Ferrol, 12 de novembro de 2024

A delegada territorial da Xunta en Ferrol, Martina Aneiros, participou esta mañá no teatro Jofre na presentación da novena edición dos Premios Paraugas nos que a Xunta colabora co Clúster de Comunicación de Galicia para darlle visibilidade ao deseño galego.

Na súa intervención, Aneiros explicou que o recoñecemento ao deseño galego é un dos eixos do Programa de Deseño para a innovación e a Sustentabilidade da Axencia Galega de Innovación (Gain) e “os Premios Paraugas son xa un referente na distinción de quen representa a mellor comunicación en todas as súas vertentes, incluíndo o deseño”, dixo.

Aneiros puxo en valor o traballo de cooperación que o Goberno galego vén desenvolvendo cos axentes do sector e entidades como o Clúster de Comunicación de Galicia e que redunda “na mellora dos instrumentos de apoio ao ecosistema do deseño galego” e fixo mención á convocatoria das axudas DeseñaPeme pensadas para que as microempresas e pemes galegas poidan mellorar o seu crecemento e a súa capacidade de innovación e sustentabilidade a través da incorporación e a xestión do deseño estratéxico.

Por último agradeceu ao Clúster de Comunicación o esforzo de organización destes galardóns “cos que non só celebramos a creatividade e a innovación, senón tamén a importancia dun sector chave que impulsa o desenvolvemento e fortalece a nosa identidade cultural e económica”, asegurou.

Os Premios Paraugas distinguen cada ano aqueles traballos ou estratexias de creatividade, deseño, edición, impresión, márketing, eventos e comunicación que sobresaen polas súa innovación, funcionalidade, boas prácticas e obtencións de bos resultados.