Primeiro. Mediante a Resolución da Axencia Galega de Innovación, do 29 de xuño de 2023 (DOG núm. 132, do 12 de xullo), convocáronse as subvencións para a mellora da capacidade de innovación das empresas en Galicia, a través do financiamento das actividades integradas en plans de deseño para a innovación e a sustentabilidade e plans de innovación en procesos e organización (Deseñapeme e Innovapeme), procedemento IN848D, cuxa actividade se enmarca nas prioridades estratéxicas da RIS3.

Segundo. No marco da citada convocatoria, tras a avaliación realizada pola Comisión de Selección, na súa sesión do 6 de novembro de 2023, ditouse a Resolución da Dirección da Axencia Galega de Innovación do 15 de novembro de 2023 (DOG núm. 224, do 24 de novembro), pola que se acordou a concesión e denegación das solicitudes presentadas.

Terceiro. O 28 de novembro de 2025, a Sección 3ª da Sala do Contencioso-Administrativo do Tribunal Superior de Xustiza de Galicia ditou a Sentenza 416/2025, pola que se anulou a Resolución do 15 de novembro de 2023 e se acordou a retroacción das actuacións ao momento anterior ao seu ditado, co fin de que se dite unha nova resolución.

Cuarto. En execución da dita sentenza, mediante a Resolución da directora da Axencia Galega de Innovación, do 26 de febreiro de 2026, acordouse a retroacción das actuacións ao momento anterior ao ditado da Resolución do 15 de novembro de 2023.

Quinto. Atendendo ao informe elaborado pola Comisión de Selección, na súa sesión do 6 de novembro de 2023,

RESOLVO:

Primeiro. Resolver o procedemento de concesión das axudas para a mellora da capacidade de innovación das empresas en Galicia, a través do financiamento das actividades integradas en plans de deseño para a innovación e a sustentabilidade e plans de innovación en procesos e organización (Deseñapeme e Innovapeme).

Segundo. Ratificar o establecido na Resolución do 15 de novembro de 2023 (DOG núm. 224, do 24 de novembro), á que se remite integramente en canto á concesión, desestimación e inadmisión das solicitudes, nos termos previstos nos seus anexos I, II, III, IV e V.

Terceiro. Conservar todos os actos e trámites posteriores da convocatoria cuxo contido se tería mantido igual de non terse producido o vicio apreciado, de conformidade co disposto no artigo 51 da Lei 39/2015, do 1 de outubro, do procedemento administrativo común das administracións públicas, incluídos os actos de concesión, disposición, recoñecemento de obriga, pagamento, xustificación, comprobación e demais actuacións derivadas da Resolución do 15 de novembro de 2023 que non resultan afectadas pola execución da sentenza. En consecuencia, enténdese cumprido o disposto nos números 4 e 5 do artigo 23 das bases reguladoras.

Cuarto. Publicar esta resolución no Diario Oficial de Galicia e na páxina web da Axencia Galega de Innovación, e incorpórase nesta última a desagregación das puntuacións correspondentes ás entidades beneficiarias, sendo accesible na seguinte ligazón: http://gain.xunta.gal/artigos/526/desenapeme+innovapeme+2023

Quinto. Remitir ao recorrente en vía xudicial o detalle da puntuación acadada e da avaliación efectuada, sen prexuízo de que calquera outro interesado poida solicitar información adicional.

Contra esta resolución, que non pon fin á vía administrativa, poderá interpoñerse recurso de alzada ante a persoa titular da Presidencia da Axencia Galega de Innovación, no prazo dun mes contado desde o día seguinte ao da súa publicación no Diario Oficial de Galicia, de conformidade co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, e no artigo 24 das bases reguladoras da convocatoria.

Santiago de Compostela, 6 de agosto de 2026

Carmen Cotelo Queijo
Directora da Axencia Galega de Innovación