Santiago de Compostela, 27 de marzo de 2025

O Diario Oficial de Galicia publica hoxe a resolución pola que se conceden as axudas para o fomento das razas autóctonas galegas. En total, o Goberno autonómico repartiu 220.000 euros entre dez asociacións de criadores. As beneficiarias destas achegas son as organizacións ou asociacións de criadores das razas autóctonas galegas, recoñecidas oficialmente pola Comunidade Autónoma para a xestión do libro xenealóxico no marco do Programa de cría da raza correspondente.

O investimento total procede dos orzamentos xerais tanto da Xunta como do Ministerio de Agricultura, Pesca e Alimentación (MAPA). No marco destas achegas, son subvencionables os gastos derivados da creación ou mantemento de libros xenealóxicos. As achegas tamén servirán para sufragar os gastos relativos á implantación e desenvolvemento dos programas de cría oficialmente aprobados.

Neste sentido, as axudas teñen como finalidade aumentar a rendibilidade das explotacións gandeiras; modernizar o sector primario galego en materia de xenética, sanidade e producións; así como mellorar a eficiencia dos sistemas produtivos agrarios e das calidades nas súas producións.

Estas subvencións non só presentan beneficios para a biodiversidade, senón que contribúen á preservación do patrimonio cultural de Galicia e ao desenvolvemento económico da comunidade rural galega. Manter medidas de apoio a estas razas tamén permite que se desenvolvan sistemas agrogandeiros máis resilientes e sostibles.

Ligazón á resolución no DOG:

https://www.xunta.gal/dog/Publicados/2025/20250327/AnuncioG0426-190325-0002_gl.html