A Coruña, 7 de Marzo de 2025

O director da Axencia Galega da Calidade Alimentaria, Martín Alemparte, participou esta mañá na inauguración da sexta edición da feira BioCultura, o evento de referencia dos produtos ecolóxicos que se está a celebrar esta fin de semana na cidade da Coruña.

Durante a súa intervención, Alemparte puxo en valor este tipo de eventos, fundamentais para fomentar o consumo de produtos saudables e ecolóxicos entre a poboación. Asemade, sinalou que este tipo de iniciativas favorecen as canles curtas de comercialización, ao propiciar un contacto directo entre o produtor e o consumidor.

Nesta edición, a Axencia Galega da Calidade Alimentaria, en colaboración co Consello Regulador da Agricultura Ecolóxica de Galicia (Craega), apoia a presenza dun total de 27 operadores ecolóxicos da nosa comunidade no espazo institucional do Goberno galego. Nel están a amosar a súa oferta de produtos lácteos, da horta, cárnicos, repostería, conservas, cervexas, viños e licores, entre outros. Ademais da presencia dos expositores, haberá un aula de cata onde se farán as presentacións dos produtos, actividades culturais relacionadas coa produción ecolóxica, catas e demostracións de cociña.

Así, a Axencia Galega da Calidade Alimentaria ten programadas ata 13 actividades nesta feira, que abranguen desde o “mar ecolóxico” -cunha maridaxe de algas e sidra, entre outros produtos-, ata os lácteos ecolóxicos, pasando por carnes de vacún das razas autóctonas galegas, a artesanía alimentaria ecolóxica, o mel ou a horta.

Referente en España

BioCultura está a situarse como un evento de referencia nacional no ámbito do ecoturismo e os produtos ecolóxicos, e forma parte dunha rede doutros eventos similares que se celebran nas principais cidades de España. Este ano agárdase a visita de ao redor de 15.000 persoas.

Nesta ocasión exporán a súa oferta unhas 110 empresas e entidades dos sectores de  ecoturismo, alimentación ecolóxica, eco-cosmética, moda sostible e todo o que ten que ver cun eco-estilo de vida. Ademais, terán lugar paralelamente preto de 100 actividades, relacionadas cos temas de interese actual.

A relación de operadores ecolóxicos que asistirán a BioCultura da man da Xunta é a seguinte:

• TRASDEZA NATUR, froitas e verduras deshidratados
• LUCIA AFONSO, mel
• CELTAVERDE SL, produtos cárnicos
• JAMONES GONZÁLEZ SLU, produtos cárnicos
• CONSERVAS COUTO MISTO SL, conservas precociñados
• ECOGALLETAS, doces
• ABELLA MEIGA, mel
• BUBELA ARTESÁ, pasta alimenticia especial e cervexa
• PORTO-MUÍÑOS SL, algas
• BARONCELI, conservas vexetais
• GALURIÑA, empanadas
• MARUXAS DE NATA, galletas
• MILHULLOA, verduras deshidratadas
• VERIN BIOCOOP SCG, produtos cárnicos
• CELEBRIDADE GALEGA, cervexa
• OVOS CORAZÓN DE GALICIA, ovos
• CASA GRANDE DE XANCEDA, iogur, leite, queixo
• TATA ALIMENTOS, deshidratados vexetais
• DAIQUI SCG, mel, froitos secos, verduras e froitas e legumes
• AVILUGO, carne de ave
• CALABIZO, produtos veganos
• LENATT FOOD SC, cremas doces
• ARQUEIXAL, queixo
• BIOBRA, viños e licores
• A HORTA DE SANCOVEIGA, verduras
• ACEITES FIGUEIREDO, aceite
• TRALOAGRO, produtos cárnicos.