Persoal do Servizo de Prevención e Defensa contra os Incendios Forestais participa nunha formación en emerxencias impartida por militares
Dous axentes ambientais da Consellería do Medio Rural formaron parte do Curso Básico de Emerxencias para Oficiais e Suboficiais ofrecido polo Ministerio de Defensa entre os meses de xullo e novembro
Esta formación contou con 625 horas lectivas e un máximo de 10 prazas para persoal de organismos e entidades civís de emerxencias, das cales dúas estiveron ocupadas polos profesionais da Dirección Xeral de Defensa do Monte
O curso estivo composto por unha fase de teleformación e outras dúas presenciais, que se levaron a cabo na base da Unidade Militar de Emerxencias de León e na Academia de Infantería de Toledo
Santiago de Compostela, 7 de decembro de 2024
Persoal do Servizo de Prevención e Defensa contra os Incendios Forestais (SPIF) da Consellería do Medio Rural participou no Curso Básico de Emerxencias para Oficial e Suboficiais ofrecido polo Ministerio de Defensa. A formación, que se desenvolveu entre os meses de xullo e novembro, contou coa presenza de dous axentes ambientais da Dirección Xeral de Defensa do Monte.
O curso, impartido pola Unidade Militar de Emerxencias (UME), dispuxo dun total de 104 prazas destinadas para membros das forzas armadas e para os corpos de seguridade do Estado, das cales dez estiveron destinadas para persoal de organismos e entidades civís relacionadas coas emerxencias, sendo dúas ocupadas polo persoal do SPIF.
A formación constou de 625 horas lectivas dividas en tres fases. A primeira centrouse na teleformación e as dúas seguintes impartíronse de xeito presencial, primeiro na base de León da UME e a segunda na Academia de Infantería de Toledo, esta última agrupando a todos os participantes do curso.
Ao longo destes meses, os profesionais que formaron parte do curso adquiriron coñecementos, habilitades e destrezas para actuar en diferentes situacións de emerxencia.
Imaxes relacionadas
