O artigo 24 da nosa Constitución garántelles o dereito fundamental a obteren a tutela efectiva dos xuíces e tribunais a todas as persoas no exercicio dos seus dereitos e intereses lexítimos, e, así mesmo, á defensa e á asistencia de letrado. Este dereito fundamental compleméntase co disposto no artigo 119 da Carta Magna, onde se establece que a xustiza será gratuíta cando así o dispoña a lei, e, en todo caso, respecto de quen acredite insuficiencia de recursos para litigar.

Coa entrada en vigor da Lei 1/1996, do 10 de xaneiro, de asistencia xurídica gratuíta, esta materia foi obxecto dunha fonda reforma e, como consecuencia do Real decreto 2166/1994, do 4 de novembro, polo que lle foron transferidas pola Administración do Estado a Galicia os medios materiais e económicos para o funcionamento da Administración de Xustiza, entre os cales se atopa o aboamento da compensación económica aos colexios de avogados e de procuradores dos tribunais polas actuacións dos seus colexiados no ámbito da asistencia xurídica gratuíta, a Comunidade Autónoma galega realizou o desenvolvemento normativo da dita Lei 1/1996, nun primeiro momento a través do Decreto 146/1997 e, posteriormente, coa pertinente reforma deste para a súa necesaria adaptación ao contexto actual, mediante o vixente Decreto 269/2008, do 6 de novembro, polo que se aproba o Regulamento de asistencia xurídica gratuíta de Galicia, modificado polo Decreto 138/2012, do 21 de xuño, e polo Decreto 134/2017, do 7 de decembro.

Por outra banda, con data do 28 de decembro de 2021 asinouse un acordo co Consello da Avogacía Galega para establecer o baremo da compensación económica da asistencia xurídica gratuíta destes profesionais, cun ámbito temporal que abarca desde o 1 de outubro de 2021 ata o 30 de setembro de 2025. Aprobado o 28 de decembro de 2021, o devandito pacto actualízase a data de 11 de novembro de 2024, coa sinatura dun novo acordo para a aclaración e inclusión de novos conceptos.

Por diversas circunstancias non foi posible acadar no ámbito negocial un novo acordo, e logo das obrigadas conversas co Consello da Avogacía Galega, é necesario prorrogar o baremo establecido no acordo do ano 2021 nas cantidades de compensación económica que rexeron no cuarto trimestre de 2024 e primeiro, segundo e terceiro trimestres de 2025, actualizadas pola Orde desta Consellería do 19 de decembro de 2024, incrementadas no índice de prezos de consumo do ano 2024, de acordo co establecido no dito Acordo do 28 de decembro de 2021, ao tempo que as partes inician un proceso negociador coa finalidade de acadar un acordo para os vindeiros anos.

En consecuencia co anteriormente exposto,

DISPOÑO:

Primeiro. A prórroga do Acordo do 28 de decembro de 2021 entre a Xunta de Galicia e o Consello da Avogacía Galega, polo que se estableceu a compensación económica da asistencia xurídica gratuíta e actualizado mediante acordo do 11 de novembro de 2024 para a aclaración e inclusión de novos conceptos.

Segundo. Durante o cuarto trimestre do ano 2025 e o primeiro, segundo e terceiro trimestres de 2026 as cantidades do baremo da compensación económica da asistencia xurídica gratuíta serán as que rexeron durante o ano 2025, actualizadas pola Orde desta consellería do 19 de decembro de 2024, incrementadas no índice de prezos de consumo do ano 2024, de acordo co establecido no dito Acordo do 28 de decembro de 2021, e especificadas no anexo da presente orde.

Terceiro. Os avogados percibirán o 100 % da compensación económica correspondente á súa actuación profesional cando acrediten a realización dalgún dos seguintes trámites procesuais:

a) En materia de asistencia letrada ao detido ou preso, unha vez finalizada a intervención profesional e que o avogado presente o parte selado polo órgano xudicial ou policial onde se levou a cabo a asistencia e no cal se recollan os seguintes datos, como mínimo:

– Nome e número de colexiado do avogado.

– Nome e DNI do asistido ou asistidos. No caso de estranxeiros, número de pasaporte ou de tarxeta de residencia.

– Motivo polo cal o asiste e, se for o caso, da detención, e número de dilixencias policiais ou xudiciais.

