A Coruña, 13 de xuño de 2025

O conselleiro de Sanidade, Antonio Gómez Caamaño, participou esta mañá no acto de presentación da nova campaña de doazón estival da Axencia Galega de Doazón de Sangue, Órganos e Tecidos Non esquezas doar antes de veranear. Este verán as unidades móbiles de doazón de sangue da Xunta percorrerán 223 concellos para garantir as 27.000 doazóns de sangue que precisará a rede sanitaria pública galega durante os meses do verán.

Acompañado pola delegada territorial da Xunta, Belén do Campo, e a directora da Axencia Galega de Doazón de Órganos e Sangue (ADOS), Marisa López, o titular de Sanidade explicou que as unidades móbiles de doazón realizarán 800 desprazamentos durante o 1 de xuño e o 15 de setembro para dar resposta ás necesidades dos hospitais galegos.

Precisou que durante a época estival o conxunto de centros sanitarios do Servizo Galego de Saúde precisan ao redor de 27.000 doazóns para garantir o correcto funcionamento do sistema sanitario.

No marco dos actos conmemorativos do Día Mundial do Doador de Sangue, que se celebra mañá, Gómez Caamaño puxo en valor a solidariedade da poboación galega á hora de doar pois, no que vai de ano, xa se acadaron máis de 47.000 doazóns e rexistráronse 4.000 novos doantes.

Na mesma liña, remarcou que Galicia segue coa súa progresión no aumento de doazóns anuais, a lograr, ao longo do pasado ano, máis de 105.300 doazóns.

“O pasado ano incrementamos nun 2 % o número de doazóns (1.853), ao acadar as 99.840 de sangue e 5.538 de aférese”, precisou o conselleiro.

Gómez Caamaño pechou a súa intervención animando ao conxunto da poboación “a seguir contribuíndo a salvar vidas con este pequeno pero valioso xesto”, convidando aos galegos e galegas a acudir a unidade de doazón máis próxima.