Polas resolucións do 24 de febreiro de 2024, que se recollen no anexo I desta orde, convocáronse varios procesos selectivos da modalidade específica de promoción persoal laboral fixo, regulada na disposición adicional décimo sétima da Lei 2/2015, do 29 de abril, do emprego público de Galicia.

Unha vez rematados os procesos antes indicados, procede ditar esta orde coa finalidade de regular varios aspectos derivados do cambio do vínculo xurídico coa Administración.

De conformidade co artigo 72 da Lei 39/2015, do 1 de outubro, do procedemento administrativo común das administracións públicas, segundo o principio de simplificación administrativa, procede acordar unha única orde para regular as cuestións derivadas do cambio do vínculo xurídico das persoas afectadas polos ditos procesos de promoción específica.

En consecuencia, facendo uso das facultades que me confire o artigo 38 da Lei 1/1983, do 22 de febreiro, de normas reguladoras da Xunta e da súa Presidencia, e demais disposicións de xeral aplicación,

ACORDO:

Artigo 1. Obxecto

1. Esta orde ten por obxecto regular o cambio do vínculo xurídico do persoal recollido no anexo II desta orde que superou os procesos selectivos da modalidade específica de promoción do persoal laboral fixo, recollida na disposición adicional décimo sétima da Lei 2/2015, do 29 de abril, do emprego público de Galicia.

2. Así mesmo, establécese o prazo de toma de posesión como persoal funcionario de carreira do dito persoal.

3. Clarifícanse finalmente outros aspectos ligados ao cambio do vínculo xurídico coa Administración do persoal que superou os ditos procesos selectivos para o ingreso pola modalidade específica de promoción do persoal laboral fixo.

4. Esta orde publícase ao abeiro da Sentenza 7/2026 do Tribunal de Instancia (Sección do Social) núm. 7 de Vigo, do 19 de xaneiro, Decreto de firmeza do 29 de abril, pola que se declara a plena integración do persoal do anexo II na Xunta de Galicia como persoal laboral fixo procedente do Consorcio Galego de Servizos de Igualdade e Benestar.

Artigo 2. Prazo para a formalización do acordo de conformidade de cambio do vínculo xurídico

A partir da publicación desta orde no Diario Oficial de Galicia, o persoal laboral fixo incluído no anexo II deberá asinar un acordo de extinción do contrato de traballo, consonte o recollido na base IV.4 das resolucións de convocatorias dos procesos selectivos. Os efectos administrativos da sinatura deste acordo de extinción serán do 30 de xuño de 2026.

A extinción estará condicionada á efectiva toma de posesión como persoal funcionario de carreira.

Artigo 3. Prazo para o cambio do vínculo xurídico coa Administración

A toma de posesión como persoal funcionario de carreira, que implicará o cambio do vínculo xurídico coa Administración, será o 1 de xullo de 2026.

Artigo 4. Cómputo dos prazos en caso de permisos, licenzas, incapacidade temporal e incapacidade permanente con reserva de posto

No caso de vacacións, permisos ou licenzas, o prazo para a sinatura do acordo de extinción comezará a contar desde a súa finalización; o día da toma de posesión será o seguinte hábil ao da sinatura do dito acordo. Nos supostos de incapacidade temporal ou de incapacidade permanente con reserva de posto, o cómputo do prazo iniciarase a partir da correspondente alta ou reincorporación.

Quedan exceptuados do disposto no parágrafo anterior as situacións derivadas da maternidade ou paternidade.

Artigo 5. Efectos do incumprimento dos prazos

O incumprimento dos prazos antes indicados, agás as causas de forza maior debidamente acreditadas e apreciadas pola Dirección Xeral de Emprego Público e Administración de Persoal, implicará que a persoa interesada desiste voluntariamente do proceso e, polo tanto, non se producirá o cambio do seu vínculo xurídico e manterá a súa condición de persoal laboral fixo e todos os dereitos inherentes á dita condición.

