O artigo 9.2 da Constitución española establece que os poderes públicos promoverán as condicións para que a igualdade do individuo e dos grupos en que se integre sexan reais e efectivas, removerán os obstáculos que impidan ou dificulten a súa plenitude e facilitarán a participación de todos os cidadáns na vida política, económica, cultural e social.

O artigo 49 da Constitución española sinala que as persoas con discapacidade exercen os dereitos previstos neste título en condicións de liberdade e igualdade reais e efectivas. Regularase por lei a protección especial que sexa necesaria para o devandito exercicio, e que os poderes públicos impulsarán as políticas que garantan a plena autonomía persoal e a inclusión social das persoas con discapacidade, en contornos universalmente accesibles. Así mesmo, fomentarán a participación das súas organizacións, nos termos que a lei estableza. Atenderanse particularmente as necesidades específicas das mulleres e os menores con discapacidade.

O artigo 35 do Real decreto lexislativo 1/2013, do 29 de novembro, polo que se aproba o texto refundido da Lei xeral de dereitos das persoas con discapacidade e a súa inclusión social, establece que as persoas con discapacidade teñen dereito ao traballo en condicións que garantan a aplicación dos principios de igualdade de trato e non discriminación. E o artigo 59 determina que os poderes públicos desenvolverán e promoverán, entre outras cousas, accións formativas para a promoción da igualdade de oportunidades e a non discriminación, en colaboración coas organizacións representativas das persoas con discapacidade e as súas familias.

En atención a tales previsións legais, a valedora do pobo convoca dúas bolsas por un ano destinadas a persoas con diversidade funcional psíquica para contribuír á súa formación práctica.

Para o desenvolvemento do proceso cóntase coa colaboración de Saúde Mental-Feafes Galicia (Federación de Asociacións de Familiares e Persoas con Enfermidade Mental en Galicia).

Así, en virtude das atribucións que me confire a Lei 6/1984, do 5 de xuño, do Valedor do Pobo

RESOLVO:

Convocar dúas bolsas para contribuír á formación práctica de persoas con diversidade funcional psíquica no Valedor do Pobo, de acordo coas seguintes bases:

Primeira. Obxecto

As bolsas terán por obxecto contribuír á formación práctica no Valedor do Pobo de persoas con diversidade funcional psíquica.

Segunda. Requisitos

Poderán ser beneficiarias destas bolsas as persoas que acrediten reunir os seguintes requisitos:

• Ser española ou nacional dun Estado membro da Unión Europea ou daqueles estados aos cales, en virtude de tratados internacionais, sexa aplicable a libre circulación de persoas.

• Ser persoas con discapacidade psíquica.

• Posuír un grao universitario ou equivalente.

• Ter un coñecemento do galego como idioma propio de Galicia cun nivel Celga 4 ou equivalente.

• Non ter sido beneficiario/a dunha bolsa nesta institución.

Terceira. Dotación económica e cobertura social

As persoas beneficiarias da bolsa disporán de:

a) Unha asignación de 17.400 € brutos anuais, que se percibirán logo de finalizado cada mes do prazo da súa duración, a razón de 1.450 € mensuais, suxeitos á retención que legalmente proceda.

b) Protección social mediante a alta no réxime xeral da Seguridade Social, segundo a normativa vixente e dentro dos requisitos e condicións propios deste tipo de bolsas.

c) Un seguro que inclúa como garantías o falecemento e a invalidez permanente por accidente, que cubra o período de duración da bolsa, cun importe máximo de 300 euros.

Cuarta. Duración

As bolsas terán a duración dun ano, desenvolveranse de forma simultánea e non poderán ser prorrogadas.

Ao finalizar entregarase un certificado acreditativo.

Quinta. Natureza

A adxudicación das bolsas non supón vinculación laboral ou funcionarial entre a persoa beneficiaria e o Valedor do Pobo, nin implica compromiso que transcenda do desenvolvemento das tarefas previstas na presente convocatoria.

Sexta. Desenvolvemento da bolsa

As persoas bolseiras teñen o deber de:

• Cumprir o programa formativo en prácticas que determinen as persoas titoras, cuns niveis de rendemento satisfactorio. Para estes efectos, deben realizar as actividades de estudo que se consideren necesarias e presentar puntualmente os traballos e documentos que se requiran. Estes serán de titularidade do Valedor do Pobo e non poden ser utilizados polos autores sen a correspondente autorización.

• Observar a necesaria discreción e respectar a confidencialidade dos documentos e informacións que coñezan no desenvolvemento da bolsa, salvo os que sexan públicos.

• Non adquirir compromisos ou obrigas que impidan o cumprimento íntegro das tarefas de formación en prácticas, agás renuncia expresa da bolsa.