Cando o colexio de avogados teña establecida unha quenda de garda, pagarase unha única compensación por cada quenda de garda. Se o número de asistencias realizadas a persoas diferentes é superior a cinco dentro dunha mesma garda, o avogado percibirá unha compensación equivalente ao dobre do módulo establecido, sexa cal sexa o número de asistencias realizadas.

b) Nos procesos penais, a presentación da copia da dilixencia ou solicitude da actuación procesual en que interveña o letrado, ou a apertura do xuízo oral.

c) Nos procesos civís, a presentación da copia da resolución xudicial de admisión da demanda ou de ter por formulada a contestación dela.

d) Nos demais procesos, a presentación da copia da dilixencia xudicial acreditativa da intervención do avogado.

e) Nas apelacións civís, a presentación da copia da resolución xudicial pola que se admite a trámite o recurso ou, se procede, a comparecencia ante a sala.

f) Nas apelacións penais, a presentación da copia da resolución xudicial en que se teña por formalizado ou impugnado o recurso ou o sinalamento para a vista.

g) Nos recursos de casación formalizados, a presentación da copia da resolución xudicial pola que se teña por interposto o recurso.

h) Nos anuncios de recurso de casación que non chegan a ser formalizados, a presentación da copia do anuncio do recurso, debidamente xustificada.

i) Nas transaccións extraxudiciais e informe de insostibilidade da pretensión, a presentación do documento de transacción subscrito polos interesados ou do informe da insostibilidade dirixido ao colexio.

j) Nas desistencias extraxudiciais por pasividade do interesado, a presentación de xustificación escrita do letrado.

k) Nas execucións de sentenzas que se produzan transcorridos máis de dous anos despois de ditada resolución xudicial, a presentación da copia de petición de execución, debidamente acreditada.

Os documentos referidos poderán ser substituídos por copia selada polo órgano xudicial da primeira folla do escrito presentado.

Cuarto. En cumprimento do establecido no artigo 44.1 do Regulamento de asistencia xurídica gratuíta de Galicia, dentro do mes natural seguinte ao de finalización de cada trimestre o colexio de avogados remitirá á Dirección Xeral de Xustiza unha certificación, acompañada dos ficheiros electrónicos a que fan referencia as letras a) e b) do devandito artigo e que deberá ser expedida polo secretario ou secretaria do colexio co visto e prace do decano ou decana, que conteña os datos relativos ás actuacións realizadas polos profesionais durante ese período nas cales exista recoñecemento expreso do dereito á asistencia xurídica gratuíta (así como tamén, de ser o caso, os datos relativos ás actuacións realizadas en períodos anteriores cuxo recoñecemento expreso á asistencia xurídica gratuíta tivese lugar durante ese último trimestre). Na referida certificación observaranse as condicións recollidas nas letras a), b), c) e d) do citado artigo 44.1.

Quinto. De acordo co establecido no artigo 44.3 do Regulamento de asistencia xurídica gratuíta de Galicia, os datos contidos na certificación e ficheiros informáticos referidos no punto anterior serán contrastados cos que consten nas correspondentes comisións de xustiza gratuíta e, no suposto de detectarse discrepancias, concederáselle ao colexio de avogados un prazo máximo de cinco días hábiles para, de ser o caso, proceder á rectificación daqueles e expedir unha nova certificación.

Sexto. De conformidade co disposto no artigo 44.4 do Regulamento de asistencia xurídica gratuíta de Galicia, a Dirección Xeral de Xustiza efectuará, unha vez recibidas as certificacións a que fan referencia os puntos anteriores, os libramentos trimestrais que correspondan.

Sétimo. Cando un procedemento xudicial teña carácter excepcional e extraordinario, no que a actuación do avogado supere notablemente a carga de traballo que se pode considerar ordinaria para cada tipo de procedemento, a Consellería de Presidencia, Xustiza e Deportes e o correspondente colexio de avogados poderán formalizar un convenio cuxa finalidade sexa articular os medios técnicos, materiais, humanos ou económicos precisos para facer posible en óptimas condicións a defensa xurídica de quen teña recoñecido o dereito de asistencia xurídica gratuíta, de modo que se garanta a tutela xudicial efectiva de acordo co establecido no artigo 24 da Constitución española.

Disposición derradeira. Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 12 de febreiro de 2026.

Diego Calvo Pouso
Conselleiro de Presidencia, Xustiza e Deportes

ANEXO

Módulos e bases da indemnización pola prestación do servizo

Baremos para o cuarto trimestre do ano 2025 e o primeiro,
segundo e terceiro trimestres de 2026

Avogados/tipoloxía

Asistencia ao detido ou preso.

Código	Denominación	Módulo
101	Asistencia individualizada, incluída a presenza inmediata solicitada polo detido ou preso sen declaración posterior, por requirimento xudicial ou do centro de detención	139,65 €

Xurisdición penal.

