O 11 de febreiro de 2026 publicouse no Diario Oficial de Galicia a Resolución do 29 de decembro de 2025 pola que se aproban as bases reguladoras para a concesión de subvencións, en réxime de concorrencia non competitiva, destinadas á renovación e/ou instalación de ata un máximo de dous sistemas de depuración autónomos en concellos da Comunidade Autónoma de Galicia, e se convocan para o ano 2026 (código de procedemento AU300B), en diante resolución da convocatoria.
O artigo 24.1 da resolución da convocatoria refírese ao prazo para presentar a xustificación do investimento da subvención, e indica o seguinte:
«1. Os beneficiarios terán de prazo para presentar a xustificación do investimento da subvención concedida ata o 8 de outubro de 2026».
Con posterioridade ao outorgamento das subvencións recibíronse en Augas de Galicia comunicacións de varios dos concellos que foron beneficiarios en que solicitaban a ampliación do prazo de xustificación.
O artigo 45.3 do Regulamento da Lei 9/2007, do 13 de xuño, de subvencións de Galicia, aprobado polo Decreto 11/2009, do 8 de xaneiro, establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros.
Por outra banda, remítese ao disposto con carácter xeral no artigo 32 da Lei 39/2015, do 1 de outubro, do procedemento administrativo común das administracións públicas, en que se indica que a ampliación poderá acordarse de oficio ou por instancia de parte antes do vencemento do prazo de que se trate e se as circunstancias así o aconsellasen.
As bases reguladoras non conteñen ningún precepto en contra da ampliación do prazo de xustificación.
A ampliación do prazo non causa prexuízo a terceiros.
Por todo o anterior, sobre a base dos requisitos e condicións previstos na normativa anteriormente citada e tendo en conta todo o exposto,
RESOLVO:
Artigo único. Modificación da Resolución do 29 de decembro de 2025 pola que se aproban as bases reguladoras para a concesión de subvencións, en réxime de concorrencia non competitiva, destinadas á renovación e/ou instalación de ata un máximo de dous sistemas de depuración autónomos en concellos da Comunidade Autónoma de Galicia, e se procede á súa convocatoria para o ano 2026 (código de procedemento AU300B)
Modifícase o número 1 do artigo 24 da Resolución do 29 de decembro de 2025 pola que se aproban as bases reguladoras para a concesión de subvencións, en réxime de concorrencia non competitiva, destinadas á renovación e/ou instalación de ata un máximo de dous sistemas de depuración autónomos en concellos da Comunidade Autónoma de Galicia, e se procede á súa convocatoria para o ano 2026 (código de procedemento AU300B), que queda redactado como segue:
«1. Os beneficiarios terán de prazo para presentar a xustificación do investimento da subvención concedida ata o 30 de outubro de 2026».
Disposición derradeira única. Entrada en vigor
Esta resolución producirá efectos desde o día da súa publicación no Diario Oficial de Galicia.
Santiago de Compostela, 21 de setembro de 2026
A presidenta de Augas de Galicia
P.D. (Disposición adicional cuarta da
Resolución do 29.12.2025; DOG núm. 28, do 11.2.2026)
Roi Fernández Añón
Director de Augas de Galicia