Remata o proxecto Bitácora promovido por Amigos co apoio da Xunta cos obxectivos cumpridos
Boiro (A Coruña), 22 de setembro de 2024
A directora xeral de Desenvolvemento Pesqueiro, Marta Villaverde, participou na clausura do proxecto Bitácora da Asociación Amigos co apoio da Consellería do Mar e cofinanciado a través do Galp Ría de Arousa con fondos europeos. Os obxectivos desta iniciativa foron poñer en valor o patrimonio inmaterial marítimo pesqueiro, vincular o turismo coas actividades pesqueiras, promover e revalorizar os recursos e produtos do mar como alimento saudable e de proximidade. A directora xeral destacou que esta iniciativa vai en liña coas actuacións promovidas polo Goberno galego co valor engadido de promover a integración das persoas con diversidade funcional e outros colectivos en risco de exclusión social.
Marta Villaverde valorou moi positivamente o traballo desenvolvido pola entidade promotora con este proxecto que permitiu xerar sinerxías entre sectores sociais a prol do benestar social da comunidade pesqueira da zona. Nesta liña, resaltou o número de actividades desenvolvidas como xornadas de traballo co sector pesqueiro, accións formativas, actuacións dirixidas á sensibilización en centro educativos, limpezas en areais, unha campaña de valorización dos produtos pesqueiros. Ademais, elaborouse material audiovisual que se materializou nun documental no que axentes medioambientais entrevistan a profesionais do sector e que foi proxectado no acto de clausura desta iniciativa.
Imaxes relacionadas
