Lugo, 28 de xuño de 2025

O delegado territorial da Xunta en Lugo, Javier Arias, felicitou ao alumnado da terceira promoción do grao de Robótica do Campus Terra, que celebrou hoxe a súa graduación. “Sodes o resultado de sumar talento e esforzo, e deixades patente que Lugo e Galicia teñen capacidade de formar profesionais altamente cualificados”, afirmou.

Ao respecto, lembrou a “aposta decidida” da Xunta e da USC pola innovación e pola conexión entre universidade e empresa, “que permite que a formación teña un impacto real na contorna”.

Arias destacou que a Xunta reforza cada ano os recursos destinados á ciencia e ao talento investigador. Para 2025, este compromiso tradúcese nunha achega de máis de 61  millóns de euros en contratos pre e posdoutorais, con 175 novas prazas, e 29 millóns  dirixidos a grupos de investigación, ou no lanzamento de convocatorias específicas como ‘Galicia Investiga Igualdade’, dotada con 1,1  millóns para apoiar dez axudas predoutorais con estancias no estranxeiro.