O director de Augas de Galicia reuniuse hoxe co alcalde da localidade
Augas de Galicia informa ao concello das Pontes de que estarán dispoñibles máis de 2.100 l/s para novos usos
A nova capacidade débese á modificación da concesión de auga a Endesa que, tras o desmantelamento da central térmica, pasa de consumir 2.560 l/s a 390 l/s
Santiago de Compostela, 22 de xullo de 2025
O director de Augas de Galicia, Roi Fernández, informou hoxe ao alcalde das Pontes, Valentín González, de que nuns meses estarán dispoñibles máis de 2.100 l/s de auga para novos usos na localidade, unha vez finalice o trámite da modificación concesional iniciada pola administración hidráulica.
Segundo lle trasladou ao rexedor, logo do desmantelamento da central térmica de Endesa, estase modificando a concesión de auga que tiña outorgada xa que o consumo da planta de ciclo combinado é duns 390 l/s en vez dos 2.560 l/s anteriores. Isto permitirá que Augas de Galicia poida outorgar eses 2.100 l/s a novos usos.
Nesa liña, Roi Fernández lembrou que, segundo indica o Plan Hidrolóxico de Galicia, eses usos se concederán en trámite de competencia e se primarán os usos de abastecemento antes que os industriais, así como aqueles de maior eficiencia.
De feito, Augas de Galicia ponderará criterios ambientais, sociais e económicos á hora de outorgar novas concesións tendo en conta tamén que o municipio das Pontes se localiza nunha das chamadas zonas de transición xusta.
Imaxes relacionadas
