Unha vez examinado o expediente de solicitude de clasificación da Fundación Rodosa Collection, con domicilio na avenida Pablo Iglesias, número 71, baixo, 36391, en Priegue-Nigrán (Pontevedra), resultan os seguintes feitos e consideracións legais.

Feitos:

1. O 13 de xullo de 2026, a Fundación Rodosa Collection presentou unha solicitude de clasificación, declaración de interese galego e inscrición no Rexistro de Fundacións de Interese Galego.

2. Esta fundación constituíuna Talleres Rodosa, S.L.U., mediante escritura pública outorgada o 9 de xullo de 2026 perante o notario de Vigo, Javier Fernández Rodríguez, co número de protocolo 2140.

3. A Fundación, consonte o artigo 6 dos seus estatutos, ten por obxecto:

«A conservación, investigación, documentación, restauración e difusión histórica de vehículos, arquivos, patrimonio industrial e legado cultural das marcas Renault e Alpine, en todas as súas manifestacións».

4. O padroado inicial da fundación está formado por Talleres Rodosa, S.L.U., como presidente; Ana Belén Álvarez Almeida, como secretaria, e David Antonio Romero Pereira e Pablo Romero Pérez, como vogais.

5. A comisión integrada polos secretarios xerais de todas as consellerías eleva ao conselleiro de Presidencia, Xustiza e Deportes a proposta de clasificación como de interese cultural da Fundación Rodosa Collection, en base ás materias que constitúen o seu obxecto fundacional.

6. Na escritura de constitución consta a identidade dos fundadores, a dotación inicial, os estatutos e a identificación dos membros do padroado.

7. De conformidade co artigo 51 do Decreto 14/2009, do 21 de xaneiro, polo que se aproba o Regulamento de fundacións de interese galego, e segundo proposta da Comisión de Secretarios Xerais, procede a súa clasificación como de interese cultural e a súa adscrición á Consellería de Cultura, Lingua e Xuventude.

Consideracións legais:

1. O artigo 34 da Constitución española recoñece o dereito de fundación para fins de interese xeral de acordo coa lei e o artigo 27.26 do Estatuto de autonomía de Galicia establece a competencia exclusiva sobre o réxime das fundacións de interese galego.

2. A escritura de constitución da Fundación contén os datos esixidos na Lei 12/2006, do 1 de decembro, de fundacións de interese galego.

3. Consonte o artigo 7 do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, correspóndelle a esta Consellería de Presidencia, Xustiza e Deportes a clasificación da fundación e a adscrición á consellería correspondente, que exercerá as funcións de protectorado.

De conformidade co exposto, e ao considerar que se cumpren as condicións establecidas pola normativa vixente en materia de fundacións de interese galego, de acordo coa proposta realizada pola Comisión de Secretarios Xerais na súa reunión do día 15 de setembro de 2026,

DISPOÑO:

Clasificar de interese cultural a Fundación Rodosa Collection e adscribila ao protectorado da Consellería de Cultura, Lingua e Xuventude.

Contra esta orde, que pon fin á vía administrativa, pode interpoñerse no prazo de dous meses recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia, consonte o artigo 46.1 da Lei 29/1998, do 13 de xullo, reguladora da xurisdición contencioso-administrativa. Previamente e con carácter potestativo, pode interpoñerse no prazo dun mes recurso de reposición perante o mesmo órgano que ditou o acto, de conformidade co artigo 124 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 18 de setembro de 2026

Diego Calvo Pouso
Conselleiro de Presidencia, Xustiza e Deportes