Realizarán o seu programa formativo nas unidades administrativas e áreas da institución, baixo a titoría de cada responsable, e serán coordinadas polas persoas responsables da Coordinación Xeral e Vicesecretaría Xeral do Valedor do Pobo.

A persoa titular da institución poderá revogar a bolsa se a persoa beneficiaria non realiza ou incumpre as tarefas ou o programa de formación que lle asigne, ou se as tarefas encomendadas non reúnen os requisitos de calidade exixibles. Neste suposto poderase, polo período que reste, conceder a bolsa á persoa candidatura que corresponda segundo a listaxe de reservas elaborada pola Comisión de Avaliación.

Desenvolverán as actividades formativas prácticas durante 37,5 horas semanais.

Habilitarase a posibilidade de realizar parte da formación a distancia (desde o domicilio), sen prexuízo da asistencia presencial cando resulte necesaria, segundo as determinen persoas titoras.

Terán dereito ao desfrute dos días festivos do calendario laboral, ás vacacións e aos permisos necesarios por motivos persoais, logo de solicitude.

As anteriores circunstancias determinaranse segundo as necesidades do servizo.

Salvo baixa médica, a ausencia xustificada ou permitida das prácticas non superará o 20 % da xornada mensual de traballo. Se supera esta porcentaxe, a valedora do pobo poderá rescindir a bolsa.

As tarefas que desenvolverán as persoas seleccionadas, de ser necesario, serán obxecto dunha avaliación por parte de preparadores laborais especializados, que emitirán un informe de análise para o desenvolvemento da bolsa. As persoas seleccionadas disporán da correspondente adaptación nas instrucións de traballo, dos apoios individualizados que fosen necesarios e do auxilio de preparadores laborais.

Sétima. Convocatoria e solicitudes

1) Convocatoria.

A convocatoria será publicada no Diario Oficial de Galicia e na web do Valedor do Pobo.

2) Presentación das solicitudes.

As solicitudes e a documentación axunta presentaranse no rexistro do Valedor do Pobo (rúa Hórreo nº 65, 15701 Santiago de Compostela, A Coruña) ou por calquera outro medio admitido en dereito.

3) Solicitudes e documentación.

As persoas interesadas deberán achegar o seguinte:

• Escrito de solicitude dirixido ao Valedor do Pobo, cuberto e asinado, conforme o modelo do anexo I.

• Copia do DNI ou equivalente.

• Certificado do recoñecemento, grao e tipoloxía da discapacidade.

• Certificado do Celga 4 ou equivalente expedido pola Secretaría Xeral de Política Lingüística.

• Relación de méritos e circunstancias que a persoa solicitante somete a valoración consonte estas bases, presentados de acordo co anexo II da convocatoria. Só se valorarán os méritos e circunstancias que figuren nese anexo.

4) Prazo de presentación.

O prazo de presentación das solicitudes será de 15 días hábiles contados a partir do día seguinte á publicación da convocatoria no Diario Oficial de Galicia.

5) Requirimento de documentación adicional.

A Comisión de Selección poderá requirir a documentación adicional que considere precisa para realizar a súa función. Deberá entregarse de tal forma que permita verificar a súa autenticidade.

6) Posibilidade de retirada posterior da documentación.

A documentación das persoas non seleccionadas poderá ser devolta por petición da interesada ou de quen fose debidamente autorizada, unha vez transcorridos dous meses desde a data na que se faga pública a adxudicación.

Oitava. Procedemento

1) Concluído o prazo de presentación de solicitudes, a Comisión de Selección comprobará, de acordo coa documentación presentada, o cumprimento dos requisitos establecidos na base segunda e avaliará os méritos alegados, conforme os criterios sinalados na base novena desta resolución.

Só se valorarán os méritos que figuren na solicitude.

2) A Comisión requirirá a presentación da documentación ou as aclaracións que xulgue pertinentes, co obxecto de verificar o cumprimento dos requisitos de admisión establecidos na base segunda, ou calquera das circunstancias postas de manifesto nas solicitudes en relación cos méritos alegados, para a súa valoración de acordo co establecido na base novena.

3) Os requirimentos remitiranse única e exclusivamente a través do correo electrónico indicado pola persoa solicitante. A persoa solicitante disporá dun prazo de cinco días hábiles, contados a partir do día seguinte ao de remisión do correo electrónico, para a presentación da documentación ou aclaracións que se lle soliciten.

Se no prazo concedido non se achega a documentación requirida que acredite o cumprimento dos requisitos de admisión, entenderase que a persoa desiste da súa solicitude.

Se a documentación requirida para verificar determinados méritos alegados non se entrega no prazo sinalado pola Comisión, os méritos afectados non serán tidos en consideración.

Se a documentación requirida é para acreditar méritos de cursos oficiais, para telos en consideración como tales é necesario que se achegue a correspondente acreditación documental.

