Examinada a solicitude de deslindamento formulada polos representantes do MVMC Da Costa, pertencente á CMVMC de Santo Estevo, no concello de Carballeda de Avia, e unha propiedade particular, resultan os seguintes

Feitos:

Primeiro. O 11.9.2025, a CMVMC de Santo Estevo presentou un escrito (Rexel 2023/2483095) en que solicita a aprobación dun deslindamento cunha propiedade particular:

– Certificación do acordo adoptado na asemblea xeral en que se autorizou o deslindamento.

– Levantamento topográfico de parcela situada na Costa, lugar de Santo Estevo.

Segundo. O 22.9.2025, o Servizo de Montes de Ourense emitiu un informe favorable ao considerar que non existe unha afección significativa sobre a integridade territorial do monte.

Terceiro. O 9.10.2025 publicouse no DOG o anuncio polo que se facía pública a proposta de deslindamento e se abría o período de alegacións, anuncio que tamén se lle remitiu ao Concello de Carballeda de Avia para os efectos da súa publicación no taboleiro de anuncios.

Completado o dito período de audiencia e información pública, non se recibiu alegación ningunha nesta Administración.

Cuarto. O 3.12.2025, a CMVMC de Santo Estevo presentou outra solicitude (Rexel 2025/3369041) coa que instaba a continuación do procedemento, achegando a seguinte documentación:

• Acta de conciliación redactada o 27.11.2025 no Xulgado de Paz de Carballeda de Avia.

Quinto. O Servizo de Montes do Departamento Territorial de Ourense emitiu un informe favorable o día 9 de decembro de 2025 en relación coa citada solicitude.

Consideracións legais e técnicas:

Primeiro. Esta resolución dítase ao abeiro do artigo 54 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 54 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento de montes veciñais con propiedades particulares. E establece que no caso de informe favorable, unha vez ratificado o deslindamento provisional pola asemblea xeral, darase traslado ao Xurado Provincial dos acordos alcanzados e, cando menos, da seguinte documentación: acta do deslindamento, memoria descritiva cos planos topográficos, acta de conciliación redactada no xulgado de paz ou de primeira instancia correspondente e certificacións de aprobación por parte da comunidade. O Xurado Provincial de Montes Veciñais en Man Común ditará a resolución aprobatoria do deslindamento e notificarállela ás persoas interesadas. A dita resolución será publicada no Diario Oficial de Galicia.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 9 de decembro de 2025, o Xurado Provincial de Montes Veciñais en Man Común acordou, por unanimidade, o día 23 de febreiro de 2026:

Aprobar o acto de conciliación acadado entre o MVMC Da Costa, pertencente á CMVMC de Santo Estevo, no concello de Carballeda de Avia, e unha propiedade particular.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso- administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 17 de marzo de 2026

José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense