Santiago de Compostela, 26 de novembro de 2025

A folga sanitaria convocada por dúas organizacións sindicais acadou, durante a quenda de mañá, un seguimento do 6,89 % na totalidade dos centros sanitarios de atención primaria da comunidade galega.

De acordo cos datos das sete áreas sanitarias que conforman o Servizo Galego de Saúde, durante esta mañá na área sanitaria da Coruña e Cee o seguimento da folga acadou o 7,8 %; na área de Santiago-Barbanza o 11,5 %; na de Ferrol o 7,5 %; na de Lugo, A Mariña e Monforte de Lemos o 4,1 %; na área de Ourense, Verín e O Barco de Valdeorras o 0,78 %; na de Pontevedra e O Salnés do 7,6 %; e na área sanitaria de Vigo 8,2 %.

A Consellería de Sanidade e as organizacións sindicais da Mesa sectorial CSIF, CCOO, UGT e tamén SIMEGA, acordaron na xornada deste luns unha serie de melloras de tipo económico, organizativas e laborais para o persoal sanitario.

A sanidade pública galega está a responder axeitadamente á demanda asistencial que se presentou ata o de agora nos centros sanitarios galegos.

A Xunta continúa a traballar co obxectivo de ofrecer unha atención sanitaria óptima a todos os cidadáns e para acadar as mellores condicións laborais para o conxunto de profesionais, ben sexa na atención primaria ou hospitalaria.