4) Tras a valoración dos requisitos de admisión e os méritos alegados, a Comisión publicará na páxina web da institución a listaxe de persoas solicitantes admitidas coa puntuación acadada, e a listaxe das persoas solicitantes excluídas por non cumprir os requisitos, indicando a causa de inadmisión.

As persoas interesadas disporán dun prazo de cinco días hábiles, contados a partir do día seguinte ao de publicación da listaxe, para presentar ante a Comisión as alegacións ou documentos que consideren que mellor conveñan ao seu dereito.

A Comisión, vistas as alegacións e documentación presentada, realizará as modificacións que procedan respecto á puntuación acadada e ás inadmisións.

5) A Comisión de Selección elevará á valedora do pobo a súa proposta de concesión das bolsas, incluíndo unha listaxe de persoas suplentes por orde de puntuación.

Vista a proposta da Comisión, a valedora do pobo resolverá a concesión das bolsas.

Novena. Criterios de valoración

A valoración dos méritos realizarase de acordo co seguinte baremo:

a) Grao universitario ou equivalente (10 puntos).

Achegarase certificación académica do grao universitario ou equivalente en que expresamente conste a data de iniciación e terminación dos estudos, as cualificacións obtidas e a nota media do expediente académico, na escala numérica de 0 a 10, calculada segundo o sistema establecido no Real decreto 1125/2003, do 5 de setembro, polo que se establece o sistema europeo de créditos e o sistema de cualificacións nas titulacións universitarias de carácter oficial e validez en todo o territorio nacional.

b) Outros graos ou equivalentes (2 puntos por cada grao ou equivalente, cun máximo de 4 puntos).

c) Se algún grao ou equivalente é de carácter xurídico, administrativo, de socioloxía ou de ciencia políticas: 1 punto engadido.

d) Mestrías, cursos ou similares co obxecto de complementar ou ampliar a súa formación académica, convocados, organizados, impartidos ou homologados por institutos, escolas oficiais, entidades de interese público e de defensa das persoas con discapacidade e/ou axentes sociais, excluída a formación regrada (ata 4 puntos):

• De 12 a 20 horas: 0,10 puntos.

• De 21 a 40 horas: 0,25 puntos.

• De 41 a 60 horas: 0,50 puntos.

• De 61 a 90 horas: 0,75 puntos.

• De 91 a 120 horas: 1 punto.

• De 121 a 300 horas: 1,5 puntos.

• De 301 a 600 horas: 2 puntos.

• Máis de 600 horas: 3 puntos.

Cando a duración se exprese en anos ou se indique «curso escolar», estimarase, a priori, unha duración de mais de 600 horas, sen menoscabo da verificación que se faga con base na documentación que se requira.

No suposto en que a duración se exprese en meses, valorarase con 0,33 puntos por mes.

En caso de non constar a duración do curso, valorarase con 0,05 puntos.

Para o caso de que se sinalen diversos cursos de similar contido, só se computará aquel que permita a obtención de maior puntuación.

Para valorar adecuadamente as mestrías e os cursos ou similares, no anexo II deberán constar as súas horas, ou, na súa falta, os meses ou anos de duración, ou que esta foi durante un curso escolar, sen prexuízo da valoración daqueles dos cales non conste a duración con 0,05 puntos.

As prácticas laborais desenvolvidas en organismos públicos ou avaladas ou homologadas por estes valoraranse como cursos oficiais, en función da súa duración. En todo caso, as prácticas integradas na formación regrada ou en cursos alegados non serán obxecto de valoración.

Se a Comisión de Selección require que se acrediten as titulacións ou cursos referidos nas letras a), b), c) e d), deberase presentar o título ou certificado do centro ou organismo respectivo.

As persoas interesadas responsabilizaranse da veracidade dos documentos e dos certificados que presenten. A Comisión poderá requirir a exhibición do documento orixinal para o cotexo da copia presentada.

e) Muller vítima de violencia (2 puntos).

f) Situación ou risco de exclusión social (2 puntos).

Para decidir sobre empates substanciais por méritos equivalentes ou sensiblemente equivalentes, primaranse as mulleres, logo de informe do seu menor grao de inclusión laboral no ámbito da convocatoria por parte de Feafes-Galicia; se persiste, as persoas que con maior grao de discapacidade, e, se persiste, as que acrediten menor experiencia laboral nos últimos 15 anos.

Décima. A Comisión de Selección

1) A Comisión de Selección estará composta polas seguintes persoas:

• Presidencia, con voto de calidade en caso de empate: a persoa titular da Vicesecretaría Xeral.

• Vogais: unha persoa designada por Feafes-Galicia, e unha persoa designada polos sindicatos máis representativos, con carácter rotatorio dos seus representantes en cada convocatoria.

• Secretaría, con voz e voto: a persoa titular da Xefatura de Sección do Valedor do Pobo.

