Santiago de Compostela, 19 de maio de 2025

A directora xeral de Estratexia Industrial e Solo Empresarial, Margarita Ardao, reuniuse esta mañá co alcalde de Pontedeume, Bernardo Fernández, para abordar as posibilidades de desenvolvemento de solo industrial neste municipio.

No encontro, a directora xeral aproveitou para trasladarlle ao rexedor que a Xunta continúa avanzando na súa estratexia de facilitar o asentamento de novas empresas en Galicia e ampliar as que xa están instaladas, e no proceso de desenvolver solo industrial nos concellos que teñen necesidade e onde as empresas están esperando para poder asentar as súas industrias. Trátase de ter un desenvolvemento industrial homoxéneo en toda Galicia.

Nesta liña, explicoulles que o Executivo autonómico puxo en marcha figuras de creación de solo, como é o caso da Zona de Aceleración de Proxectos Empresariais e Solo (Zapes), co obxecto de dar axilidade e facilidade a aqueles proxectos que precisan solo de maneira urxente; e as Zonas industriais rurais (ZIR) pensadas para actividades industriais de menor envergadura localizadas en áreas rurais con necesidades de solo.