Artigo 6. Excedencias

Segundo o establecido na base IV.6 da resolución de convocatoria, o persoal laboral conservará a situación administrativa que teña recoñecida noutras categorías laborais antes da adquisición da súa condición de persoal funcionario de carreira.

Artigo 7. Compatibilidades

As persoas que, ao abeiro da Lei 53/1984, do 26 de decembro, de incompatibilidades do persoal ao servizo das administracións públicas, teñan autorizada ou recoñecida a compatibilidade para o desempeño doutra actividade, dispoñen dun prazo máximo de dez días hábiles, contados desde o seguinte ao da toma de posesión, para solicitar, ante a Consellería de Facenda e Administración Pública, a compatibilidade conforme a nova condición; entenderase prorrogada a compatibilidade mentres non se dite a nova resolución. Todas as autorizacións ou recoñecementos de compatibilidade realizados con anterioridade á modificación do vínculo xurídico quedan automaticamente sen efecto.

Artigo 8. Mantemento das interinidades

Cando o persoal laboral fixo, estando en excedencia forzosa, excedencia por coidado de fillo e familiares ou con permiso sindical a tempo completo, tome posesión como persoal funcionario de carreira, a persoa substituta continuará desenvolvendo o posto de traballo nas mesmas condicións e circunstancias malia o cambio na correspondente relación de postos de traballo do tipo de posto.

Artigo 9. Reducións de xornada

O persoal laboral fixo que, no momento de se producir o cambio do vínculo xurídico, teña concedida unha redución de xornada, poderá continuar coa mesma redución que tiña concedida unha vez que se formalice o cambio.

Artigo 10. Funcionarización provisional no subgrupo C1

Consonte o recollido na disposición transitoria única do Decreto 165/2019, do 26 de decembro, polo que se establece o procedemento para a adquisición da condición de persoal funcionario de carreira polo persoal laboral fixo do Convenio colectivo único do persoal laboral da Xunta de Galicia, mentres non se produza o desenvolvemento regulamentario das diferentes escalas do grupo B, o persoal funcionarizado da escala de axentes técnicos facultativos, especialidade de educación infantil, queda integrado no subgrupo C1. Este persoal continuará desenvolvendo as funcións da categoría profesional de procedencia.

Disposición derradeira única. Entrada en vigor

Esta orde entrará en vigor o mesmo día da súa publicación no Diario Oficial de Galicia

Santiago de Compostela, 19 de xuño de 2026

O conselleiro de Facenda e Administración Pública
P.D. (Orde do 8.1.2020; DOG núm. 16, do 24 de xaneiro)
Nuria Aguilar Vázquez
Directora xeral de Emprego Público e Administración de Persoal

ANEXO I

Convocatoria do procesos selectivos da modalidade específica
de promoción do persoal laboral fixo obxecto desta orde

Resolución do 24 de febreiro de 2025 pola que se convoca o proceso selectivo para o ingreso, pola modalidade específica de promoción do persoal laboral fixo, no corpo de técnicos de carácter facultativo de Administración especial, grupo B, no corpo de axudantes de carácter facultativo de Administración especial e no corpo administrativo da Administración xeral da Comunidade Autónoma, subgrupo C1 (DOG núm. 48, do 11 de marzo).

ANEXO II

Persoal nomeado funcionario de carreira

As persoas que tomarán posesión como persoal funcionario de carreira, ao abeiro do establecido nesta orde, serán as que proveñen das categorías de persoal laboral que aquí se relacionan.

– Corpo de técnicos de carácter facultativo de Administración especial, escala de axentes técnicos facultativos, especialidade de educación infantil, grupo B.

Categoría 50 (técnico/a especialista en xardín de infancia; técnicos/as superiores en educación infantil) do grupo III.

Nome	NIF	Posto	Carácter
Alonso Otero, Tamara	***8241**	PSS194040136350023	Definitivo