Madrid, 11 de marzo de 2025

O director xeral de Maiores e Atención Sociosanitaria, Antón Acevedo, participou na presentación do videoxogo The Mind Guardian, creado por investigadores galegos para detectar sintomatoloxía compatible co deterioro cognitivo. Durante o evento, destacou a importancia de contar con novas iniciativas que fomentan un uso da tecnoloxía que permita estimular e mellorar a actividade cognitiva dos maiores.

Este videoxogo, que presenta Samsung e que se poderá utilizar a través dos dispositivos móbiles, foi impulsado por investigadores do centro AtlanTicc da Universidade de Vigo, polo Instituto de Investigación Sanitaria Galicia Sur e pola entidade Afaga Alzhéimer. Deste xeito, o director xeral enxalzou o seu labor e fixo fincapé na importancia de seguir traballando neste eido para transformar as novas tecnoloxías en aliadas para o coidado das persoas maiores.

Antón Acevedo sinalou que este videoxogo, orientado a detectar de xeito precoz o deterioro cognitivo, é unha ferramenta fundamental para seguir mellorando a atención ás persoas maiores e promovendo un envellecemento activo. Así, sinalou que este tipo de iniciativas están en sintonía co novo modelo de residencias e coidado de maiores que promove a Xunta de Galicia.