No ente público empresarial Augas de Galicia recibiuse a solicitude de modificación concesional relativa ao aproveitamento hidroeléctrico no río Corzán cuxa concesión foi outorgada pola Resolución do 3 de setembro de 1999. A concesión administrativa do dito aproveitamento autorizaba para derivar un caudal de 1.200 l/s do río Corzán, no concello de Negreira, A Coruña, caudal posteriormente ampliado pola Resolución do 3 de maio de 2001 ata os 1.375 l/s.

Polo tanto, procédese por medio deste anuncio, a someter a competencia de proxectos á solicitude de modificación concesional do aproveitamento hidroeléctrico indicado, conforme dispón o artigo 151.4 do Real decreto 849/1986, do 11 de abril, polo que se aproba o Regulamento do dominio público hidráulico (en diante, RDPH).

– Nome e enderezo do peticionario: Hidroeléctrica del Arnoya, S.L. Avenida de Rubine, número 6 bis, 2º esq.,15004 A Coruña.

– Destino do aproveitamento: aproveitamento hidroeléctrico (uso industrial para a produción de enerxía eléctrica).

– Caudal de auga solicitado: ampliación de 595 l/s adicionais ao caudal autorizado pola Resolución do 3 de maio de 2001.

– Corrente de onde se derivarán as augas: río Corzán.

– Termo municipal onde radican as obras: Negreira (A Coruña)

Con este anuncio, ábrese, de conformidade co artigo 151.4 do RDPH o trámite de competencia de proxectos, limitando esta unicamente á ampliación que se pretende, para que no prazo dun (1) mes, a contar desde o día seguinte ao da publicación deste anuncio no Diario Oficial de Galicia, o peticionario presente instancia na que concrete a correspondente petición e o documento técnico previsto no artigo 106.2 do citado regulamento; e poderá solicitar a declaración de utilidade pública e a imposición de servidumes que se consideren necesarias, admitíndose tamén, durante este prazo, outras peticións que teñan o mesmo obxecto que aquela ou sexan incompatibles con esta. Asemade, en caso de considerarse necesario, deberá achegar, de acordo co establecido no punto 3 do artigo 106, o estudo ambiental que recolla e avalíe todas as afeccións ambientais do proxecto conforme a Lei 21/2013, do 9 de decembro, de avaliación ambiental.

Denegarase a tramitación posterior de toda petición que supoña unha utilización de caudal superior ao dobre do que figura máis enriba como petición base da modificación, de acordo co artigo 105.2 do RDPH, sen prexuízo de que o peticionario que o pretenda poida, dentro do prazo fixado neste anuncio para a admisión de peticións, acollerse á tramitación indicada no parágrafo 3 do antedito artigo 105 do RDPH, remitindo a súa petición na forma prevista no artigo 104 do mesmo, e solicitando a paralización do trámite da solicitude publicada inicialmente. Neste caso, á petición achegará xustificante acreditativo do ingreso na Caixa Xeral de Depósitos da Consellería de Facenda e Administración Pública dunha fianza pola cantidade de sesenta mil (60.000) euros por cada m³/s de caudal solicitado, para responder da presentación do documento técnico correspondente a súa petición.

O concesionario primitivo terá dereito de tenteo sobre a petición que resulte elixida no procedemento, tal e como estipula o artigo 152 do RDPH, dereito que poderá exercer no prazo dun (1) mes.

O desprecintado dos documentos técnicos realizarase na forma sinalada no artigo 107 do RDPH e terá lugar transcorridos dez días desde a conclusión do prazo de presentación de peticións e celebrarase na Sala Branca das dependencias do edificio administrativo de Augas de Galicia, sitas na praza Camilo Díaz Baliño, 7-9, 15781 Santiago de Compostela.

As peticións presentaranse a través de calquera rexistro administrativo ou na sede electrónica da Xunta de Galicia (utilizando o modelo xenérico de presentación de escritos (https://sede.xunta.gal/detalle-procedemento?codtram=PR004A) indicando no destino a Consellería de Medio Ambiente e Cambio Climático, Augas de Galicia e facendo referencia á clave do expediente que figura no encabezamento deste anuncio) de conformidade co establecido no artigo 16 da Lei 39/2015, do 1 de outubro, do procedemento administrativo común das administracións públicas. Ademais, xunto coa petición, deberán presentar os documentos técnicos e ambientais, un, en formato papel, debidamente precintado, e outro, en formato dixital, con acceso restrinxido con clave, que quedarán custodiados e sometidos á confidencialidade. Advírtese que tanto a documentación en papel como a dixital deben estar redactadas, de conformidade co disposto na Lei orgánica 3/2018, do 5 de decembro, de protección de datos persoais e garantía dos dereitos dixitais, para a súa publicación, na cal se deberán censurar os datos de carácter persoal.

Santiago de Compostela, 27 de xaneiro de 2026

Roi Fernández Añón
Director de Augas de Galicia