A valedora do pobo designará membros suplentes da Comisión, coa mesma procedencia, que substituirán os titulares en caso de renuncia xustificada ou de imposibilidade para o desempeño da función.

Os nomes das persoas que compoñan a Comisión de Selección e dos seus suplentes publicaranse na páxina web do Valedor do Pobo antes do remate do prazo de presentación de solicitudes.

2) A persoa titular da Secretaría Xeral do Valedor do Pobo asesorará sobre o curso da convocatoria nos aspectos xurídicos ou de calquera outro tipo cando así o solicite a Comisión de Selección.

3) A Comisión instruirá o procedemento de concesión da bolsa e, ademais:

a) Interpretará as bases e resolverá cantas dúbidas puidesen derivar destas.

b) Examinará as solicitudes e a documentación achegada, e comprobará os datos en virtude dos cales se ha de adoptar a proposta e a resolución de adxudicación.

c) Valorará as solicitudes de acordo co baremo que se establece na base novena desta convocatoria.

d) Requirirá as persoas solicitantes para a corrección das solicitudes e a achega de aclaracións, ampliacións de información ou documentación acreditativa.

e) Formulará a proposta de concesión das bolsas ás persoas seleccionadas.

f) Establecerá unha lista de suplentes por orde de puntuación, para os casos de desistencia ou renuncia, revogación ou outras causas que deixen vacante algunha bolsa.

Décimo primeira. Publicidade da resolución de concesión das bolsas

A resolución da valedora do pobo pola que se concedan as bolsas publicarase no Diario Oficial de Galicia e na páxina web da institución.

As persoas beneficiarias e suplentes figurarán coa puntuación outorgada. A súa identificación realizarase con suficiente grao de anonimización (por exemplo, MPG…678).

O resto das persoas participantes que non figuren como beneficiarias ou suplentes poderán solicitar a súa puntuación, aínda que no seu caso constaría que resulta provisional se non se lles requirise a acreditación dos méritos.

Décimo segunda. Incorporación e vacantes

As persoas seleccionadas deberán incorporarse para o desenvolvemento dos labores de formación práctica no prazo que sinale a resolución de adxudicación, cara a aportar os datos precisos para facer efectiva a bolsa.

Se transcorridos 7 días naturais desde a data establecida de incorporación, esta non se produciu, a bolsa poderase entender rexeitada, salvo causa xustificativa.

Se a bolsa resulta rexeitada ou queda vacante en período de vixencia, a valedora do pobo poderá propoñer ás persoas suplentes, na orde en que resultasen, a concesión das bolsas polo tempo que reste respecto do inicialmente previsto.

A bolsa reducirase proporcionalmente no caso de incorporación tardía, abandono ou renuncia.

Décimo terceira. Incompatibilidades, obrigas e cumprimento das persoas bolseiras

Esta bolsa é incompatible con outras bolsas ou axudas financiadas con fondos públicos ou privados, así como con soldos ou salarios que impliquen vinculación contractual ou estatutaria da persoa bolseira, ou con calquera tipo de ingresos habituais pola prestación de servizos profesionais ou a realización de traballo remunerado, agás con aquelas axudas destinadas a cubrir algunha das accións formativas que a persoa bolseira vaia realizar segundo os seus estudos (asistencia a reunións, congresos, seminarios ou cursos de especialización).

Décimo cuarta. Incumprimento das condicións

A constatación da existencia de ocultación, alteración ou manipulación de datos ou calquera outro suposto de incumprimento das obrigas ou condicións que motivaron a concesión da bolsa dará lugar á obriga de lle reintegrar á institución as cantidades percibidas, máis os xuros legais que procedan, todo isto sen prexuízo das responsabilidades en que puidese incorrer a persoa beneficiaria.

Décimo quinta. Información en materia de protección de datos

O tratamento de datos farase de acordo co Regulamento (UE) 2016/679, coa Lei orgánica 3/2018, de 5 de decembro, de protección de datos persoais e garantía dos dereitos dixitais, e co resto da lexislación española aplicable nesta materia.

Os datos persoais facilitados no proceso serán tratados para a xestión das solicitudes e o proceso de selección.

Así mesmo, os datos das persoas que resulten adxudicatarias serán tratados para a xestión, a conformación do expediente persoal, o control de cumprimento de obrigacións, o aseguramento, a xestión económica e o aboamento da bolsa.

Poden exercerse os dereitos de acceso, rectificación, supresión e portabilidade, de limitación e oposición ao seu tratamento, así como a non ser obxecto de decisións baseadas unicamente no tratamento automatizado dos datos, cando procedan, dirixindo comunicación ao Valedor do Pobo, rúa Hórreo nº 65, 15701 Santiago de Compostela (A Coruña).

Santiago de Compostela, 4 de maio de 2026

María Dolores Fernández Galiño
Valedora do pobo