De conformidade co establecido no artigo 92 da Lei 2/2015, do 29 de abril, do emprego público de Galicia, e no Decreto 151/2022, do 4 de agosto, polo que se aproba o Regulamento dos procedementos de mobilidade do persoal funcionario de carreira da Administración xeral da Comunidade Autónoma de Galicia e das entidades públicas instrumentais integrantes do sector público autonómico, en virtude das competencias atribuídas polo Decreto 112/2015, do 31 de xullo, polo que se crea a Axencia Galega para a Xestión do Coñecemento en Saúde e se aproban os seus estatutos (DOG núm. 157, do 19 de agosto),

RESOLVO:

Primeiro. Anunciar a convocatoria para cubrir, polo sistema de libre designación, o posto de traballo que se indica no anexo I desta resolución.

Segundo. Poderán concorrer a ela os/as funcionarios/as ou estatutarios que reúnan os requisitos que se exixen para o desempeño do posto e que se especifican no anexo I.

Terceiro. As funcións do posto convocado, reflectidas no artigo 17.3 dos estatutos da Axencia Galega para a Xestión do Coñecemento en Saúde, son as que se sinalan no anexo III.

Cuarto. As solicitudes para participar nesta convocatoria dirixiranse á Presidencia da Axencia Galega para a Xestión do Coñecemento en Saúde a través de medios electrónicos, segundo o modelo que se inclúe como anexo II a esta resolución, ou ben utilizando os medios establecidos no artigo 16.4 da Lei 39/2015, do 1 de outubro, do procedemento administrativo común das administracións públicas, no prazo de quince (15) días hábiles contados a partir do seguinte ao da publicación desta resolución no Diario Oficial de Galicia.

Quinto. Os/as aspirantes deberán xuntarlle á súa solicitude un curriculum vitae e xustificar documentalmente, mediante certificación ou copia compulsada, os méritos que aleguen.

Os méritos alegados e non probados segundo se indica no parágrafo anterior non serán tidos en conta.

Sexto. No caso de resultar seleccionado/a para ocupar o posto de traballo que se relaciona no anexo I desta resolución un/unha funcionario/a con destino noutra Administración pública, requirirase o informe favorable do órgano competente da súa Administración de orixe, que se considerará favorable no caso de non emitirse no prazo de quince (15) días, tal como dispón o artigo 67 do Real decreto 364/1995, do 10 de marzo, e as demais disposicións concordantes. Unha vez autorizado o seu traslado a esta Administración, procederase a adxudicarlle o posto para o cal foi seleccionado/a. Se no prazo de dous meses a partir da publicación no Diario Oficial de Galicia, o/a funcionario/a seleccionado/a non se puidese incorporar á Comunidade Autónoma, considerarase deserto o posto e poderase proceder de novo á súa provisión.

Sétimo. A resolución desta convocatoria publicarase no Diario Oficial de Galicia e poderase declarar deserto o posto de traballo, de considerarse oportuno.

Oitavo. De conformidade co establecido no artigo 8 do citado Decreto 151/2022, do 4 de agosto, o prazo de toma de posesión será de tres días hábiles, se non implica cambio de residencia, ou de sete días hábiles, se comporta cambio de residencia. Cando o/a adxudicatario/a do posto obteña coa súa toma de posesión o reingreso ao servizo activo, o prazo será dun mes.

O prazo de toma de posesión comezará a contar a partir do día seguinte ao do cesamento, que se deberá producir na data que se determine mediante resolución da Presidencia da Axencia Galega para a Xestión do Coñecemento en Saúde, e publicada no Diario Oficial de Galicia, agás no caso de procedencia doutras administracións, en que deberá efectuarse dentro dos tres días hábiles seguintes ao da comunicación da resolución de traslado á Comunidade Autónoma, co límite de dous meses a que se fai referencia no punto sexto desta resolución.

Se a resolución comporta o reingreso ao servizo activo, o prazo de toma de posesión deberá computarse desde a data de publicación da dita resolución.

Noveno. Contra esta resolución, que pon fin á vía administrativa, poderase interpoñer recurso contencioso-administrativo no prazo de dous meses, contados a partir do día seguinte ao da súa notificación, ante o xulgado do contencioso-administrativo competente, de conformidade co establecido nos artigos 8, 14 e 46 da Lei 29/1998, do 13 de xullo, reguladora da xurisdición contencioso-administrativa.

Potestativamente, e con carácter previo, poderase interpoñer recurso administrativo de reposición, ante este órgano directivo, no prazo dun mes a partir do día seguinte ao da notificación, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 11 de xuño de 2026

Antonio Gómez Caamaño
Presidente da Axencia Galega para a Xestión do Coñecemento en Saúde

ANEXO I

Código do posto: SGS020000415770010.

Denominación do posto: xefatura do Servizo de Docencia.

Dependencia: Axencia Galega para a Xestión do Coñecemento en Saúde.

Localidade: Santiago de Compostela.

Subgrupo: A1.

Nivel: 28.

Complemento específico: 19.120,64 €.

Corpo ou escala: 1.2/ESG/7/A1.

1.2. Corpo facultativo superior da Xunta de Galicia, escala de saúde pública e Administración sanitaria.

ESG. Estatutario do Servizo Galego de Saúde.

7. Persoal pertencente a outros corpos e escalas de carácter sanitario de calquera Administración pública.

A1. Escala xeral.

ANEXO III

Posto de xefe/a do Servizo de Docencia da Axencia Galega para a Xestión do Coñecemento en Saúde

O posto convocado está adscrito á Área de Xestión do Coñecemento e Talento da Axencia Galega para a Xestión do Coñecemento en Saúde e, segundo establecen os estatutos da axencia, as súas funcións son as seguintes:

a) O fomento, a defensa e promoción da importancia estratéxica da formación e a docencia de calidade no Sistema público de saúde de Galicia.

b) A coordinación e autorización da formación práctica dos alumnos de titulacións universitarias, tanto sanitarios coma non sanitarios, nos centros dependentes da Consellería de Sanidade e do Servizo Galego de Saúde.

c) A coordinación, o desenvolvemento e o exercicio das funcións relacionadas coa formación sanitaria especializada, velando pola súa excelencia, así como a elaboración da oferta anual de prazas de formación sanitaria especializada, en colaboración con outras unidades, sobre a base dos estudos de necesidades formativas no ámbito sanitario estatal e autonómico.

d) A organización, avaliación e o informe dos períodos de exercicio profesional en prácticas ou de formación complementaria establecidos no Real decreto 459/2010, do 16 de abril, para o recoñecemento para efectos profesionais de títulos de especialista obtidos en países extracomunitarios.

e) Emisión de resolucións e informes de recoñecemento para efectos profesionais dos títulos de formación profesional expedidos noutros Estados da Unión Europea e a certificación dos títulos de formación profesional expedidos en España para exercer noutros países comunitarios.

f) A planificación, promoción e avaliación das accións de formación continuada sustentadas nas necesidades do Sistema público de saúde de Galicia, así como a materialización da proposta do Plan anual de formación continuada do persoal da Consellería de Sanidade e do Servizo Galego de Saúde.

g) O apoio técnico e administrativo á Comisión Autonómica de Formación Continuada das Profesións Sanitarias, asumindo a Secretaría Técnica do Sistema Acreditador da Formación Continuada das Profesións Sanitarias, así como do Comité de Acreditación.

h) En xeral, cantos asuntos lle sexan encomendados pola Xerencia da axencia en razón do seu ámbito de actuación.