Ponte Caldelas (Pontevedra), 4 de marzo de 2025

A conselleira María M. Allegue pon en valor o potencial de empresas galegas como SETGA en materia de infraestruturas.

A titular de Vivenda e Planificación de Infraestruturas, xunto co director da Axencia Galega de Infraestruturas, Francisco Menéndez, visitou hoxe as instalacións da empresa SETGA, especialista en iluminación pública e con talento galego na súa plantilla.

Subliñou que dotar as estradas dunha iluminación eficiente é fundamental para reforzar a seguridade viaria, protexendo tanto aos condutores como aos peóns. Sinalou que ao mesmo tempo, as luminarias deben ser amables, tratando de evitar a contaminación lumínica e optimizando o aforro enerxético.

Citou intervencións da Xunta nas que o alumeado cobrou especial relevancia, xa que contribuíu á seguridade viaria, pero tamén a realzar a beleza das contornas. Así, referiuse á posta en valor da Ponte Vella de Ourense ou o acondicionamento da Avenida da Deputación no polígono de Sabón, en Arteixo.

Tamén remarcou outro proxecto ambicioso do Goberno galego como foi a mellora e integración paisaxística das entradas dos Camiños de Santiago na cidade de Compostela.

Detallou a recente dotación de iluminación no enlace da autovía do Salnés, en Sanxenxo; ou  a regulación semafórica na rúa Progreso, nese mesmo municipio.

Fixo fincapé en que a Xunta, na súa aposta pola innovación, está a dispoñer sistemas de luces interactivas nos pasos de peóns de vías autonómicas, para incrementar a percepción dos viandantes.

Destacou que o Goberno galego segue traballando a prol dunhas infraestruturas máis seguras, sostibles e humanizadas, destinando este ano nos Orzamentos unha partida de 68M€ para garantir a seguridade e a conservación nas estradas.