Santiago de Compostela, 10 de febreiro de 2025

O presidente da Xunta, Alfonso Rueda, sinalou hoxe que Galicia lidera a compra pública de innovación en España ao captar “practicamente a metade dos proxectos” e 45,6 M€ da última convocatoria da Liña FID (Fomento da Innovación desde a Demanda) financiada con cargo a fondos europeos mediante FEDER plurirrexional e convocada polo Ministerio de Ciencia, Innovación e Universidades.

Estes resultados, segundo resaltou o presidente autonómico, supoñen “seguir traballando para colocar a Galicia nunha posición punteira dentro do Estado en materia de innovación”. En total, concédense para toda España 20 proxectos, nove deles en Galicia. Destes, oito son liderados pola Xunta, e un pola Empresa Municipal de Augas da Coruña (Emalcsa). Estas iniciativas implican investimentos por preto de 76 M€: 45,6 millóns dos fondos europeos, 28 millóns de fondos propios da Xunta, e 2,1 millóns de Emalcsa.

A Compra Pública de Innovación, que tal e como sinalou Rueda é unha “modalidade de contratación que permite dispoñer de ferramentas e de subministracións que non están dispoñibles no mercado”, desenvolve e acelera solucións baseadas en I+D+i.  Tal e como lembrou o responsable do Executivo galego, a Comunidade executou no período 2007-2020 proxectos de Compra Pública Innovadora por importe de “252 millóns de euros”. No período  2021-2027 estanse a executar proxectos por 148 M€, o que supón un investimento total de 400 M€ en Galicia.

Os oito proxectos liderados pola Xunta na convocatoria da liña FID que vén de resolverse permiten obter financiamento extraordinario por valor de máis de 42 M€. O Consello da Xunta analizou un informe hoxe sobre este proceso, que implica a catro consellerías diferentes, o que amosa a determinación do Goberno galego ante a I+D+i. Tal e como informou Rueda, quen agradeceu “o traballo realizado polos técnicos da Administración autonómica”, trátase dos departamentos de Sanidade, de Medio Ambiente e Cambio Climático, de Economía e Industria e de Educación, Ciencia, Universidades e Formación Profesional.

As iniciativas apoiadas corresponden a distintos sectores de actividade: desde servizos públicos básicos como a atención médica personalizada, a creación do expediente dixital único do alumnado e a aplicación de intelixencia artificial para combater o abandono escolar, ata solucións innovadoras baseadas no hidróxeno verde, a dixitalización de datos xeolóxico-mineiros, as enerxías mariñas, novas técnicas de rehabilitación e materiais sostibles para as construcións tradicionais, a redución da pegada de carbono ou a creación dun xemelgo dixital dos ríos da cunca hidrográfica de Galicia-Costa.

Esta diversidade reforza o carácter transversal da innovación nas políticas públicas da Xunta. Ademais, tal e como marca o novo Plan de I+D+i que vén de aprobar o Executivo galego, amplíanse os ámbitos de actuación nos que se viña centrando a Compra Pública, que eran principalmente o eido sanitario, o dos vehículos non tripulados e a auga.

A alta participación dos distintos departamentos da Xunta e o éxito nesta convocatoria débese a un proceso interno de recollida de propostas e avaliación iniciado a comezos de 2023 no seo da Comisión Interdepartamental de I+D+i e promovido pola Axencia Galega de Innovación, a través do que se recibiron 31 propostas de distintos departamentos.

Solucións innovadoras na sanidade

A Consellería de Sanidade obtén 12 M€ de apoio para o proxecto Precisaúde, que conta cun orzamento total de 20 M€. Baseándose na medicina 5P (personalizada, preventiva, predictiva, participativa e poboacional), procura o desenvolvemento de solucións innovadoras baseadas na aplicación de técnicas de diagnóstico e tratamento específicas para cada paciente en función das súas características individuais. Solucións a través de biomarcadores (en oncoloxía, tratamentos da obesidade e trastornos mentais), de sistemas de simulación para tratamento de feridas o para atención nos casos de PCR e ECMO (osixenación por membrana extracorpórea), da construción de plataformas avanzadas de análise xenómica integrada e para a produción de terapias celulares avanzadas,  para a súa implantación no Servizo Galego de Saúde.

