Oviedo, 28 de outubro de 2025

O presidente da Xunta, Alfonso Rueda, participou hoxe en Oviedo na presentación do libro Territorio de Encuentro, de Guillermo Martínez Suárez, e quixo aproveitar para destacar o vínculo histórico, cultural e humano que une a Galicia e Asturias.

O titular do Goberno galego destacou que ambas Comunidades son, máis que territorios veciños, espazos irmáns nos que a historia, a cultura e a vida cotiá tecen lazos permanentes. Salientou que ambos territorios comparten unha forma de ser e de vivir baseada no traballo ben feito, na serenidade e no orgullo de preservar a súa identidade.

Rueda puxo en valor o Camiño Primitivo como un dos símbolos máis poderosos desa irmandade, ao unir a Catedral de San Salvador de Oviedo coa de Santiago de Compostela. Lembrou que o pasado mes de abril se instalou na capital asturiana un novo fito xacobeo que sinala o inicio da ruta orixinal percorrida por Alfonso II hai máis de mil anos, e que representa a continuidade e a amizade entre ambos pobos.

O presidente galego destacou tamén a dimensión económica e social do Camiño, lembrando que este ano máis de medio millón de peregrinos chegaron a Compostela, dos cales preto de 26.000 escolleron o Camiño Primitivo, un 14 % máis que o ano pasado. Neste senso, sinalou que Asturias terá un papel destacado na celebración do Xacobeo 2027, un evento que volverá situar o Camiño de Santiago no centro da atención global.

Rueda referiuse tamén á sintonía institucional existente entre Galicia e Asturias, que se reflicte na defensa de intereses comúns como o apoio ao sector pesqueiro, o impulso das enerxías renovables, a loita contra o despoboamento ou o desenvolvemento do Corredor Atlántico Noroeste. Insistiu en que esta infraestrutura é esencial para mellorar a competitividade e garantir a igualdade de oportunidades de todo o noroeste español, e defendeu que a cooperación entre ambos territorios é a vía para facerse escoitar en Madrid e en Bruxelas.

O xefe do Executivo autonómico convidou ao seu homólogo asturiano, Adrián Barbón, a avanzar por un camiño de cooperación e excelencia cara unha proxección optimista de futuro, e reivindicou a unidade histórica de Galicia e Asturias en valores e vontade de construír éxitos de xeito conxunto.