Becerreá (Lugo), 16 de xullo de 2025

O Centro de Formación e Experimentación Agroforestal de Becerreá acolle estes días o campamento Destino Ancares, no que participan 27 nenos e nenas nacidos entre os anos 2014 e 2016.

O delegado territorial de Lugo, Javier Arias, e a directora xeral de Xuventude, Lara Meneses, visitaron hoxe a actividade, enmarcada na campaña Modo Verán Activo da Consellería de Cultura, Lingua e Xuventude. O campamento ten unha única quenda, que comezou o día 11 e remata o próximo venres.

Esta experiencia ofrece aos rapaces e rapazas a oportunidade de practicar o coidado da horta, recolección de produtos, recoñecemento de plantas aromáticas e medicinais ou observación de animais de alta montaña.

Tamén hai obradoiros de xabón e mel; actividades de aventura, acampada, rastrexo fotográfico e taller de supervivencia; xogos deportivos e lúdicos; veladas de temática ambiental e rural; así como unha excursión á base de helicópteros e punto de vixilancia contra incendios, entre outras.

Os responsables autonómicos destacaron que o obxectivo dos campamentos é que os nenos e mozos desfruten das vacacións ao tempo que se lles facilita ás familias un recurso de conciliación durante a tempada estival.

Este ano a Xunta ofrece na provincia de Lugo case 2.500 prazas repartidas por distintos concellos dentro da campaña de verán. A programación inclúe campamentos, minicampamentos, campos de voluntariado e outras actividades de carácter lúdico, cultural e deportivo dirixidas aos máis novos.