Catro proxectos en Economía e Industria

A Consellería de Economía e Industria logra apoio para catro proxectos polos recibirá 12,8 M€ dun investimento global de 21,3 M€. En primeiro lugar, leva adiante a proposta de Smartmin Tech, con 8,5 M€ de orzamento, orientado á obtención e dixitalización de datos xeolóxico-mineiros de Galicia, cun sistema de información avanzada e unha plataforma de xestión. Así mesmo, compleméntase co desenvolvemento de solucións innovadoras relacionadas coa integración ambiental e a economía circular.

Tamén o Centro Galego de Solucións Innovadoras en torno á Cadea de Valor do Hidróxeno Verde, cun orzamento de 4,23 M€. O proxecto procura o desenvolvemento e implantación dun centro demostrador (en rede) para a posta en marcha de solucións innovadoras para aumentar as capacidades industriais en materia de produción, almacenaxe, transporte, distribución e consumo de hidróxeno renovable (Prototipo de xeración de hidróxeno verde a partir de auga de mar).

A través do Instituto Enerxético de Galicia, obtén apoio para Innomar, dotado con 5,74 M€ para novas solucións tecnolóxicas para a zona experimental de enerxías mariñas de Punta Langosteira. Contempla o deseño, desenvolvemento e implementación dunha estrutura que albergue un multiconector flotante e sensorizado que permita a interconexión de prototipos de xeración eléctrica renovable no medio mariño.

O cuarto proxecto da Consellería de Economía, neste caso canalizado a través da Axencia Galega de Industria Forestal, recibe apoio Lignoaldeas, cun investimento previsto de 2,85 M€ para dar solucións innovadoras baseadas na natureza, novas técnicas de rehabilitación e materiais sostibles con base en recursos forestais de proximidade para as construcións tradicionais dos núcleos rurais galegos.

Dúas candidaturas de Medio Ambiente

A Consellería de Medio Ambiente e Cambio Climático presentou ao proceso dúas propostas, cun investimento global de 12,8 M€ do que recibirá 7,7 M€. O primeiro deles é o proxecto SICLE CO2, cun orzamento de 6,82 M€. A proposta ten como obxectivo promover unha compensación de emisións de proximidade que axuden, ademais, de forma máis directa á redución da pegada de carbono en Galicia. A tal efecto, prevese un banco de parcelas público, unha plataforma de colaboración para o intercambio de compensacións, o seguimento de proxectos e unha ferramenta preditiva para determinar a absorción de CO2 dos terreos agrícolas e as áreas costeiras.

Esta mesma Consellería presentou un segundo proxecto, neste caso desde Augas de Galicia: AugaTech. Cun orzamento de 6M€, a proposta prevé desenvolver ferramentas de intelixencia artificial para mellorar a información á cidadanía e para crear un xemelgo dixital dos ríos da cunca hidrográfica de Galicia-Costa, coa finalidade de aumentar a transparencia e mellorar a xestión dos recursos hídricos fronte o cambio climático.

Intelixencia artificial na educación

Finalmente, a Consellería de Educación consigue 9,9 M€ de financiamento para EdugalIA, cun orzamento total de 16,5 M€, que persegue mellorar a equidade e calidade do sistema educativo a través do emprego da intelixencia artificial. Centrarase en melloras na gobernanza e no procesamento de datos para incidir particularmente na prevención do abandono escolar. Creará tamén co expediente dixital único do alumnado e establecerá un novo modelo no acceso de alumnos e familias á información de interese, cun punto único de contacto e ferramentas informáticas específicas.

A Compra Pública de Innovación é un instrumento de fomento da innovación orientado a potenciar o desenvolvemento de solucións innovadoras a través da contratación pública. O obxectivo é mellorar os servizos públicos mediante a incorporación de bens ou servizos, fomentar a innovación empresarial e impulsar a internacionalización empregando o mercado público local como cliente de lanzamento ou referencia.