Código	Denominación	Módulo
201	Procedemento ante o tribunal do xurado	569,27 €
202	Asistencia diaria á vista ante o tribunal do xurado a partir do segundo día	135,39 €
203	Procedemento ordinario por delito	540,48 €
204	Procedemento abreviado de especial complexidade (causa de máis de 1.000 folios)	540,48 €
206	Procedemento penal abreviado	442,41 €
207	Procedemento de axuizamento rápido de delitos sen conformidade	442,41 €
208	Procedemento de axuizamento rápido de delitos con conformidade	293,16 €
209	Procedemento para o xuízo sobre delito leve	176,96 €
2010	Menores. Proceso terminado con sentenza	299,56 €
2011	Menores. Proceso con outras formas de terminación	204,68 €
2012	Recurso ante o xulgado de vixilancia penitenciaria con intervención preceptiva ou designación de avogado por requirimento xudicial, conforme o artigo 21 da Lei de asistencia xurídica gratuíta	199,35 €
2015	Recursos de apelación de sentenzas, contra autos finais ou admitidos en ambos os efectos e un recurso de apelación en fase de execución. Proceso por delito	199,35 €
2016	Recursos de apelación. Procedemento sobre delitos leves	148,18 €
2017	Defensa xurídica inmediata da muller en dilixencias policiais, aínda que non presente denuncia, e procedementos administrativos que traian causa directa ou indirecta da violencia de xénero	139,65 €
2018	Comparecencia xudicial da orde de protección	139,65 €
2019	Por cada beneficiario do dereito á asistencia xurídica gratuíta adicional no mesmo procedemento, a partir de tres investigados	10 %(1)
2020	Saídas para entradas e rexistros domiciliarios	21,32 €
2021	Dilixencia de entrada e rexistro no ámbito penal	97,76 €
2022	En procedementos penais, comparecencia a vista de agravación ou mantemento da orde de protección	66,89 €

Xurisdición civil.

Código	Denominación	Módulo
301	Procedemento ordinario	409,36 €
302	Xuízo verbal	272,91 €
303	Proceso contencioso de familia completo	442,41 €
304	Proceso de familia de mutuo acordo	272,91 €
305	Medidas provisionais previas e coetáneas en procesos de familia	144,20 €
306	Modificación de medidas definitivas en procesos de familia	442,41 €
307	Proceso sobre filiación ou sobre a adopción de medidas xudiciais de apoio a persoas con discapacidade, agás os internamentos do artigo 763 da Lei de axuizamento civil	364,32 €
308	Monitorio	135,39 €
309	Actuación nun proceso como contador partidor	296,36 €
3010	Proceso de división xudicial de patrimonios e liquidación da sociedade de gananciais	272,91 €
3011	Execucións de títulos xudiciais	224,94 €
3012	Cambiario e execución de títulos non xudiciais	204,68 €
3013	Expedientes de xurisdición voluntaria e internamento non voluntario por razón de trastorno psíquico	204,68 €
3014	Recursos de apelación a sentenzas e autos finais ou admitidos en ambos efectos	199,35 €
3015	Ampliación da demanda en execucións de familia (máximo 1 por ano)	30 %(2)
3016	Impugnación do inventario e caderno particional	263,42 €

Xurisdición contencioso-administrativa.

Código	Denominación	Módulo
401	Recurso contencioso-administrativo. Procedemento ordinario	409,36 €
402	Recurso contencioso-administrativo. Procedemento abreviado	272,91 €
403	Vía administrativa (estranxeiría e asilo)	135,39 €
404	Recursos de apelación a sentenzas e autos finais ou admitidos en ambos efectos	199,35 €
405	Entrada en domicilio	127,93 €

Xurisdición social.

Código	Denominación	Módulo
501	Procesos da xurisdición social (ordinarios e especiais)	330,47 €
502	Recursos de suplicación	199,35 €

Xurisdición militar.

Código	Denominación	Módulo
601	Proceso íntegro	255,85 €

Recursos de casación e amparo.

Código	Denominación	Módulo
701	Recurso de casación	409,36 €
702	Recurso de casación cando non se formaliza e hai só anuncio	124,73 €
703	Recurso de amparo	409,36 €

Actuacións extraprocesuais.

Código	Denominación	Módulo
801	Transaccións extraxudiciais	75 %(3)
802	Informe motivado da insostibilidade da pretensión	90,61 €
803	Desistencia previa ao proceso por pasividade da persoa axuizable, estudo e preparación do asunto previos á presentación da demanda	30 % (3)

Normas xerais.

Código	Denominación	Módulo
901	Achantamento	30 %(3)
902	Execución de sentenza posterior aos dous anos de ditada a resolución xudicial, agás na xurisdición civil	30 %(3)
903	Saídas a centros de prisión e centros de internamento de menores en réxime pechado (máximo de dúas saídas por proceso)	34,11 €
904	Desprazamentos para a asistencia a xuízo oral (avogados con despacho oficial nun partido xudicial distinto ao da sede do xulgado do penal ou da audiencia provincial)	51,17 €
905	Medidas cautelares e dilixencias preliminares	114,07 €
906	Reconvención	135,39 €

(1) Sobre o módulo do procedemento ata o límite do 50 % de dito módulo.

(2) Sobre o módulo da execución.

(3) Sobre o módulo aplicable ao procedemento.