Santiago de Compostela, 3 de xullo de 2025

O secretario xeral da Emigración, Antonio Rodríguez Miranda, recibiu esta mañá no aeroporto de Santiago de Compostela-Rosalía de Castro aos participantes do programa Escolas Abertas. En total, participarán nesta iniciativa 45 profesores de entidades galegas do exterior, 36 de América e outros 9 de Europa e resto de España, cunha media de idade de 35 anos.

Este programa, que leva desenvolvéndose varias décadas, está dirixido ás entidades galegas do exterior e permite dar formación especializada ás persoas responsables de impartir docencia en actividades de cultura tradicional galega, de confección de traxes tradicionais galegos ou baile. 

Trátase de cursos presenciais que pretenden garantir a participación da cidadanía galega no exterior, tanto na vida social como na vida cultural de Galicia, de cara a dinamizar as comunidades galegas de Europa e América. Durante unha semana, os participantes recibirán tamén a visita de recoñecidos músicos de prestixio galegos. Estas xornadas celebraranse do 4 ao 15 de xullo no Centro Superior de Hostalaría de Galicia, en Santiago de Compostela.