Expediente: IN407A 2025/255-1.

Promotora: UFD Distribución Electricidad, S.A.

Denominación do proxecto: LMT, CT e BT Urb. San Pedro de Visma.

Concello: A Coruña.

Feitos:

1. O día 14.11.2025, a empresa promotora solicitou a autorización administrativa previa e a autorización administrativa de construción do proxecto de execución da instalación de distribución eléctrica mencionada, co obxecto de dar resposta ao gran desenvolvemento previsto en San Pedro de Visma.

Ao abeiro do artigo 123 do Real decreto 1955/2000, presentan o proxecto de execución denominado LMT, CT e BT Urb. San Pedro de Visma, asinado o día 18.9.2025 por Carlota Martínez Rúa, graduada en Enxeñería Eléctrica, nº colexiada 4.776 de Vigo; e o anexo ao proxecto asinado pola mesma enxeñeira o 23.3.2026.

2. O proxecto non se someteu ao trámite de información pública, segundo o artigo 50 da Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

3. Consonte o artigo 127 do Real decreto 1955/2000, do 1 de decembro, solicitouse o informe preceptivo ao Concello da Coruña como entidade afectada. No día deste resolución, non consta resposta á dita solicitude.

4. O día 26.3.2026 emitiuse o informe técnico.

Consideracións legais e técnicas.

Primeira. O director territorial é competente para resolver este expediente, ao abeiro do disposto no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro), e no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG núm. 101, do 27 de maio).

Segunda. Lexislación de aplicación

• Lei 24/2013, do 26 de decembro, do sector eléctrico.

• Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

• Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

• Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

• Real decreto 842/2002, do 2 de agosto, polo que se aproba o Regulamento electrotécnico para baixa tensión.

• Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

Terceira. Características técnicas

As instalacións obxecto deste expediente están situadas no lugar de San Pedro de Visma e na rúa Manuel Murguía (A Coruña) e as súas características técnicas son as seguintes:

• Reforma do centro de reflexión 15CKS3 CR Estadio (expte.15780), para dar cabida ás novas liñas creadas desde a subestación de San Pedro de Visma.

• No centro de reflexión 15CKS3 proxéctanse dúas novas celas, polo que é necesario reformar as oito celas de liña e dúas celas de remonte existentes e proxectar dúas novas para darlles peche ás novas liñas da subestación.

• Para as novas liñas SPV-7XX e SPV-7YY é necesario un total de 30 m de RHZ1-2OL(S) 12/20 KV 1×240 mm² Al para a saída desde as posicións da subestación de San Pedro de Visma ata os empalmes que se van realizar coa liña proxectada polo particular en arqueta existente.

• Desmantelamento de dous tramos da SPV-701 á entrada dos CTs 15CPM7 e 15CAR0 para poder anelarse coa rede proxectada en proxecto particular.

• Retirada de 27 m de RHZ1-3x240 da SPV-705 e tendido de 27 m de RHZ1-3x240 para refacer a conexión co CT 15CGWT, CT Parking Mariñeiros, para poder anelar a rede reflectida no proxecto particular.

Cuarta. No expediente consta un informe favorable dos servizos técnicos deste departamento territorial.

De acordo con todo o exposto,

RESOLVO:

A) Conceder a autorización administrativa previa e a autorización administrativa de construción da dita instalación de distribución eléctrica.

B) A instalación executarase no prazo de dous anos, contados a partir do día seguinte ao da publicación desta resolución no Diario Oficial de Galicia.

C) Para a posta en funcionamento da instalación autorizada, deberá achegar ante este departamento territorial unha solicitude á cal xuntará a seguinte documentación:

• As declaracións de conformidade relativas ao material ou equipamento, e as certificacións ou homologacións, se procede.

• Un certificado do/da director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas axeitadas para a montaxe da instalación e posta a punto.

• Planimetría as built da instalación eléctrica en formato shape.

D) Esta aprobación outórgase sen prexuízo doutras que sexan de aplicación segundo a lexislación vixente, en especial no relativo á ordenación do territorio e ao ambiente.

O incumprimento das condicións e requisitos establecidos nesta resolución ou a variación substancial dos presupostos que determinaron o seu outorgamento poderán dar lugar á súa revogación, logo de audiencia ao interesado, segundo o establecido no artigo 53.10 da Lei 24/2013, do 26 de decembro, do sector eléctrico.

Contra esta resolución, que non é definitiva en vía administrativa, poderase interpor recurso de alzada perante a conselleira de Economía e Industria, no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que consideren pertinente.

Mediante este documento notifícaselles ás persoas interesadas esta resolución, segundo o exixido no artigo 40.1 da dita Lei 39/2015.

A Coruña, 19 de abril de 2026

Isidoro Martínez Arca
Director territorial da Coruña