O 16 de abril de 2026, a Dirección Xeral de Desenvolvemento Rural ditou a resolución que se transcribe a seguir:

«O acordo de reestruturación parcelaria da zona de Briallos (Portas-Pontevedra) foi aprobado pola dirección xeral competente na materia o 30 de xuño de 2022, e publicado e notificado na forma legalmente prevista, e na actualidade está pendente de declaración de firmeza.

Con posterioridade a estes actos, o Concello de Portas solicitou a cesión da titularidade do predio 712 para agregar a súa superficie ao predio 713, atribuído ao Concello de Portas, e así poder executar obras de ampliación da actual depuradora de Castro e San Roque.

Examinado o expediente, constatouse que o predio 712 figura como adxudicación de propietario descoñecido (prop. nº 900), polo que cómpre permutar o dito predio por un da masa común da zona para manter equilibradas as adxudicacións dos propietarios. Por iso, proponse permutar o predio 713 (descoñecidos) pola parte correspondente do predio 795 (masa común).

Visto o informe emitido polo Servizo Provincial de Infraestruturas Agrarias de Pontevedra, a Lei de reforma e desenvolvemento agrario, do 12 de xaneiro de 1973, a Lei 10/1985, do 14 de agosto, de concentración parcelaria para Galicia, modificada pola Lei 12/2001, do 10 de setembro, a disposición transitoria primeira da Lei 4/2015, do 17 de xuño, de mellora da estrutura territorial agraria de Galicia, a Lei 39/2015, do 1 de outubro, do procedemento administrativo común das administracións públicas, e demais disposicións legais de aplicación ao caso,

Esta dirección xeral, ao abeiro da lexislación vixente,

RESOLVE:

1. Dar de baixa na relación de predios do propietario descoñecidos o predio nº 712, que se dá de alta na relación de predios da masa común da zona, cunha superficie de 791 m2 e 47.460 puntos.

2. Segregar o predio nº 795 (masa común) en dous predios, predio nº 795-1, de 2.022 m2 e 121.320,00 puntos, que permanece na masa común da zona, e predio nº 795-2, de 791 m2 e 47.460 puntos, que se atribúe ao propietario nº 900 (descoñecidos).

3. Ceder ao Concello de Portas a titularidade do predio nº 712, procedente da masa común da zona, para destinalo aos fins indicados na parte expositiva desta resolución.

Se o predio non for destinado aos fins para os que se adxudica, a titularidade do referido predio reverterá no Fondo de Terras da zona, na Axencia Galega de Desenvolvemento Rural (Agader) -ou entidade que corresponda– ou no patrimonio da Comunidade Autónoma, segundo o caso.

4. Ordenar que a esta resolución se lle dea a oportuna publicidade, sen prexuízo da súa notificación ao Concello de Portas».

Contra esta resolución, que non pon fin á vía administrativa, poderá interpoñerse un recurso de alzada ante a persoa titular da Consellería do Medio Rural no prazo dun mes, que se contará desde o día seguinte ao da publicación desta resolución.

Pontevedra, 27 de abril de 2026

Antonio Crespo Iglesias
Director territorial de Pontevedra