicia.
En consecuencia,
RESOLVO:
Artigo 1. Obxecto e finalidade
Esta orde ten por obxecto regular a presentación electrónica de solicitudes de arrendamento de predios rústicos incorporados ao Banco de Terras de Galicia no estado de dispoñible sen concorrencia (código de procedemento MR711G), segundo o disposto no capítulo IV do título IV (artigo 54.6 ) da Lei 11/2021, do 14 de maio, de recuperación da terra agraria de Galicia.
Quedan excluídos deste procedemento os arrendamentos pactados ou de mutuo acordo, recollidos no artigo 55, e os arrendamentos sobre as parcelas en estado de dispoñible en concorrencia, recollidas nos artigos 54.2 e 54.3 da Lei 11/2021, do 14 de maio, de recuperación da terra agraria de Galicia, xa regulados no procedemento MR711B.
Este procedemento habilitarase na sede electrónica da Xunta de Galicia no enderezo https://sede.xunta.gal e figurará na Guía de procedementos e servizos regulada pola Orde do 12 de xaneiro de 2012 pola que se regula a habilitación de procedementos administrativos e servizos na Administración xeral e no sector público autonómico de Galicia, co código MR711G.
Artigo 2. Persoas destinatarias
Este procedemento vai dirixido a calquera persoa que queira arrendar terras para fins agrícolas, gandeiros ou forestais, conforme a Lei 11/2021, do 14 de maio, de recuperación da terra agraria de Galicia.
Artigo 3. Forma, lugar e prazo de presentación de solicitudes. Prazo de resolución
As solicitudes presentaranse preferiblemente por vía electrónica a través do anexo I, accesible na sede electrónica da Xunta de Galicia, https://sede.xunta.gal, ou desde a páxina web do Banco de Terras de Galicia (https://sitegal.xunta.gal/sitegal).
A presentación electrónica será obrigatoria para:
As administracións públicas, as persoas xurídicas, as entidades sen personalidade xurídica, as persoas traballadoras autónomas e as persoas representantes dunha das anteriores.
De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas obrigadas á presentación electrónica presenta a súa solicitude presencialmente, será requirida para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.
Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).
Aquelas persoas non obrigadas á presentación electrónica, opcionalmente, poderán presentar as solicitudes presencialmente en calquera dos lugares e rexistros establecidos na normativa reguladora do procedemento administrativo común, utilizando o formulario normalizado dispoñible na sede electrónica da Xunta de Galicia.
As persoas interesadas deberán declarar na solicitude os datos bancarios para o cobramento da renda no caso de que estas fosen adxudicatarias do arrendamento do predio.
O prazo para a presentación das solicitudes comezará a partir do día seguinte ao de publicación desta orde no DOG e estará aberto durante todo o ano.
O prazo para ditar resolución expresa sobre a solicitude de concesión do arrendamento e para notificala será de cinco (5) meses contados desde o día seguinte ao acordo de iniciación. Se transcorre o prazo sen que se dite resolución expresa, as persoas interesadas poderán entender desestimadas as súas solicitudes por silencio administrativo.
Artigo 4. Documentación complementaria
1. As persoas interesadas deberán achegar coa solicitude a seguinte documentación:
Os documentos acreditativos da personalidade e, de ser o caso, da representación da persoa solicitante:
• No caso de persoas xurídicas, certificado expedido polo Rexistro Mercantil ou outros rexistros públicos que correspondan, en función da personalidade xurídica de que se trate, en que se identifiquen a constitución e a representación correspondente, con indicación do seu alcance e vixencia.
• De non se achegar o dito certificado, deberán presentar unha copia das escrituras de constitución e do poder de representación, debidamente inscritas no rexistro público que corresponda, segundo o tipo de personalidade xurídica de que se trate, e das modificacións posteriores dos documentos indicados.
• Documentación acreditativa da representación.
De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán obtidos electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.
De forma excepcional, se non se puidesen obter os citados documentos, poderáselle solicitar novamente á persoa interesada a súa achega.
2. A documentación complementaria presentarase preferiblemente por vía electrónica.
A presentación electrónica será obrigatoria para os suxeitos obrigados á presentación electrónica da solicitude. Se algunha destas persoas presenta a documentación complementaria presencialmente, será requirida para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.
Aquelas persoas non obrigadas á presentación electrónica, opcionalmente, poderán presentar a documentación complementaria presencialmente en calquera dos lugares e rexistros establecidos na normativa reguladora do procedemento administrativo común.
As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderá requirir a exhibición do documento ou da información orixinal.
Artigo 5. Comprobación de datos
1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:
a) DNI/NIE da persoa solicitante.
b) DNI/NIE da persoa representante.
c) NIF da entidade solicitante.
d) NIF da entidade representante.
e) Certificado de estar ao día no pagamento coa Seguridade Social.
f) Certificado de estar ao día no pagamento das débedas coa Administración pública da Comunidade Autónoma.
g) Certificado de estar ao día no pagamento de obrigas tributarias coa AEAT.
2. No caso de que as persoas interesadas se opoñan á consulta, deberán indicalo no recadro correspondente habilitado no formulario correspondente e achegar os documentos.
Cando así o exixa a normativa aplicable, solicitarase o consentimento expreso da persoa interesada para realizar a consulta.
3. Excepcionalmente, no caso de que algunha circunstancia imposibilitase a obtención dos citados datos, poderáselles solicitar ás persoas interesadas a presentación dos documentos correspondentes.
Artigo 6. Notificacións
1. As notificacións de resolucións e actos administrativos practicaranse preferentemente por medios electrónicos e, en todo caso, cando as persoas interesadas resulten obrigadas a recibilas por esta vía. As persoas interesadas que non estean obrigadas a recibir notificacións electrónicas poderán decidir e comunicar en calquera momento que as notificacións sucesivas se practiquen ou deixen de practicar por medios electrónicos.
2. A persoa interesada deberá manifestar expresamente a modalidade escollida para a notificación (electrónica ou en papel) no formulario. No caso de optar pola notificación en papel, practicarase a notificación segundo o establecido na normativa reguladora do procedemento administrativo común.
3. De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas efectuaranse mediante a comparecencia na sede electrónica da Xunta de Galicia e a través do Sistema de notificación electrónica de Galicia-Notifica.gal. Este sistema remitirá ás persoas interesadas avisos da posta á disposición das notificacións á conta de correo e/ou teléfono móbil que consten na solicitude. Estes avisos non terán, en ningún caso, efectos de notificación efectuada e a súa falta non impedirá que a notificación sexa considerada plenamente válida.
No caso de persoas interesadas obrigadas a recibir notificacións só por medios electrónicos deberán optar en todo caso, no formulario, pola notificación por medios electrónicos, sen que sexa válida nin produza efectos no procedemento unha opción diferente.
4. As notificacións por medios electrónicos entenderanse practicadas no momento en que se produza o acceso ao seu contido. Cando a notificación por medios electrónicos sexa de carácter obrigatorio, ou fose expresamente elixida pola persoa interesada, entenderase rexeitada cando transcorresen dez días naturais desde a posta á disposición da notificación sen que se acceda ao seu contido.
5. Se o envío da notificación electrónica non fose posible por problemas técnicos, practicarase a notificación polos medios previstos na normativa reguladora do procedemento administrativo común.
Artigo 7. Trámites administrativos posteriores á presentación de solicitudes
A sede electrónica da Xunta de Galicia permite ás persoas interesadas realizar trámites electrónicos, con posterioridade ao inicio do expediente, accedendo á Carpeta cidadá da persoa interesada. Cando as persoas interesadas non resulten obrigadas á presentación electrónica tamén poderán realizarse os ditos trámites presencialmente en calquera dos lugares e rexistros establecidos na normativa reguladora do procedemento administrativo común.
Disposición adicional única. Actualización dos modelos normalizados
De conformidade coa disposición adicional sexta da Lei 4/2019, do 17 de xullo, de administración dixital de Galicia, os modelos normalizados aplicables na tramitación do procedemento regulado nesta disposición poderán ser actualizados co fin de mantelos adaptados á normativa vixente. Para estes efectos, será suficiente a publicación dos modelos actualizados na sede electrónica da Xunta de Galicia, onde estarán permanentemente accesibles para todas as persoas interesadas, sen que sexa necesaria unha nova publicación no Diario Oficial de Galicia.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 10 de febreiro de 2026
María José Gómez
Conselleira do Medio Rural
