Santiago de Compostela, 30 de outubro de 2025

O conselleiro de Emprego, Comercio e Emigración, José González, reafirmou hoxe o seu compromiso coa colaboración público-privada e con que a Xunta siga sendo Administración facilitadora co gallo de dar resposta ás necesidades do tecido produtivo, tanto das empresas como das persoas traballadoras. Así o dixo no marco do encontro que clausura hoxe en Santiago de Compostela a firma de seguros Howden Iberia, cuxa presenza dentro e fóra de España destacou, ao igual que os seus máis de mil traballadores, incluído arredor dun cento na nosa Comunidade.

Na súa intervención, o conselleiro fixo fincapé na necesidade de escoitar a todos e cada un dos axentes sociais, impulsando —e nunca obstaculizando— a súa competitividade no marco dun mercado laboral dinámico e inclusivo. Nese senso, avogou por abordar retos como a cobertura de vacantes, o absentismo ou a garantía do benestar laboral, sempre no marco do Diálogo Social que —segundo recordou— está en proceso de ser institucionalizado en Galicia nun futuro decreto co obxecto de potencialo.

Ante o desafío de sumar e reter talento, González salientou que o Goberno galego está comprometido con levar a formación ás empresas tanto para capacitar as persoas desempregadas como para recualificar as ocupadas. Así, a nova filosofía das accións formativas para desempregados contará con 60 millóns de euros de investimento en 2026, mentres as unidades formativas en empresas con compromiso de contratación terán 8 M€. A maiores destas accións que verán reforzada a súa vinculación cos itinerarios formativos para optimizar a inserción laboral e o valor engadido para o tecido produtivo, cabe engadir as destinadas a ocupados, con varias liñas que superan en total os 15 millóns. 

Todo no marco da aposta da Xunta de Galicia pola formación flexible e axustada ás demandas das empresas en tempo real, ao igual o proxecto piloto de microcredenciais en competencias dixitais especializadas que se impulsará o ano que vén (5 M€) ao abeiro do decreto pioneiro que se prevé aprobar este próximo mes de decembro.

A maiores, o titular de Emprego quixo poñer en valor a folla de ruta autonómica para reter e aproveitar o talento da mocidade, así como doutros colectivos prioritarios como as mulleres. Tamén se referiu ao retorno de galegos do exterior e á incorporación ordenada e planificada ao mercado laboral de persoas de terceiros países, poñendo de relevo que todas as medidas sobre emprego dirixidas a estes dous grupos se canalizarán, para potenciar a súa eficacia, na nova Oficina de Atracción de Talento coa que contará a Xunta.

Nesa liña, José González concluíu sinalando que o Goberno galego terá sempre a man tendida para avanzar na colaboración cos axentes sociais, aportando certezas e seguridade, axudando a abordar retos estruturais do tecido produtivo e permitindo aflorar novas oportunidades de crecemento.